ଓଡ଼ିଶାରେ ପ୍ରସାଦ ଯୋଜନା ଧୀମା : କେନ୍ଦ୍ର ପର୍ଯ୍ୟଟନ ମନ୍ତ୍ରୀଙ୍କ ହସ୍ତକ୍ଷେପ ଲୋଡ଼ିଲେ ଧର୍ମେନ୍ଦ୍ର
ଭୁବନେଶ୍ୱର : କେନ୍ଦ୍ର ଅନୁଦାନରେ ପୁରୀରେ କାର୍ଯ୍ୟକାରୀ ହେଉଥିବା ‘ପ୍ରସାଦ’ ଓ ‘ସ୍ୱଦେଶ ଦର୍ଶନ’ ଯୋଜନାର ଗତି ଧୀମା ହେବା ନେଇ ଚିନ୍ତା ପ୍ରକଟ କରିଛନ୍ତି କେନ୍ଦ୍ର ପେଟ୍ରୋଲିୟମ ଓ ଦକ୍ଷତା ବିକାଶ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏଥିରେ ହସ୍ତକ୍ଷେପ କରିବାକୁ ସେ କେନ୍ଦ୍ର ପର୍ଯ୍ୟଟନ ମନ୍ତ୍ରୀ କେେ.ଜେ. ଆଲଫୋନ୍ସଙ୍କ ହସ୍ତକ୍ଷେପ ଲୋଡିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ନିଜ ପତ୍ରରେ ଶ୍ରୀ ପ୍ରଧାନ କହିଛନ୍ତି ଯେ ଡିସେମ୍ବର ୧୯ ତାରିଖରେ କେନ୍ଦ୍ର ପର୍ଯ୍ୟଟନ ମନ୍ତ୍ରଣାଳୟର ଅଧିକାରୀ ମାନେ ଓଡିଶାରେ ଚାଲୁଥିବା ମନ୍ତ୍ରଣାଳୟର ବିଭିନ୍ନ କାର୍ଯ୍ୟକ୍ରମ ବିଷୟରେ ତାଙ୍କୁ ଅବଗତ କରାଇଥିଲେ । ପ୍ରସାଦ ଯୋଜନାରେ ପୁରୀ ପାଇଁ ୨୬ ମାର୍ଚ, ୨୦୧୫ ରେ ୫୦ କୋଟି ଟଙ୍କା ଖର୍ଚ୍ଚ ପାଇଁ ଅନୁମୋଦନ କରାଯାଇଥିବା ବେଳେ ରାଜ୍ୟ ସରକାରଙ୍କ ପକ୍ଷରୁ କୋଷ୍ଟାଲ ରେଗୁଲାଟରି ଜୋନ କ୍ଲିୟରାନ୍ସ ମିଳି ନ ଥିବାରୁ ଏହା ଠିକ ଭାବେ ଆଗେଇପାରୁ ନାହିଁ । ପୁରୀଗସ୍ତରେ ଆସି ଏହି ପ୍ରକଳ୍ପର ଅଗ୍ରଗତିକୁ ବ୍ୟକ୍ତିଗତଭାବେ ସମୀକ୍ଷା କରିବାକୁ ଶ୍ରୀ ପ୍ରଧାନ ଅନୁରୋଧ କରିଛନ୍ତି ।
ସେହିପରି ସ୍ୱଦେଶ ଦର୍ଶନ ଯୋଜନାରେ ଗୋପାଳପୁର- ବରକୁଳ-ସାତପଡା- ଟମପଡା କୋଷ୍ଟାଲ ସର୍କିଟର ବିକାଶ ପାଇଁ ୭୬.୪୯ କୋଟି ଟଙ୍କା ଅନୁମୋଦନ କରାଯାଇଛି ଓ ଓଟିଡିସି ଏହାକୁ କାର୍ଯ୍ୟକାରୀ କରୁଛି । ୨୦୧୬ ସେପ୍ଟେମ୍ବର ମାସରେ ଅନୁମୋଦନ କରାଯାଇଥିବା ବେଳେ ଏହାର କାମ ଅତ୍ୟନ୍ତ ମନ୍ଥର ଗତିରେ ଚାଲିଛି । ଓଟିଡିସି ଦ୍ୱାରା ଟେଣ୍ଡର ପ୍ରକ୍ରିୟାରେ ବିଳମ୍ବ କାରଣରୁ ଏହି କାମ ବିଳମ୍ବିତ ହେଉଛି । ସ୍ୱଦେଶ ଦର୍ଶନ ଯୋଜନାରେ ଏହି ପ୍ରକଳ୍ପକୁ ତ୍ୱରାନ୍ଵିତ କରିବା ପାଇଁ ହସ୍ତକ୍ଷେପ କରିବାକୁ ଶ୍ରୀ ପ୍ରଧାନ କେନ୍ଦ୍ର ମନ୍ତ୍ରୀ ଶ୍ରୀ ଆଲଫୋନ୍ସଙ୍କୁ ଅନୁରୋଧ କରିଛନ୍ତି ।