ଲୋଭନୀୟ କଥା କହି ଲୋକଙ୍କୁ ଠକିଛି ଆମୱେ, ୭୫୦ କୋଟି ଟଙ୍କାର ସମ୍ପତ୍ତି ଜବତ କଲା ପ୍ରବର୍ତ୍ତନ ନିର୍ଦ୍ଦେଶାଳୟ
ନୂଆଦିଲ୍ଲୀ: ଲକ୍ଷ ଲକ୍ଷ ଲୋକଙ୍କୁ ଲୋଭନୀୟ କଥା ଓ ପ୍ରତିଶ୍ରୁତି ଦେଇ ସାମଗ୍ରୀ ବିକ୍ରି କରିବା ଏବେ ଆମୱେ ଇଣ୍ଡିଆ ପାଇଁ ମହଙ୍ଗା ସାବ୍ୟସ୍ତ ହୋଇଛି | ଏହି କମ୍ପାନୀ ଲକ୍ଷ ଲକ୍ଷ ଲୋକଙ୍କୁ ଲାଭଜନକ ପ୍ରତିଶ୍ରୁତି ଦେଇ ସାମଗ୍ରୀ ବିକ୍ରି କରି ସେଥିରୁ କୋଟି ଟଙ୍କା ରୋଜଗାର କରିଥିବା ଅଭିଯୋଗ ହୋଇଛି। ଏଥିପାଇଁ ନେଟୱାର୍କ ମାର୍କେଟିଂ କମ୍ପାନୀ ଆମୱେ ଇଣ୍ଡିଆ ଉପରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଏକ ବଡ ପଦକ୍ଷେପ ନେଇଛି। ଆମୱେ ଇଣ୍ଡିଆର ୭୫୭ କୋଟିରୁ ଅଧିକ ମୂଲ୍ୟର ସମ୍ପତ୍ତିକୁ ଆଜି ଇଡି ଜବତ କରିଛି | ମନି ଲଣ୍ଡରିଂ ଆକ୍ଟ (PMLA) ଅଧୀନରେ ଏହି ସମ୍ପତ୍ତି ଜବତ କରାଯାଇଛି |
Sambad is now on WhatsApp
Join and get latest news updates delivered to you via WhatsApp
ପ୍ରବର୍ତ୍ତନ ନିର୍ଦ୍ଦେଶାଳୟ ଆଜି ଏହି ବିଷୟରେ ସୂଚନା ଦେଇଛି। ଇଡି ପକ୍ଷରୁ କୁହାଯାଇଛି ଯେ ଜବତ ସମ୍ପତ୍ତି ମଧ୍ୟରେ ଆମୱେ ଇଣ୍ଡିଆ ଏଣ୍ଟରପ୍ରାଇଜେସ୍ ଲିମିଟେଡର ତାମିଲନାଡୁର ଡିଣ୍ଡିଗୁଲ୍ ଜିଲ୍ଲାରେ ଥିବା ଜମି ଏବଂ କାରଖାନା ବିଲଡିଂ, ପ୍ଲାଣ୍ଟ ଏବଂ ଯନ୍ତ୍ରପାତି, ଯାନବାହନ, ବ୍ୟାଙ୍କ ଆକାଉଣ୍ଟ୍ ଏବଂ ଫିକ୍ସଡ୍ ଜମା ରହିଛି | ଇଡି କହିଛି ଯେ ବଜାରରେ ଉପଲବ୍ଧ ହେଉଥିବା ସାମଗ୍ରୀ ତୁଳନାରେ ଆମୱେ କମ୍ପାନୀର ସାମଗ୍ରୀ ମୂଲ୍ୟ ବହୁତ ଅଧିକ ରହିଛି।
ଏହା ସହିତ, ଇଡି ଏହା ମଧ୍ୟ ଦାବି କରିଛି ଯେ ୨୦୦୨-୦୩ ରୁ ୨୦୨୧-୨୨ ମଧ୍ୟରେ ଆମୱେ ପ୍ରାୟ ୨୭୫୬୨ କୋଟି ଟଙ୍କା ସଂଗ୍ରହ କରିଛି, ସେଥିମଧ୍ୟରୁ ୭,୫୮୮ କୋଟି ଟଙ୍କା ଭାରତ ଏବଂ ଆମେରିକାର ଏଜେଣ୍ଟ ଓ ବିତରକମାନଙ୍କୁ କମିଶନ ଭାବରେ ପ୍ରଦାନ କରାଯାଇଛି। ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟ ଅଧୀନରେ ଜବତ ହୋଇଥିବା ୭୫୭.୭୭ କୋଟି ଟଙ୍କାର ସମ୍ପତ୍ତି ମଧ୍ୟରେ ଅସ୍ଥାବର ସମ୍ପତ୍ତିର ମୂଲ୍ୟ ୪୧୧.୮୩ କୋଟି ଟଙ୍କା ଥିବାବେଳେ ଆମୱେର ୩୬ଟି ବ୍ୟାଙ୍କ ଆକାଉଣ୍ଟରେ ଜମା ହୋଇଥିବା ୩୪୫.୯୪ କୋଟି ଟଙ୍କା ରହିଛି ।