କଠୁଆ ଦୁଷ୍କର୍ମ ମାମଲା : ପୀଡ଼ିତାଙ୍କୁ ବଞ୍ଚାଇବା ପରିବର୍ତ୍ତେ ‘ମୋତେ କିଛି କରିବାକୁ ଦିଅ, ତା’ପରେ ମାରିଦେବ’ ବୋଲି କହିଥିଲେ ପୁଲିସ ଅଧିକାରୀ
ନୂଆଦିଲ୍ଲୀ : ଦୁଇ ମାସ ତଳେ କଠୁଆ ଜିଲ୍ଲାରେ ଘଟିଥିବା ଦୁଷ୍କର୍ମ ଘଟଣା ବର୍ତ୍ତମାନ ଦେଶକୁ ଦୋହଲାଇ ଦେଇଛି। ଏ ନେଇ ନୂଆ ନୂଆ ତଥ୍ୟ ସାମ୍ନାକୁ ଆସୁଛି । ଗତ ୧୦ ଜାନୁଆରି ଦିନ ଜଣେ ୮ବର୍ଷର ନାବାଳିକା ଘୋଡ଼ା ଚରାଇବାକୁ ଯାଇଥିବା ବେଳେ ତା’କୁ ସ୍ଥାନୀୟ ମନ୍ଦିରର ସେବାୟତଙ୍କ ଯୋଜନା ମୁତବାକ ଅପହରଣ କରାଯାଇ ପାଖ ମନ୍ଦିରରେ ରଖା ଯାଇଥିଲା । ଏହା ପରେ ୮ଜଣ ଅଭିଯୁକ୍ତ ତା’ ସହ ଥର ଥର କରି ଦୁଷ୍କର୍ମ କରିଥିଲେ । ଅନ୍ୟ ପକ୍ଷରେ ଝିଅ ନିଖୋଜ ଖବର ପରିବାର ଲୋକ ପୁଲିସକୁ ଜଣାଇବା ପରେ ପୁଲିସ ତତ୍ପରତାର ସହ ତଦନ୍ତ ମଧ୍ୟ ଆରମ୍ଭ କରିଥିଲା । କିନ୍ତୁ ପୀଡ଼ିତାଙ୍କୁ ଖୋଜି ପାଇବା ପରେ ତା’ଙ୍କୁ ବଞ୍ଚାଇବା ପରିବର୍ତ୍ତେ ନିଜେ ଅଭିଯୁକ୍ତମାନଙ୍କ ସହ ସାମିଲ ହୋଇ ଯାଇଥିଲା ପୁଲିସ । ନିଜର କର୍ତ୍ତବ୍ୟ ଓ ମାନବିକତାକୁ ଭୁଲି ପୁଲିସ ଅଧିକାରୀ ଜଣକ କହିଥିଲେ, ‘ମୋତେ କିଛି କରିବାକୁ ଦିଅ,ତା’ପରେ ମାରିଦେବ ।’ ଏହାପରେ ସେ ପୀଡ଼ିତାଙ୍କ ସହ ଦୁଷ୍କର୍ମ କରିଥିଲେ ।
Sambad is now on WhatsApp
Join and get latest news updates delivered to you via WhatsApp
କିନ୍ତୁ ସେହି ସମୟରେ ପୁଲିସ କର୍ମଚାରୀ ଯଦି ନିଜ ପୁଲିସ ହେବାର କର୍ତ୍ତବ୍ୟ ଠିକ୍ ଭାବରେ ପାଳନ କରିଥାନ୍ତେ, ହୁଏତ ନାବାଳିକା ଜଣଙ୍କ ନିଜ ଜୀବନ ଫେରି ପାଇଥାନ୍ତା । କିନ୍ତୁ ପୁଲିସ କର୍ମଚାରୀ ଜଣକ ପୀଡ଼ିତାଙ୍କୁ ବଞ୍ଚାଇବା ପରିବର୍ତ୍ତେ ତା’ଙ୍କୁ ମୃତ୍ୟୁ ମୁଖକୁ ଠେଲି ଦେଇଥିଲେ । ଦୁଷ୍କର୍ମ କରି ସାରିବା ପରେ ଅଭିଯୁକ୍ତମାନେ ପୀଡ଼ିତାଙ୍କ ତଣ୍ଟି ଚିପି ହତ୍ୟା କରିବା ସହ ତାଙ୍କ ମୁଣ୍ଡକୁ ପଥରରେ ଛେଚି ତାଙ୍କୁ ଜଙ୍ଗଲରେ ଫିଙ୍ଗି ଦେଇଥିଲେ । ଏତେ ସବୁ ବିଷୟରେ ଜାଣି ପୁଲିସ ଅଧିକାରୀ ଜଣଙ୍କ କୌଣସି ପଦକ୍ଷପ ନେଇ ନ ଥିଲେ ।
ଏହି ଘଟଣା ପରେ ମନ୍ଦିରର ସେବାୟତ ସଞ୍ଜି ରାମ,ତାଙ୍କ ପୁତୁରା ବିଶାଲ, ସବ୍ଇନ୍ସପେକ୍ଟର ଆନନ୍ଦ ଦତ୍ତା ଓ ଦୁଇ ଜଣ ବିଶେଷ ପୁଲିସ ଅଧିକାରୀ ଦୀପକ ଖଜୁରିଆ ଏବଂ ସୁରେନ୍ଦ୍ର ବର୍ମା, ହେଡ଼୍ କନେଷ୍ଟବଳ ତିଲକ ରାଜ୍ ଏବଂ ସ୍ଥାନୀୟ ବାସିନ୍ଦା ପ୍ରବେଶ କୁମାରଙ୍କ ବିରୋଧରେ ଚାର୍ଜସିଟ୍ ଦାଖଲ କରାଯାଇଥିଲା । କିନ୍ତୁ ଏ ପର୍ଯ୍ୟନ୍ତ ଏମାନଙ୍କ ଅମାନବୀୟ କାଣ୍ଡ ପାଇଁ ଏମାନଙ୍କ ବିରୋଧରେ କୌଣସି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାରି ନାହିଁ ।