ବଲାଙ୍ଗୀର: ବସ୍ ବ୍ୟବସାୟକୁ କରୋନା ମାଡ଼! ଷ୍ଟାଣ୍ଡରେ ଅଟକିଛି ଶତାଧିକ ବସ୍
ବଲାଙ୍ଗୀର: ମହାମାରୀ କରୋନା ବହୁ ବ୍ୟବସାୟକୁ ପ୍ରଭାବିତ କରିଛି । ଗତ ମାର୍ଚ୍ଚ ମାସରୁ ଏଯାଏ ବିଭିନ୍ନ ବ୍ୟବସାୟୀ ମୁଣ୍ଡରେ ହାତ ଦେଇ ବସିଛନ୍ତି । ଶତାଧିକ ସଂଖ୍ୟାରେ ବସ୍ ଏବେ ବସ୍ଷ୍ଟାଣ୍ଡରେ ଛିଡ଼ା ହୋଇଛି । ଚକ ବି ହଲୁନି । କାରଣ ଯାତ୍ରୀ ନାହାନ୍ତି। ଯେଉଁ କିଛି ବସ୍ ଚାଲୁଛି ସେସବୁ କ୍ଷତିରେ ଚାଲୁଛି । ବଲାଙ୍ଗୀରରେ ସମୁଦାୟ ୧୫୦ ବସ୍ରୁ ମାତ୍ର ୩୦ରୁ ୩୫ଟି ବସ୍ ଏବେ ବିଭିନ୍ନ ମାର୍ଗରେ ଚଳାଚଳ କରୁଛି ।
Sambad is now on WhatsApp
Join and get latest news updates delivered to you via WhatsApp
ଘରୋଇ ବସ୍ ମାଲିକ ସଂଘ ପକ୍ଷରୁ ମିଳିଥିବା ସୂଚନା ଅନୁସାରେ, ବର୍ତ୍ତମାନ ୧୨୦ ବସ୍ ନିଜ ନିଜ ମାର୍ଗରେ ଚାଲି ପାରିନାହିଁ । ଯେଉଁ ୩୦ରୁ ୩୫ ଗାଡ଼ି ବାହାରିଛି ଗାଡ଼ି ମାଲିକମାନେ ତେଲ ଖର୍ଚ୍ଚ ବି ଉଠାଇ ପାରୁନାହାନ୍ତି । ମାସିକ ଗୋଟିଏ ବସ୍ ପିଛା ୬୦ ହଜାରରୁ ଅଧିକ ଟଙ୍କା ବସ୍ ମାଲିକ କ୍ଷତି ସହୁଛନ୍ତି । ଲକ୍ଡାଉନ୍ ପୂର୍ବରୁ ବଲାଙ୍ଗୀର-ସୋନପୁର, ବଲାଙ୍ଗୀର-ବରଗଡ, ବଲାଙ୍ଗୀର-କଣ୍ଟାବାଞ୍ଜି, ବଲାଙ୍ଗୀର-ଟିଟିଲାଗଡ ରୁଟରେ ପ୍ରତି ୧୫ରୁ୨୦ ମିନିଟରେ ବସ୍ ଚଳାଚଳ କରୁଥିଲା। ସେହି ମାର୍ଗମାନଙ୍କରେ ଏବେ ଘଣ୍ଟାଏ ଦୁଇ ଘଣ୍ଟା ବ୍ୟବଧାନରେ ବସ୍ ଚଳାଚଳ କରୁଥିଲେ ବି ଯାତ୍ରୀ ହେଉନାହାନ୍ତି। ଏଣୁ ପ୍ରତି ବସ୍ ପିଛା ୨ ଲକ୍ଷ ଟଙ୍କାର କ୍ଷତିପୂରଣ ଓ ଗତ ଅକ୍ଟୋବରରୁ ଜାନୁଆରି ଯାଏ ସମସ୍ତ ବସ୍ର ଟିକସ ଛାଡ଼ କରିବାକୁ ରାଜ୍ୟ ଘରୋଇ ବସ୍ ମାଲିକ ସଂଘ ଦାବି କରିଛି ।
ମାର୍ଚ୍ଚ ମାସ ପରେ ବସ୍ ଚଳାଚଳକୁ ବନ୍ଦ କରି ଦିଆଯାଇଥିଲା । ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ମେ ୨୭ରୁ ବସ୍ ଚଳାଚଳ ପୁଣି ଆରମ୍ଭ ହୋଇଛି। କିନ୍ତୁ କରୋନା ପୂର୍ବରୁ ବସ୍କୁ ଯେଭଳି ଯାତ୍ରୀ ଅପେକ୍ଷା କରୁଥିଲେ ଏବେ କରୋନା କାଳରେ ବସ୍ ଯାତ୍ରୀଙ୍କୁ ଅପେକ୍ଷା କରୁଛି । ଜିଲ୍ଲାବ୍ୟାପୀ ପ୍ରାୟ ୧୦୦୦ ବସ୍ କର୍ମଚାରୀ ଏଥିରେ ପ୍ରଭାବିତ ବି ହୋଇଛନ୍ତି । ଏସବୁ ଦୃଷ୍ଟିରେ ରଖି ରାଜ୍ୟ ସରକାର, ପ୍ରଶାସନ ଓ ଜନସାଧାରଣ ବସ୍ ସେବା ପ୍ରତି ସହାନୁଭୂତିଶୀଳ ହେବାକୁ ବଲାଙ୍ଗୀର ଘରୋଇ ବସ୍ ମାଲିକ ସଂଘ ସଭାପତି ହେମନ୍ତ ପଣ୍ଡା ନିବେଦନ କରିଛନ୍ତି ।