ଦୁଇ ବର୍ଷ ବୟସରେ ହିଁ ବାପା-ମା’ଙ୍କଠାରୁ ଅଲଗା ହୋଇ ଯାଇଥାନ୍ତେ ବିଗ୍ ବି, ଜାଣନ୍ତୁ କ’ଣ ଘଟିଥିଲା ୭୪ବର୍ଷ ତଳେ
ମୁମ୍ବାଇ : ଅତୀତରେ ନିଜ ସହ ଘଟିଥିବା ବିଭିନ୍ନ ଘଟଣା ବିଷୟରେ ଜଣାଇ ସମସ୍ତଙ୍କ ଦୃଷ୍ଟି ଆକର୍ଷଣ କରିଥାନ୍ତି ବିଗ୍ ବି ଅମିତାଭ ବଚ୍ଚନ । ସେ ଜଣାଇଥିବା ପ୍ରତିଟି କଥା ପରେ ଚର୍ଚ୍ଚାର ବିଷୟ ପାଲଟି ଯାଇଥାଏ । ଏହା ଏବେ ପୁଣି ଦେଖିବାକୁ ମିଳିଛି । ବିଗ୍ ବିଙ୍କୁ ୨ବର୍ଷ ବୟସ ହୋଇଥିବା ବେଳେ ତାଙ୍କ ସହ ଯେଉଁ ଘଟଣା ଘଟିଥିଲା ସେ ବିଷୟରେ ଜଣାଇବା ପରେ ତାହାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି । ସୂଚନା ମୁତାବକ, ବିଗ୍ ବି ରେଳ ସୁରକ୍ଷାକୁ ନେଇ ଏକ ଭିଡ଼ିଓ ପ୍ରସ୍ତୁତ କରିଛନ୍ତି, ଯେଉଁଥିରେ ସେ ନିଜର ଛୋଟ ବେଳର ଏକ ଘଟଣା ବିଷୟରେ ଜଣାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହି ଭିଡିଓରେ ସେ ବର୍ଣ୍ଣନା କରିଛନ୍ତି, ‘ଛୋଟ ବେଳୁ ହିଁ ମୋର ଟ୍ରେନ୍ ସହ ଏକ ଅଲଗା ପ୍ରକାରର ସଂପର୍କ ରହିଛି । ଯେତେବେଳେ ମୋତେ ୨ବର୍ଷ ବୟସ ହୋଇଥିଲା ମୁଁ ମୋ ମାତା-ପିତାଙ୍କ ସହ ଅଜାଙ୍କୁ ଦେଖା କରିବା ପାଇଁ ଯାଇଥିଲି । ଘରକୁ ଫେରିବା ପାଇଁ ରେଳ ଷ୍ଟେସନରେ ପହଞ୍ଚିବା ପରେ ମା’ ମୋତେ ବାପାଙ୍କ ପାଖରେ ଛାଡ଼ି ଟିକେଟ ଆଣିବା ପାଇଁ ଚାଲି ଯାଇଥିଲେ । ଏହି ସମୟରେ ମୁଁ ପ୍ଲାଟ୍ଫର୍ମରେ ବସି ଟ୍ରେନ୍କୁ ଦେଖିବାରେ ଲାଗିଥିଲି । ଆଉ ଟିକେ ଭଲ ଭାବରେ ଦେଖିବା ପାଇଁ ମୁଁ ବାପାଙ୍କଠାରୁ ହାତ ଛଡ଼ାଇ ରେଳ ବ୍ରିଜ୍ ଉପରକୁ ଚାଲି ଯାଇଥିଲି । କିଛି ସମୟ ପରେ ମୋତେ ନ ପାଇ ମୁଁ ମା’ଙ୍କ ପାଖକୁ ଯାଇଥିବି ଭାବି ବାପା ମା’ଙ୍କ ପାଖକୁ ଯାଇଥିଲେ । କିନ୍ତୁ ସେଠାରେ ମୋତେ ନ ପାଇ ଦୁହେଁ ମୋତେ ଖୋଜିବାକୁ ଲାଗିଥିଲେ । ୧୫ମିନିଟ୍ ଖୋଜିବା ପରେ ଜଣେ ଲୋକ ତାଙ୍କୁ ଏକ ଦୁଇ ବର୍ଷର ପିଲଟି ରେଳ ବ୍ରିଜ୍ ଉପରେ ଠିଆ ହୋଇଥିବା କହିଥିଲେ । ଯାହା ପରେ ସେ ମୋତେ ଖୋଜି ପାଇଥିଲେ । ଯଦି ସେ ଲୋକ ଜଣଙ୍କ ମୋ ବିଷୟରେ ମୋ ମାତା-ପିତାଙ୍କୁ ନ ଜଣାଇଥାନ୍ତେ । ତେବେ ବୋଧ ହୁଏ ମୁଁ କେବେ ହେଲେ ତାଙ୍କ ପାଖକୁ ଫେରି ପାରି ନଥାନ୍ତି।’