ମାସୁଦ୍ ଅଝାରକୁ ଅନ୍ତର୍ଜାତୀୟ ଆତଙ୍କବାଦୀ ଘୋଷଣା କରାଗଲେ ବିରୋଧ କରିବ ନାହିଁ ପାକିସ୍ତାନ, ସବୁ ଆତଙ୍କୀ ସଂଗଠନ ବିରୋଧରେ ଗ୍ରହଣ କରିବ କାର୍ଯ୍ୟାନୁଷ୍ଠାନ : ରିପୋର୍ଟ
ନୂଆଦିଲ୍ଲୀ : ପୁଲଓ୍ଵାମାରେ ହୋଇଥିବା ଆତଙ୍କବାଦୀ ଆକ୍ରମଣ ପାଇଁ ନିଜକୁ ଦାୟୀ କରିଥିବା ଜୈସ୍-ଇ-ମହମ୍ମଦର ମୁଖ୍ୟ ମାସୁଦ୍ ଆଝାରକୁ ନେଇ ପାକିସ୍ତାନ ଏକ ବଡ଼ ନିଷ୍ପତ୍ତି ନେଇଛି । ଏବେ ମାସୁଦ୍ ଆଝାରକୁ ଅନ୍ତର୍ଜାତୀୟ ଆତଙ୍କବାଦୀ ବୋଲି ଘୋଷଣା କରାଗଲେ ପାକିସ୍ତାନ ତାହାର ବିରୋଧ କରିବ ନାହିଁ ବୋଲି ସୂଚନା ମିଳିଛି । ଏହା ସହ ପାକ୍ରେ ଥିବା ସବୁ ପ୍ରତିବନ୍ଧିତ ସଂଗଠନ ଏବଂ ଜୈସ୍ର ମୁଖ୍ୟଙ୍କ ବିରୋଧରେ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ପାକିସ୍ତାନ ଗ୍ରହଣ କରିବାକୁ ଯାଉଥିବା ଜଣାପଡ଼ିଛି । ରବିବାର ଏକ ରିପୋର୍ଟରୁ ଖବରଟି ସାମ୍ନାକୁ ଆସିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ବୁଧବାର ଆମେରିକା, ବ୍ରିଟେନ ଏବଂ ଫ୍ରାନ୍ସ ପାକିସ୍ତାନରେ ରହୁଥିବା କୁଖ୍ୟାତ ଆତଙ୍କବାଦୀ ମାସୁଦ୍ ଆଝାରକୁ ଅନ୍ତର୍ଜାତୀୟ ଆତଙ୍କବାଦୀ ଘୋଷଣା କରିବା ପାଇଁ ସଂଯୁକ୍ତ ରାଷ୍ଟ୍ର ସୁରକ୍ଷା ପରିଷଦରେ ଏକ ପ୍ରସ୍ତାବ ରଖିଥିଲେ । ଏହି ପ୍ରସ୍ତାବକୁ ମଞ୍ଜୁରୀ ମିଳିଲେ, ଆଝାର କୌଣସି ଦେଶକୁ ଯାତ୍ରା ନ କରି ପାରିବା ସହ ତାଙ୍କର ସବୁ ସମ୍ପତି ନିଲାମ ହୋଇଯିବ । ଏହି ପ୍ରସ୍ତାବ ଦିଆଯିବା ପରେ ପ୍ରଥମେ ପାକ୍ ଏହାକୁ ବିରୋଧ କରିଥିବା ବେଳେ ବର୍ତ୍ତମାନର ପରିସ୍ଥିତି ଦେଖି ପାକିସ୍ତାନ ଏହାର ବିରୋଧ କରିବ ନାହିଁ ବୋଲି ସାମ୍ନାକୁ ଆସିଛି । ମାସୁଦ୍ ଏବଂ ତା’ର ସଂଗଠନ ବିରୋଧରେ କ’ଣ କାର୍ଯ୍ୟାନୁଷ୍ଠାନ ପାକିସ୍ତାନ ଗ୍ରହଣ କରିବ, ତାହା ସ୍ପଷ୍ଟ ହୋଇ ନ ଥିଲେ ମଧ୍ୟ ମାସୁଦ୍କୁ ଅନ୍ତର୍ଜାତୀୟ ଆତଙ୍କବାଦୀ ଘୋଷଣା କରିବାରେ ସେ ବିରୋଧ କରିବା ନାହିଁ ବୋଲି ସ୍ପଷ୍ଟ ହୋଇଛି ।