ନୂଆଦିଲ୍ଲୀ : ଭାରତରେ ଗତ କିଛି ସପ୍ତାହ ଧରି ସୁନାଦର ବଢି ଚାଲିଛି । ଆଜି ସୁନା ଦର ଗତ ୯ ମାସରେ ସର୍ବୋଚ୍ଚ ସ୍ତର ୧୦ ଗ୍ରାମ ପିଛା ୪୯,୩୦୦ ଟଙ୍କା ଛୁଇଁଛି । ଅନ୍ତର୍ଜାତୀୟ ବଜାରର ପ୍ରଭାବ ଓ ଆଗକୁ ବିବାହ ଋତୁ ଥିବାରୁ ଦର ବଢୁଥିବା ବଜାର ବିଶେଷଜ୍ଞମାନେ କହୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମଲଟି କମୋଡିଟି ଏକ୍ସଚେଞ୍ଜ (ଏମସିଏକ୍ସ)ରେ ଡିସେମ୍ବର ମାସ ପାଇଁ ସୁନା ଦର ୧୦ ଗ୍ରାମ ପିଛା ୦.୮୭ ପ୍ରତିଶତ ବୃଦ୍ଧି ପାଇ ୪୯,୨୭୭ ଟଙ୍କାରେ ପହଞ୍ଚିଛି । ରୁପା ଦରରେ ମଧ୍ୟ ବୃଦ୍ଧି ପରିଲକ୍ଷିତ ହୋଇଛି । ଏହା କିଲୋଗ୍ରାମ ପିଛା ୧.୧ ପ୍ରତିଶତ ବୃଦ୍ଧି ପାଇ ୬୬,୬୦୫ ଟଙ୍କାରେ ପହଞ୍ଚିଛି ।
ସେହିପରି ସ୍ପଟ୍ ବଜାରରେ ୨୪ କ୍ୟାରେଟ ସୁନା ୧୦ ଗ୍ରାମ ପିଛା ୪୯,୩୫୧ ଟଙ୍କା ଓ ୨୨ କ୍ୟାରେଟ ସୁନା ୪୯,୧୫୩ ଟଙ୍କାକୁ ବୃଦ୍ଧି ପାଇଛି । ରୁପା ମଧ୍ୟ କିଲୋଗ୍ରାମ ପିଛା ୬୬୫୯୨ ଟଙ୍କାକୁ ବୃଦ୍ଧି ପାଇଛି ବୋଲି ଭାରତୀୟ ବୁଲିୟନ ଏଣ୍ଡ ଜୁଏଲର୍ସ ଆସୋସିଏସନ (ଆଇବିଜେଏ) ପକ୍ଷରୁ କୁହାଯାଇଛି ।
ଭାରତରେ ସୁନା ଦର ବଢିବାର ଏକ ପ୍ରମୁଖ କାରଣ ହେଲା ଅନ୍ତର୍ଜାତୀୟ ବଜାରରେ ଦର ବୃଦ୍ଧି । ଅନ୍ତର୍ଜାତୀୟ ବଜାରରେ ସୁନା ୦.୬ ପ୍ରତିଶତ ବୃଦ୍ଧି ପାଇ ୫ ମାସର ସର୍ବୋଚ୍ଚ ସ୍ତର ଆଉନ୍ସ ପିଛା ୧୮୬୦.୫୯ ଡଲାରରେ ପହଞ୍ଚିଛି । ସୂଚନାଯୋଗ୍ୟ ଯେ ଗୋଟିଏ ଆଉନ୍ସ ହେଉଛି ୨୮.୩ ଗ୍ରାମ ।