ବିବାହ ପ୍ରଲୋଭନ ଦେଖାଇ ଯୁବତୀଙ୍କ ସହ ଶାରୀରିକ ସମ୍ପର୍କ, ସ୍ୱାସ୍ଥ୍ୟକର୍ମୀ ଗିରଫ

ଖୋର୍ଦ୍ଧା : ବିବାହ ପ୍ରଲୋଭନ ଦେଖାଇ ଜଣେ ଯୁବତୀଙ୍କ ସହ ବାରମ୍ବାର ଶାରୀରିକ ସମ୍ପର୍କ ରଖିବା ଘଟଣାରେ ଖୋର୍ଦ୍ଧାରେ କାମ କରୁଥିବା ଜଣେ ସ୍ୱାସ୍ଥ୍ୟକର୍ମୀଙ୍କୁ ଆଜି ପୁଲିସ ଗିରଫ କରି କୋର୍ଟ ଚାଲାଣ କରିଛି ।

ସୂଚନାନୁସାରେ, ସ୍ୱାସ୍ଥ୍ୟ କର୍ମୀ ସୁବ୍ରତ ରାୟଙ୍କ ଘର ଖୋର୍ଦ୍ଧା ଉପକଣ୍ଠ ଲୋକେଶ୍ୱରପୁର । ପୀଡ଼ିତା (୨୩) ଯୁବତୀଙ୍କ ଘର କଂଟା । ଯୁବତୀଙ୍କ ଅଭିଯୋଗ ଅନୁସାରେ  ପୀଡ଼ିତାଙ୍କ ବାପା ସୁବ୍ରତ ରାୟଙ୍କ ଘରେ ଅନେକ ଦିନ ଧରି କାମ କରୁଥିଲେ । ଏଥିରେ ପୀଡ଼ିତାଙ୍କ ପରିବାର ସହ ସୁବ୍ରତଙ୍କ ପରିଚୟ ଥିଲା । ଏହି ଆଳରେ ସେ ପୀଡ଼ିତାଙ୍କ ଘରକୁ ଆସୁଥିଲେ । ୨ ବର୍ଷ ପୂର୍ବେ ପୀଡ଼ିତାଙ୍କ ମା‘ଙ୍କ ଦେହାନ୍ତ ଘଟିଥିଲା । ଏହାପରେ ସେ ଘରେ ଏକୁଟିଆ ରହୁଥିଲେ । ତାଙ୍କୁ ବିବାହର ପ୍ରଲୋଭନ ଦେଖାଇ ବିଭିନ୍ନ ସମୟରେ ଶାରୀରିକ ସମ୍ପର୍କ ସ୍ଥାପନ କରିଥିଲେ । ବର୍ତମାନ ପୀଡ଼ିତା ଜଣକ ୫ ମାସର ଗର୍ଭବତୀ ।

ଏନେଇ ପୀଡ଼ିତା ଓ ତାଙ୍କ ବାପା ଗତକାଲି ରାତିରେ ଖୋର୍ଦ୍ଧା ଟାଉନ୍ ଥାନାରେ ଲିଖିତ ଏତଲା ଦେଇଥିଲେ । ଏତଲା ଭିତ୍ତିରେ ୪୬୧/୨୦୨୦ରେ ଏକ ମାମଲା ରୁଜୁ କରି ତଦନ୍ତ ଦାୟିତ୍ୱ ଅତରିକ୍ତ ଥାନା ଅଧିକାରୀ ଆର୍ତତ୍ରାଣ ନନ୍ଦଙ୍କୁ ଦିଆଯାଇଥିଲା । ଆଜି ଉଭୟଙ୍କ ଡାକ୍ତରୀ ମାଇନା ପରେ ପୁଲିସ ସୁବ୍ରତଙ୍କୁ ଗିରଫ କରି କୋର୍ଟ ଚାଲାଣ କରିଛି ।