ଜମ୍ମୁ : ନାବାଳିକା ଦୁଷ୍କର୍ମ ଏବଂ ହତ୍ୟା ଅଭିଯୋଗରେ ଗିରଫ ହେଲେ ସ୍ୱତନ୍ତ୍ର ପୁଲିସ ଅଧିକାରୀ
ଜମ୍ମୁ : ଗତ ଜାନୁଆରିରେ ଜମ୍ମୁର କଠୁଆ ଜିଲ୍ଲାରେ ହୋଇଥିବା ଦୁଷ୍କର୍ମ ଏବଂ ହତ୍ୟାରେ ସଂପୃକ୍ତି ଥିବା ନେଇ ଜଣେ ସ୍ୱତନ୍ତ୍ର ପୁଲିସ ଅଧୀକାରୀଙ୍କୁ ଗିରଫ କରିଛି ସ୍ୱତନ୍ତ୍ର ତଦନ୍ତକାରୀ ଦଳ । ଏହି ସ୍ୱତନ୍ତ୍ର ପୁଲିସ ଅଧିକାରୀ ଜଣେ ୮ବର୍ଷିୟ ନାବାଳିକା ସହ ଦୁଷ୍କର୍ମ କରିବା ପରେ ଗଳା କାଟି ହତ୍ୟା ହୋଇଥିବା ଘଟଣାରେ ସଂପୃକ୍ତ ଥିବା ଖବର ଆସିବା ପରେ ସାଧାରଣ ଲୋକମାନେ ଆଶ୍ଚର୍ଯ୍ୟ ହୋଇ ଯାଇଛନ୍ତି । ସୁରକ୍ଷା କର୍ମୀ ଏଭଳି କଲେ ସାଧାରଣ ଜନତା କିପରି ସୁରକ୍ଷିତ ରହିବେ ବୋଲି ସ୍ଥାନୀୟ ଲୋକଙ୍କ ମନରେ ପ୍ରଶ୍ନ ଉଠିଛି । ସୂଚନା ମୁତାବକ, ନାବାଳିକା ଜଣଙ୍କ ଘୋଡ଼ା ଚରାଇବାକୁ ଯାଇଥିବା ବେଳେ ସେଠାରୁ ତାଙ୍କୁ ଅପହରଣ କରି ନିଆ ଯାଇଥିଲା । ଅପହରଣ କରିବାର ସପ୍ତାହ ପରେ ରସନା ଜଙ୍ଗଲରୁ ଜାନୁଆରି ୧୭ରେ ତାଙ୍କ ମୃତଦେହ ମିଳିଥିଲା ।
Sambad is now on WhatsApp
Join and get latest news updates delivered to you via WhatsApp
ପୀଡ଼ିତାଙ୍କ ପରିବାର ଲୋକେ ହୀରା ନଗର ଥାନାରେ ଏତଲା ଦେବା ପରେ ଏହି ଘଟଣାର ତଦନ୍ତ ପାଇଁ ଦୀପକ ଖଜୁରିଆଙ୍କୁ ଦାୟିତ୍ୱ ଦିଆ ଯାଇଥିଲା ।କିନ୍ତୁ ସେ ହିଁ ଏପରି କରିଛନ୍ତି ତାହା ପରିବାର ଲୋକଙ୍କୁ ଜଣା ନଥିଲା । ପୁଲିସ କହିବା ଅନୁଯାୟୀ, ସ୍ୱତନ୍ତ୍ର ପୁଲିସ ଅଧିକାରୀ ଦୀପକ ଖଜୁରିଆ ଅପହରଣ କରିଥିବା ନାବାଳକଙ୍କ ସହ ମିଶି ପୀଡ଼ିତାଙ୍କ ସହ ଦୁଷ୍କର୍ମ ପରେ ତାଙ୍କୁ ହତ୍ୟା କରିବାରେ ସାହାଯ୍ୟ କରିଥିଲେ । ଆମମାନଙ୍କ ପାଖରେ ଦୀପକଙ୍କ ବିରୁଦ୍ଧରେ ପ୍ରମାଣ ମଧ୍ୟ ରହିଛି । ଅଭିଯୁକ୍ତ ଦୀପକଙ୍କୁ ସବୁ ପ୍ରମାଣ ଦେଖାଇବା ପରେ ସେ ତାଙ୍କ ଦୋଷ ମାନିନେଇଛନ୍ତି ।
ନୋମାଦ୍ ସମ୍ପ୍ରଦାୟଙ୍କ ମଧ୍ୟରେ ଭୟ ସୃଷ୍ଟି କରିବା ପାଇଁ ସେ ଏପରି କରିଥିବା ଜଣା ପଡ଼ିଛି । ପୂର୍ବରୁ ନାବାଳକଙ୍କୁ ଗିରଫ କରାଯାଇଥିବା ବେଳେ ଏବେ ଏ ନେଇ ଏସ୍ପିଓ ଦୀପକ ଖଜୁରିଆଙ୍କୁ ଗିରଫ କରାଯାଇଛି । ଜାନୁଆରି ୨୦ରେ ଷ୍ଟେସନ ହାଉସ ଅଫିସରଙ୍କୁ ନିଲମ୍ବିତ କରାଯାଇଥିବା ବେଳେ ଜାନୁଆରି ୨୩ରେ ଏହି ଘଟଣାର ଯାଞ୍ଚ ପାଇଁ କ୍ରାଇମ୍ବ୍ରାଞ୍ଚକୁ ଦାୟିତ୍ୱ ଦିଆ ଯାଇଥିଲା ।