ନବରଙ୍ଗପୁର: ବୋଲେରୋ ଧକ୍କାରେ ୩ ଜଣଙ୍କର ମୃତ୍ୟୁ, ପରିବାର ଲୋକଙ୍କ କ୍ଷତିପୂରଣ ଦାବିରେ ରାସ୍ତାରୋକ
ନବରଙ୍ଗପୁର: ପାପଡାହାଣ୍ଡି ଠାରେ ଗୁରୁବାର ରାତି କାଳି ସୁନ୍ଦରୀ ମନ୍ଦିର ନିକଟରେ ବୋଲେରୋ ଧକ୍କାରେ ହେବାରୁ ୩ ଜଣ ଲୋକଙ୍କର ମୃତ୍ୟୁ ନେଇ କ୍ଷତିପୂରଣ ଦାବିରେ ପରିବାର ଲୋକେ ଶୁକ୍ରବାର ୨୬ ନମ୍ବର ଜାତୀୟ ରାଜପଥ ଅବୋରାଧ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଗୁରୁବାର ରାତି ମନ୍ଦିର ସମ୍ମୁଖରେ ଲୋକମାନେ ଛିଡ଼ା ହୋଇ କଥାବାର୍ତ୍ତା ହେଉଥିଲେ। ଏଥିରେ ଗୋପାଳ ଭତରା, ପଦମନ ଗୌଡ଼ ଓ ହରି ଭତରା ମଧ୍ୟ ଛିଡ଼ା ହୋଇଥିଲେ। ଏହି ସମୟରେ ମହୀଦଲପୁର ପଟରୁ ଏକ ଦ୍ରୁତଗାମୀ ବୋଲେରୋ (ଓଆର ୨୪ ଏ୯୮୮୦) ଆସି ମନ୍ଦିର ସମ୍ମୁଖରେ ଛିଡ଼ା ହୋଇଥିବା ୩ ଜଣଙ୍କୁ ଶକ୍ତ ଧକ୍କା ଦେଇଥିଲା। ୩ ଜଣ ବ୍ୟକ୍ତି ଗୁରୁତର ହୋଇଯିବା ପରେ ସେମାନଙ୍କୁ ନବରଙ୍ଗପୁର ଜିଲ୍ଲା ସଦର ଚିକିତ୍ସାଳୟକୁ ନିଆଯାଇଥିଲା। ପରବର୍ତ୍ତୀ ସମୟରେ ଡାକ୍ତର ୩ ଜଣଙ୍କୁ ମୃତ ଘୋଷଣା କରିଥିଲେ।
ଦୁର୍ଘଟଣା ଯୋଗୁଁ ୩ ଜଣଙ୍କ ମୃତ୍ୟୁ ପରେ ସ୍ଥାନୀୟ ଲୋକେ ଉତ୍ତେଜିତ ହୋଇ ଆଜି ରାସ୍ତା ଅବରୋଧ କରିଥିଲେ। ସେମାନ ମୃତକଙ୍କ ପରିବାରକୁ ଉପଯୁକ୍ତ କ୍ଷତିପୂରଣ ଦାବି କରିଥିଲେ। ଦୀର୍ଘ ସମୟ ରାସ୍ତା ଅବରୋଧ ଯୋଗୁଁ ଯାତାୟତ ପ୍ରଭାବିତ ହୋଇଥିଲା।