ପ୍ରେମିକ ସହ ମିଶି ସ୍ୱାମୀକୁ ହତ୍ୟା କରି ଘରର ଅଗଣାରେ ପୋତି ଦେଇଥିଲେ ସ୍ତ୍ରୀ, ତା’ପରେ କ’ଣ ହେଲା ଜାଣନ୍ତୁ?
ଶାହାଜାହନ୍ପୁର : ଉତ୍ତରପ୍ରଦେଶର ଶାହାଜାହାନ୍ପୁର୍ରୁ ଏକ ଲଜ୍ଜାଜନକ ଘଟଣା ଘଟିଥିବାର ଖବର ସାମ୍ନାକୁ ଆସିଛି । ପ୍ରେମରେ ଅନ୍ଧ ହୋଇ ଜଣେ ମହିଳା ନିଜ ସ୍ୱାମୀକୁ ହତ୍ୟା କରିଥିବା ଅଭିଯୋଗ ହୋଇଛି । ଖାଲି ସେତିକି ନୁହଁ, ସ୍ୱାମୀର ମୃତଦେହକୁ ଘରର ଅଗଣାରେ ପୋତି ତା’ଉପରେ ପ୍ଲାଷ୍ଟର କରିଥିଲେ ଅଭିଯୁକ୍ତ ମହିଳା ଏବଂ ତାଙ୍କ ପ୍ରେମିକ । କାହାର ଯେମିତି ସନ୍ଦେହ ନ ହୁଏ ସେଥି ପାଇଁ ପୁଲିସ ଷ୍ଟେସନ ଯାଇ ସ୍ୱାମୀ ନିଖୋଜ ଥିବା ଅଭିଯୋଗ କରିଥିଲେ ସ୍ତ୍ରୀ । କିନ୍ତୁ ତାଙ୍କୁ ଜଣା ନ ଥିଲା ସତ ଯେତେ ଲୁଚାଇଲେ ମଧ୍ୟ ଲୁଚି ରହେନା । ତଦନ୍ତ ପରେ ପ୍ରକୃତ ଘଟଣା ସାମ୍ନାକୁ ଆସିବା ପରେ ପୁଲିସ ଅଭିଯୁକ୍ତ ମହିଳା,ତାଙ୍କ ପ୍ରେମିକ ଏବଂ ତାଙ୍କର ଜଣେ ସହଯୋଗୀଙ୍କୁ ଗିରଫ କରିଥିବା ଜଣା ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ମୃତ ସ୍ୱାମୀ ଏକ ସ୍କୁଲରେ ପ୍ରିନ୍ସିପାଲ ଥିବା ବେଳେ ଯିବା ଆସିବାରେ ଅସୁବିଧା ହେବାରୁ ସେ ପୂର୍ବ ପ୍ରିନ୍ସିପାଲଙ୍କ ଘରେ ଭଡ଼ା ରହିଥିଲେ । ଉଭୟ ସ୍ୱାମୀ-ସ୍ତ୍ରୀ ଏବଂ ତାଙ୍କର ଦୁଇଟି ପିଲା ଆସି ପୂର୍ବ ପ୍ରିନ୍ସିପାଲଙ୍କ ଘରେ ଭଡ଼ା ରହିବା ସହ କିଛି ଦିନ ମଧ୍ୟରେ ପୂର୍ବ ପ୍ରିନ୍ସିପାଲଙ୍କ ପୁଅ ସହ ଅଭିଯୁକ୍ତ ମହିଳାଙ୍କର ପ୍ରେମ ସଂପର୍କ ଆରମ୍ଭ ହୋଇ ଯାଇଥିଲା । ଦୁଇ ଜଣ ବିବାହ କରିବା ପାଇଁ ମନସ୍ଥ କରିବା ପରେ ଅଭିଯୁକ୍ତ ମହିଳାଙ୍କ ସ୍ୱାମୀ ବାଧକ ସାଜୁଥିବାରୁ ଦୁଇ ଜଣ ତାଙ୍କୁ ମାରିବାର ଯୋଜନା କରିଥିଲେ । ଜାନୁଆରୀ୨୪ରେ ଘରେ କେହି ନ ଥିବା ବେଳେ ଅଭିଯୁକ୍ତ ମହିଳା,ତାଙ୍କ ପ୍ରେମୀ ଏବଂ ତାଙ୍କର ଜଣେ ସାଥୀ ମିଶି ସ୍ୱାମୀ ପ୍ରଭାକରଣଙ୍କୁ ହତ୍ୟା କରିଥିଲେ । ହତ୍ୟା ପରେ ଘରର ଅଗଣାରେ ମୃତଦେହକୁ ପୋତିବା ସହ ମୃତଦେହଟି ଯେମିତି ଶୀଘ୍ର ସଢ଼ିଯିବ ସେଥିପାଇଁ ସେଥିରେ ଲୁଣ ମିଶାଇଥିଲେ । ଅନ୍ୟ ପକ୍ଷରେ ଧରା ନ ପଡ଼ିବା ପାଇଁ ଅଭିଯୁକ୍ତ ମହିଳା ପ୍ରଭାକରଣଙ୍କ ନିଖୋଜ ହେବାର ଅଭିଯୋଗ କରିଥିଲେ । ଅଭିଯୁକ୍ତ ମହିଳାଙ୍କ କଥାବାର୍ତ୍ତା ଉପରେ ସନ୍ଦେହ କରି ପୁଲିସ ତଦନ୍ତ କରିବା ପରେ ପୂର୍ବ ପ୍ରିନ୍ସିପାଲଙ୍କ ପୁଅ ସହ ତାଙ୍କର ଅବୈଧ ସଂପର୍କ ଥିବା ଜଣା ପଡ଼ିଥିଲା । ଅବୈଧ ସଂପର୍କକୁ ନେଇ ପୁଲିସ ପୂର୍ବ ପ୍ରିନ୍ସିପାଲଙ୍କ ପୁଅକୁ ଗିରଫ କରି ପଚରାଉଚରା କରିବା ପରେ ସତ ସାମ୍ନାକୁ ଆସିଥିଲା ।