ପରିବାରର ଇଚ୍ଛା ବିରୋଧରେ ଯାଇ କିଡ୍ନି ଦାନ କରି ଯବାନଙ୍କ ଜୀବନ ବଞ୍ଚାଇଲେ ମହିଳା; ଅଦାଲତରୁ ଆଣିଲେ ଅନୁମତି
ଜୟପୁର : ଜଣେ ଦେଶ ସେବା କରୁଥିବା ସେନା କର୍ମଚାରୀଙ୍କ ଜୀବନ ବଞ୍ଚାଇବା ଲାଗି କିଡନି ଦାନ ପାଇଁ ନିଜ ପରିବାର ସହ ଲଢ଼ିଛନ୍ତି ରାଜସ୍ଥାନ ବାସିନ୍ଦା ୪୮ ବର୍ଷୀୟା ବର୍ଷା ଶର୍ମା । ଏକ ବିରଳ ଉଦାହରଣ ସୃଷ୍ଟି କରିଛନ୍ତି ସେ। ସେନା କର୍ମଚାରୀ ମହିଳାଙ୍କ ସାଙ୍ଗ ବୋଲି ଜଣା ପଡ଼ିଥିବା ବେଳେ ତାଙ୍କୁ ବଞ୍ଚାଇବା ପାଇଁ ବର୍ଷା ନିଜ ପରିବାର ଲୋକଙ୍କଠାରୁ ଅନୁମତି ମାଗିଥିଲେ । କିନ୍ତୁ ପରିବାର ଲୋକେ ମହିଳାଙ୍କ ନିଷ୍ପତ୍ତିରେ ରାଜି ନ ହେବାରୁ ସେ ଅଦାଲତରୁ ଅନୁମତି ନେଇ ଅଙ୍ଗଦାନ କରିଥିବା ଜଣାପଡ଼ିଛି । ଜୁଲାଇ ୨୭ରେ ତାଙ୍କ ସର୍ଜରୀ କରାଯାଇଥିବା ବେଳେ ତାଙ୍କର ଏକ କିଡ଼୍ନି ତାଙ୍କ ବନ୍ଧୁ ପଙ୍କଜ ଭାର୍ଗବଙ୍କ ଶରୀରରେ ଲଗାଯାଇଥିଲା । ଏହି ସର୍ଜରିଟି କଲମ୍ବିଆ ଏସିଆ ହସ୍ପିଟାଲରେ ହୋଇଥିବା ସୂଚନା ମିଳିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ ବର୍ଷାଙ୍କୁ ପଙ୍କଜଙ୍କ ସ୍ୱାସ୍ଥ୍ୟବସ୍ଥା ବିଷୟରେ ଜଣାପଡ଼ିବା ପରେ ସେ ଅକ୍ଟୋବର ୨୦୧୭ରୁ କିଡ୍ନି ଦାନ ପାଇଁ ପ୍ରସ୍ତୁତି ଆରମ୍ଭ କରିଥିଲେ । କିନ୍ତୁ ତାଙ୍କ ପରିବାର ଲୋକେ ଏ ନେଇ ରାଜି ହୋଇ ନ ଥିଲେ ବରଂ ସେ କିଭଳି କିଡନି ଦାନ କରି ନ ପାରନ୍ତୁ ସେଥି ଲାଗି ସରକାରୀ ସ୍ତରରେ ଅଭିଯୋଗ କରିଥିଲେ। ଏହାପରେ ନିଜର ଏହି ଇଚ୍ଛା ବିଷୟରେ ଅଦାଲତକୁ ଜଣାଇବା ପରେ ତାଙ୍କୁ କିଡ୍ନି ଦେବାର ଅନୁମତି ମିଳିଥିଲା । ଏହି କିଡ଼୍ନି ପ୍ରତିରୋପଣ ପାଇଁ ବର୍ଷା କୌଣସି ଟଙ୍କା ନେଇ ନଥିବା ଜଣା ପଡ଼ିଛି । ଏ ନେଇ ପରିବାର ତରଫରୁ ଅନେକ ବିରୋଧ କରାଯାଇଥିବା ବେଳେ ବର୍ଷା ଜଣେ ସାବାଳକ ଏବଂ ସେ ତାଙ୍କ ଜୀବନକୁ ନେଇ ନିଷ୍ପତ୍ତିି ନେଇ ପାରିବେ ବୋଲି ଅଦାଲତ ରାୟ ଦେଇଥିଲେ।