ଏଟିଏମ୍ ଲୁଟ୍ ଉଦ୍ୟମ କରି ଦୁର୍ବୃତ୍ତ ଫେରାର
ତାଡ଼ିଦେଲେ, ନେଇ ପାରିଲେନି, ସିସି କ୍ୟାମେରାରେ ରହିଛି ଲୁଟ୍ ବେଳର ଦୃଶ୍ୟ
କୋଣାର୍କ : ଗତକାଲି ବିଳମ୍ବିତ ରାତିରେ କୋଣାର୍କ ଥାନା ଛକଠାରୁ ଅଳ୍ପଦୂରରେ ଥିବା ଏକ ଏଟିଏମ୍ରୁ ଲୁଟ୍ ଉଦ୍ୟମ ହୋଇଛି। ତେବେ ଦୁର୍ବୃତ୍ତମାନେ ଏଟିଏମ୍ ତାଡ଼ି ଦେଇଥିଲେ ମଧ୍ୟ ତା ମଧ୍ୟରୁ ଟଙ୍କା ନେଇ ପାରି ନାହାନ୍ତି। କିନ୍ତୁ ଏଟିଏମ୍ଟିକୁ ତାଡ଼ିବା ସମୟରେ ତାହା କ୍ଷତିଗ୍ରସ୍ତ ହୋଇଛି। ଅନ୍ୟପକ୍ଷରେ ଏପର୍ଯ୍ୟନ୍ତ ଲୁଟେରାଙ୍କର ପୁଲିସ୍ ଟେର୍ ପାଇ ପାରି ନାହିଁ।
Sambad is now on WhatsApp
Join and get latest news updates delivered to you via WhatsApp
ସିସି କ୍ୟାମେରାରୁ ମିଳିଥିବା ଭିଡିଓ ଚିତ୍ରରେ ତିନିଜଣ ଯୁବକ ଏହି ଏଟିଏମ୍ ଲୁଟ୍ ଉଦ୍ୟମ ଘଟଣାରେ ସଂପୃକ୍ତ ଥିବାର ଦେଖାଯାଇଛି। ୧୩ ତାରିଖ ରାତି ୩ଟା ୪୧ରେ ପ୍ରଥମେ ଦୁଇଜଣ ଯୁବକ ଥାନା ଛକ ନିକଟରେ ଥିବା ଓଡ଼ିଶା ଗ୍ରାମ୍ୟବ୍ୟାଙ୍କ ଏଟିଏମ୍ ମଧ୍ୟରେ ପ୍ରବେଶ କରୁଥିବା ସେଠାରେ ଥିବା ସିସି କ୍ୟାମେରାରେ ରେକର୍ଡିଂ ହୋଇଛି। କିଛି ସମୟ ପରେ ଅନ୍ୟ ଜଣେ ବଳିଷ୍ଠ ଯୁବକ ତାଙ୍କୁ ଆସି ସହଯୋଗ କରିଥିବାର ଦେଖିବାକୁ ମିଳିଛି। ଗୋଟିଏ ସ୍କୃ ଡ୍ରାଇଭର୍ରେ ଦୁର୍ବୃତ୍ତମାନେ ଏଟିଏମ୍ର ବିଭିନ୍ନ ଯନ୍ତ୍ରାଂଶ ଖୋଲି ଏଟିଏମ୍ରୁ ଟଙ୍କାନେବାକୁ ଉଦ୍ୟମ କରିଥିଲେ ମଧ୍ୟ ସେଥିରେ ସଫଳ ହୋଇନାହାନ୍ତି। ରାତି ୩ଟା ୫୮ ପର୍ଯ୍ୟନ୍ତ ଅକ୍ଳାନ୍ତ ପରିଶ୍ରମ କରିବା ପରେ ଦୁର୍ବୃତ୍ତମାନେ ଏଟିଏମ ଖୋଲି ଟଙ୍କା ନ ନେଇ ପାରିବାରୁ ଏଟିଏମ୍ର ଡିସ୍ପ୍ଲେ ମନିଟରକୁ ତାଡ଼ି ଦେଇଥିବାର ଦେଖିବାକୁ ମିଳିଛି। ମନିଟର୍କୁ ତାଡ଼ିବା ପରେ ସେମାନେ ଏଟିଏମରୁ ବାହାରକୁ ପଳାଇ ଆସିଥିବାର ମଧ୍ୟ ରେକର୍ଡିଂ ହୋଇଛି।
ଏ ସଂପର୍କରେ ଆଜି ସକାଳେ ବ୍ୟାଙ୍କ କର୍ତୃପକ୍ଷ ଜାଣିବା ପରେ ଓଡ଼ିଶା ଗ୍ରାମ୍ୟବ୍ୟାଙ୍କର କୋଣାର୍କ ଶାଖା ପରିଚାଳକ ମାନସ ରଂଜନ ମିଶ୍ର କୋଣାର୍କ ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ପାଇବା ପରେ ପୁଲିସ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛନ୍ତି। ତେବେ ଏହି ଘଟଣାକୁ ନେଇ ସମଗ୍ର ଅଂଚଳରେ ଆଲୋଚନା ଜୋର ଧରିଛି। ଥାନାଠାରୁ ମାତ୍ର ୫୦୦ ମିଟର ଦୂରତାରେ ଘଟିଥିବା ଏହି ଘଟଣାକୁ ନେଇ କୋଣାର୍କ ଅଂଚଳରେ ଚର୍ଚ୍ଚା ଜୋର ଧରିଛି।