ଝିଅର ଆଧାର କାର୍ଡ କରିବା ପାଇଁ ବାପାର ନାଁ ମାଗିବାରୁ ପ୍ରେମିକା ଏବଂ ଦୁଇ ଝିଅକୁ ହତ୍ୟା କଲା ପ୍ରେମିକ,ଶରୀରରୁ ଅଲଗା କଲା ମୁଣ୍ଡ
ଭିଓ୍ଵାନି (ହରିୟାଣା) : ହରିୟାଣାରେ ମାସେ ପୂର୍ବରୁ ହୋଇଥିବା ଟ୍ରିପଲ ମର୍ଡରର ରାଜ୍ ଉପରୁ ପରଦା ଉଠିଛି । ଏକ ଡ୍ରମ୍ରେ ଜଣେ ମହିଳା ଏବଂ ତାଙ୍କ ଦୁଇ ଝିଅଙ୍କ ଶରୀରର ଗଣ୍ଡି ମିଳିଥିବା ବେଳେ ପୁଲିସ ଶବ ବ୍ୟବଚ୍ଛଦ କରିବା ସହ ତଦନ୍ତ ଆରମ୍ଭ କରିଥିଲା । ମାସେ ପରେ ଏହି ହତ୍ୟା ପଛରେ ମହିଳାଙ୍କ ପ୍ରେମିକର ହାତ ଥିବା ଜାଣିବାକୁ ପାଇଛି ପୁଲିସ । ଏହି ହତ୍ୟାରେ ପ୍ରେମିକକୁ ସାହାଯ୍ୟ କରିଥିବା ତା’ର ଦୁଇ ସାଙ୍ଗଙ୍କୁ ପୁଲିସ ଗିରଫ କରିଥିବା ବେଳେ ମୁଖ୍ୟ ଅପରାଧିକୁ ଖୋଜୁଛି ପୁଲିସ । ଦୁହିଁଙ୍କୁ ପୁଲିସ ଗିରଫ କରିବା ପରେ ହତ୍ୟା ପଛର ପ୍ରକୃତ କାରଣ ସାମ୍ନାକୁ ଆସି ପାରିଛି ।
Sambad is now on WhatsApp
Join and get latest news updates delivered to you via WhatsApp
ପୁଲିସ ଦେଇଥିବା ସୂଚନା ମୁତାବକ, ଆସାମରେ ରହୁଥିବା ମହିଳା ନିଜ ସ୍ୱାମୀଙ୍କଠାରୁ ଅଲଗା ହୋଇ କିଛି ବର୍ଷ ତଳେ ନିଜ ଝିଅକୁ ନେଇ ଭିଓ୍ଵାନୀ ଆସିଥିଲେ । ଏଠାରେ ରାଜେଶ ନାମକ ଜଣେ ଯୁବକଙ୍କ ସହ ତାଙ୍କର ଦେଖା ହୋଇଥିଲା । ଦୁହେଁ ପରସ୍ପରକୁ ଭଲ ପାଇ ବସିବା ସହ ବିବାହ ନ କରି ଏକାଠି ରହିବାକୁ ଲାଗିଥିଲେ । ଯାହା ପରେ ଦୁହିଁଙ୍କର ଗୋଟିଏ ଝିଅ ମଧ୍ୟ ହୋଇଥିଲା । ସାଥିରେ ରହୁଥିଲେ ମଧ୍ୟ ଘର ଲୋକଙ୍କୁ ଏ ବିଷୟରେ ଜଣାଇବାକୁ ଚାହୁଁ ନଥିଲେ ରାଜେଶ । କିନ୍ତୁ ଖବରଟି ରାଜେଶଙ୍କ ପରିବାର ଲୋକଙ୍କ ପାଖରେ ପହଞ୍ଚି ଯାଇଥିଲା । ସମସ୍ତେ ସବୁ ଜାଣିବା ପରେ ଆଧାର କାର୍ଡ ତିଆରି କରିବା ପାଇଁ ମହିଳା ରାଜେଶଙ୍କ ନାଁ ବାପାର ନାମ ଲେଖିବା ଲାଗି ଉଦ୍ଦିଷ୍ଟ ସ୍ଥାନରେ ଲେଖିବା ପାଇଁ କହିଥିଲେ । କିନ୍ତୁ ରାଜି ହୋଇ ନ ଥିଲେ ରାଜେଶ । ଏହା ପରେ ମହିଳା ଦୁଇ ଝିଅଙ୍କୁ ପାଳିବା ପାଇଁ ଟଙ୍କା ମାଗିବାରୁ ରାଜେଶ ରାଗି ଯିବା ସହ ପିଛା ଛଡ଼ାଇବା ପାଇଁ ୩ଜଣଙ୍କୁ ରାସ୍ତାରୁ ହଟାଇବାର ଯୋଜନା କରିଥିଲେ । ଡିସେମ୍ବର ୨୭ରେ ନିଜର ଦୁଇ ବନ୍ଧୁଙ୍କ ସହ ମିଶି ରାଜେଶ ୩ ଜଣଙ୍କୁ ହତ୍ୟା କରିବା ସହ ଶରୀରରୁ ମୁଣ୍ଡକୁ ଅଲଗା କରି ଦେଇଥିଲେ । ୩ଟି କଟା ମୁଣ୍ଡକୁ ଘରେ ପୋତି ଦେବା ସହ ଗଣ୍ଡିକୁ ଡ୍ରମ୍ରେ ଭର୍ତ୍ତି କରି ଫିଙ୍ଗି ଦେଇଥିଲେ ।