ଚାବାହାର ବନ୍ଦର : ଭାରତର ସୁବିଧା ପାଇଁ ଇରାନ ଉପରେ କଟକଣାକୁ ସାମୟିକ କୋହଳ କଲା ଆମେରିକା
ନୂଆଦିଲ୍ଲୀ : ଭାରତକୁ ଏକ ବଡ଼ କୂଟନୈତିକ ସଫଳତା ମିଳିଛି । ଇରାନରେ ଭାରତ ନିର୍ମାଣ କରୁଥିବା ଚାବାହାର ବନ୍ଦର ପାଇଁ କଟକଣାକୁ ସାମୟିକଭାବେ କୋହଳ କରିଛି ଆମେରିକା । ଏହା ଫଳରେ ଭାରତ ଏହି ବନ୍ଦରରେ ଲାଗୁଥିବା କେତେକ ଜରୁରୀ ଉପକରଣ କିଣିପାରିବ ।
ଗତ ବର୍ଷଠାରୁ ଆମେରିକାର ଟ୍ରମ୍ପ ପ୍ରଶାସନ ଇରାନ ଉପରେ ଅର୍ଥନୈତିକ କଟକଣା ଲଗାଇଛି । ଏପରିକି ଇରାନରୁ ତେଲ କିଣୁଥିବା ଦେଶମାନଙ୍କ ଉପରେ ମଧ୍ୟ ଆମେରିକା କଟକଣା ଲଗାଉଛି । ଏହା ଫଳରେ ଚାବାହାର ବନ୍ଦରର ନିର୍ମାଣ କାର୍ଯ୍ୟ ଧୀମେଇ ଯାଇଥିଲା । କଟକଣା କାରଣରୁ ଏହି ବନ୍ଦର ପାଇଁ କିଣାଯିବାକୁ ଥିବା ବିଭିନ୍ନ ଅତ୍ୟାଧୁନିକ ଉପକରଣ କ୍ରୟ ନିମନ୍ତେ ଆବଶ୍ୟକ ୮୫ ନିୟୁତ ଡଲାର ଯୋଗାଇବାକୁ କୌଣସି ଅନ୍ତର୍ଜାତୀୟ ବ୍ୟାଙ୍କ ରାଜି ହେଉନଥିଲେ । କିନ୍ତୁ ଏହି ପ୍ରସଙ୍ଗକୁ ଭାରତ ପକ୍ଷରୁ ଆମେରିକା ନିକଟରେ ଉଠାଯିବା ପରେ ଆମେରିକା ଏହି ପ୍ରକଳ୍ପ ପାଇଁ କଟକଣାକୁ କୋହଳ କରିଛି । ଏ ସଂପର୍କରେ ଆମେରିକା ଭାରତକୁ ଲିଖିତ ଆଶ୍ୱାସନା ପ୍ରଦାନ କରିଛି ।
Sambad is now on WhatsApp
Join and get latest news updates delivered to you via WhatsApp
ଭାରତ ସରକାରଙ୍କ ଦ୍ୱାରା ଗଠିତ ଇଣ୍ଡିଆ ପୋର୍ଟ୍ସ ଗ୍ଲୋବାଲ ଲିମିଟେଡ (ଆଇପିଜିଏଲ) ଗତବର୍ଷ ଏହି ବନ୍ଦରର ପରିଚାଳନା ଦାୟିତ୍ୱ ଗ୍ରହଣ କରଥିଲା । ଏହି ବନ୍ଦର ଦ୍ୱାରା କେବଳ ଭାରତ, ଇରାନ ନୁହେଁ ଆଫଗାନିସ୍ତାନ ମଧ୍ୟ ବିଶେଷଭାବେ ଉପକୃତ ହେବ । ଏହି ବନ୍ଦର ହେଲେ ଭାରତ ଆଫଗାନିସ୍ତାନ ଓ କେନ୍ଦ୍ର ଏସିଆରେ ସିଧାସଳଖ ପହଞ୍ଚିପାରିବ । ଇରାନରୁ ତୈଳ ଆମଦାନୀ ମଧ୍ୟ ସହଜ ହେବ । ଆଫଗାନିସ୍ତାନ ରପ୍ତାନି ଆମଦାନୀ ପାଇଁ ସବୁବେଳେ ପାକିସ୍ତାନ ଉପରେ ନିର୍ଭର କରୁଥିଲା । କିନ୍ତୁ ଏବେ ଆଉ ପାକିସ୍ତାନ ଉପରେ ନିର୍ଭର କରିବାକୁ ପଡିବ ନାହିଁ । ଏହା ଫଳରେ ଆତଙ୍କବାଦ ବିରୋଧୀ ଲଢେଇରେ ଏହି ତିନି ଦେଶ ଏକାଠି ହୋଇପାରିବେ ।