‘ମୁମ୍ବାଇରେ କାଷ୍ଟିଂ କାଉଚର ଶିକାର ହୋଇ ମଡେଲିଂ ଛାଡ଼ିଦେଲି, ଅଭିନୟରେ ମନୋନିବେଶ କଲି’
ସାକ୍ଷାତକାର/ ମୋନାଲିସା ପରିଡ଼ା
କେନ୍ଦୁଝରର ଜରଦା ଗାଁରୁ ଯାଇ ବିଶ୍ୱସ୍ତରରେ ପରିଚିତ ହେବାରେ ସଫଳ ହୋଇଛନ୍ତି ଓଡ଼ିଆ ପୁଅ ଦେବେଶ ରଞ୍ଜନ । ବଲିଉଡରେ କାଷ୍ଟିଂ ଡିରେକ୍ଟର ଭାବେ କାର୍ଯ୍ୟ କରୁଥିବା ଦେବେଶ ପ୍ରଥମେ ଇଂରାଜୀ ଫିଲ୍ମ ‘ବର: ଏ ବ୍ଲେସିିଂ’ ଓ ପରେ ଫିଲ୍ମ ‘ଭୋର’ରେ ମୁଖ୍ୟ ଭୂମିକାରେ ଅଭିନୟ କରି ଚର୍ଚ୍ଚାର ପରିସରକୁ ଆସିଛନ୍ତି । ପୂର୍ବରୁ ଅନେକ ଅନ୍ତର୍ଜାତୀୟ ଫିଲ୍ମ ଉତ୍ସବରେ ‘ଭୋର’ ପ୍ରଦର୍ଶନ ହୋଇ ସାରିଥିବା ବେଳେ ଆସନ୍ତା ନଭେମ୍ବରରେ କାଇରୋ ଇଣ୍ଟରନ୍ୟାସ୍ନାଲ ଫିଲ୍ମ ଫେଷ୍ଟିଭାଲରେ ଏହା ପ୍ରଦର୍ଶିତ ହେବ। ଏହି ଅବସରରେ ଦେବେଶଙ୍କ ସହ ମୋନାଲିସା ପରିଡ଼ାଙ୍କ ସ୍ୱତନ୍ତ୍ର ସାକ୍ଷାତକାର।
Sambad is now on WhatsApp
Join and get latest news updates delivered to you via WhatsApp
ପ୍ରଶ୍ନ: ଆପଣଙ୍କ ମନରେ କିପରି ଅଭିନୟର ଇଚ୍ଛା ଜାଗ୍ରତ ହୋଇଥିଲା?
ଉତ୍ତର : ମୁଁ ଷଷ୍ଠ ଶ୍ରେଣୀରେ ପଢ଼ୁଥିବା ବେଳେ ଅଭିନୟ କରିବା ଲାଗି ଆଗ୍ରହ ମୋ ମନକୁ ଆସିଥିଲା । ବଲିଉଡ୍ କଳାକାର ମିଥୁନ ଚକ୍ରବର୍ତ୍ତୀ, ଅନୀଲ କପୁର ଓ ଅମିତାଭ ବଚ୍ଚନଙ୍କ ଅଭିନୟ ଓ ନୃତ୍ୟ ଦେଖି ମୋ ମନରେ ଅଭିନୟ କରିବାର ଇଚ୍ଛା ଆସିଥିଲା ।
ପ୍ରଶ୍ନ : ପ୍ରଥମେ ଅଭିନୟ କରିବା ପାଇଁ ଘର ଲୋକଙ୍କ ସମର୍ଥନ ମିଳିଥିଲା କି?
ଉତ୍ତର : ନାଁ । ଆମ ପରିବାରର କେହି ମଧ୍ୟ ଅଭିନୟ ଜଗତ ସହ ଜଡ଼ିତ ନ ଥିଲେ । ସେଥିପାଇଁ ବାପାଙ୍କୁ ମୋ ଅଭିନୟ କରିବାର ଇଚ୍ଛା ପସନ୍ଦ ଆସି ନ ଥିଲା । ସେ ମୋତେ ଅଭିନୟ କରିବା ପାଇଁ ସଫା ସଫା ମନା କରି ଦେଇଥିଲେ ।
ପ୍ରଶ୍ନ : ଆପଣ ପାଠ ପଢ଼ା ଛାଡ଼ି ଅଭିନୟ କରୁଛନ୍ତି ବୋଲି ଘର ଲୋକେ କେବେ ଜାଣିଲେ?
ଉତ୍ତର: ଯାଜପୁରର ବ୍ୟାସନଗର କଲେଜରୁ ବାଣିଜ୍ୟରେ ସ୍ନାତକ ସାରି ମୁଁ କମ୍ପାନୀ ସେକ୍ରେଟାରୀ ପାଠ ପଢ଼ିବା ପାଇଁ ଦିଲ୍ଲୀ ଚାଲି ଯାଇଥିଲି । ସେଠାରେ ବର୍ଷେ ପର୍ଯ୍ୟନ୍ତ ମୁଁ କମ୍ପାନୀ ସେକ୍ରେଟାରୀ ପାଠ ପଢ଼ିଥିଲେ ମଧ୍ୟ ପରେ ଅଧାରୁ ଛାଡ଼ି ମୁଁ ଥିଏଟରରେ ଅଭିନୟ କରିବା ଆରମ୍ଭ କରିଥିଲି । ଏ ବିଷୟରେ ଜାଣି ବାପା ମୋ ଉପରେ ରାଗି କଥା ହୋଇ ନ ଥିଲେ । ଏଥି ପାଇଁ କିଛି ଦିନ ମୋତେ ଦିଲ୍ଲୀରେ ପିଲାମାନଙ୍କୁ କୋଚିଂ ଦେଇ ମୋର ଖର୍ଚ୍ଚ ଉଠାଇବାକୁ ପଡ଼ିଥିଲା ।
ପ୍ରଶ୍ନ : ନବାଗତ ହିସାବରେ ଆପଣଙ୍କୁ କେବେ କାଷ୍ଟିଂ କାଉଚ୍ର ଶିକାର ହେବାକୁ ପଡ଼ିଛି କି?
ଉତ୍ତର : ଫିଲ୍ମରେ ତ ନୁହେଁ । କିନ୍ତୁ ମଡେଲିଂ କ୍ୟାରିୟର ସମୟରେ ମୋତେ କାଷ୍ଟିଂ କାଉଚ୍ର ସାମ୍ନା କରିବାକୁ ପଡ଼ିଥିଲା । ଯେଉଁଥି ପାଇଁ ମୁଁ ମୋର ମଡେଲିଂ କ୍ୟାରିୟରକୁ ଛାଡ଼ିଥିଲି ।
ପ୍ରଶ୍ନ: ଆପଣଙ୍କ ପ୍ରଥମ ଫିଲ୍ମ ଥିଲା ‘ବର: ଏ ବ୍ଲେସିିଂ’ । ଏହା ପୂର୍ବରୁ ଆପଣଙ୍କୁ ଅନ୍ୟ କିଛି ଫିଲ୍ମର ଅଫର ମିଳିଥିଲା କି?
ଉତ୍ତର: ହଁ । ମୋତେ ବଲିଉଡ୍ ଫିଲ୍ମ ‘ଭାଗ୍ ମିଲ୍ଖା ଭାଗ୍’ର ମୁଖ୍ୟ ଚରିତ୍ର ଅଫର କରାଯାଇଥିଲା । ଫିଲ୍ମ ନିର୍ମାତା ପ୍ରଥମେ ଫିଲ୍ମ ପାଇଁ ନୂଆ ଚେହେରା ଖୋଜୁଥିଲେ । ମୁଁ ଅଡିସନ ଦେଇଥିଲି । କିନ୍ତୁ ପରେ ସେ ଜଣେ ଚିହ୍ନା ଚେହେରାକୁ ନେବାକୁ ଚାହିଁବାରୁ ମୋତେ ସୁଯୋଗ ମିଳି ନ ଥିଲା । ପରେ ରଣବୀର ସିଂହଙ୍କ ଫିଲ୍ମ ‘ଗଲି ବଏ’ରେ ଥିବା ମୋଇନ୍ ଚରିତ୍ର ମଧ୍ୟ ମୋତେ ଅଫର କରାଯାଇଥିଲା । କିନ୍ତୁ ସେସମୟ ‘ଭୋର’ର ସୁଟିଂ ଚାଲିଥିବା ହେତୁ ମୁଁ ତାହା କରି ପାରି ନ ଥିଲି ।
ପ୍ରଶ୍ନ: ଓଲିଉଡ୍ରେ ଆପଣଙ୍କୁ କ’ଣ ପାଇଁ ସୁଯୋଗ ମିଳିଲା ନାହିଁ ବୋଲି ଆପଣ ଭାବୁଛନ୍ତି?
ଉତ୍ତର: ମୋର ରଙ୍ଗ ଓ ଲୁକ୍ ପାଇଁ ମୋତେ ସୁୁଯୋଗ ମିଳିଲା ନାହିଁ । ଏଇ ଦୁଇଟି ଜିନିଷ ଓଡ଼ିଶାରେ ବହୁତ ଗୁରୁତ୍ୱ ରଖେ ।
ପ୍ରଶ୍ନ : ଆପଣଙ୍କର ସେଲିବ୍ରିଟି କ୍ରସ କିଏ?
ଉତ୍ତର: ଫିଲ୍ମ କବୀର ସିଂହ ଦେଖିବା ପରେ ଏବେ କିଆରା ଆଡ୍ଭାନୀ ମୋର କ୍ରସ ପାଲଟି ଯାଇଛନ୍ତି ।
ପ୍ରଶ୍ନ : ଫିଲ୍ମ ସହ ଆଉ କେଉଁ କାମ ଆପଣ କରନ୍ତି?
ଉତ୍ତର : ଫିଲ୍ମ ସହ ମୁଁ ବିଭିନ୍ନ ଫିଲ୍ମ ପାଇଁ କାଷ୍ଟିଂ କରେ । ଫିଲ୍ମ ‘ଗଟ୍ଟୁ’ ଓ ‘ସାଧୁ ବାସବାନୀ ମ୍ୟୁଜିୟମ’ ପାଇଁ କାଷ୍ଟିଂ ଡିରେକ୍ଟର ଭାବେ କାମ କରିବା ସହ ଫିଲ୍ମ ‘ଭାଗ୍ ମିଲ୍ଖା ଭାଗ୍’ ଓ ‘ଲାଇଫ୍ ଅଫ୍ ପାଏ’ ଭଳି ଫିଲ୍ମରେ ଆସିଷ୍ଟାଣ୍ଟ କାଷ୍ଟିଂ ଡିରେକ୍ଟର ଭାବେ କାମ କରିଛି ।
ପ୍ରଶ୍ନ: କେଉଁ ବଲିଉଡ୍ କଳାକାର ସହ ସ୍କ୍ରିନ୍ ସେୟାର କରିବାକୁ ଚାହୁଁଛନ୍ତି?
ଉତ୍ତର: ତାପ୍ସୀ ପନ୍ନୁ, ଅମିତାଭ ବଚ୍ଚନ, ଇର୍ଫାନ ଖାନ୍, ଶାହାରୁଖ୍ ଖାନ୍, ଦୀପିକା ପାଦୁକୋନ ଓ କଙ୍ଗନା ରାଣାଓ୍ଵତ୍ଙ୍କ ସହ ସ୍କ୍ରିନ୍ ସେୟାର କରିବାକୁ ଚାହୁଁଛି ।
ପ୍ରଶ୍ନ: ଆଗାମୀ ପ୍ରେଜେକ୍ଟ କ’ଣ ?
ଉତ୍ତର: ବର୍ତ୍ତମାନ ମୁଁ ଏକ କ୍ଷୁଦ୍ର ଚଳଚ୍ଚିତ୍ର ‘ବେହରୁପିଆ’ର ସୁଟିଂ ସାରିଛି । ଯାହା କିଛି ଦିନ ମଧ୍ୟରେ ଦର୍ଶକଙ୍କ ସାମ୍ନାକୁ ଆସିବ । ଏହା ସହ ଅନ୍ୟ ଦୁଇଟି ଫିଲ୍ମର ସୁଟିଂ ମୁଁ ଖୁବ୍ ଶୀଘ୍ର ଆରମ୍ଭ କରିବି । ଏାହାର ଟାଇଟେଲ ଏ ପର୍ଯ୍ୟନ୍ତ ଘୋଷଣା କରାଯାଇ ନାହିଁ ।