ବେଙ୍ଗାଲୁରୁ କାଫେ ବିସ୍ଫୋରଣ: ମୁଖ୍ୟ ଷଡ଼୍ଯନ୍ତ୍ରକାରୀ ଗିରଫ
ବେଙ୍ଗାଲୁରୁ: ବେଙ୍ଗାଲୁରୁରେ ରାମେଶ୍ୱରମ୍ କାଫେ ବିସ୍ଫୋରଣ ମାମଲାର ଅନ୍ୟତମ ମୁଖ୍ୟ ଷଡ଼୍ଯନ୍ତ୍ରକାରୀ ମୁଜାମ୍ମିଲ ସରିଫକୁ ଜାତୀୟ ତଦନ୍ତକାରୀ ଏଜେନ୍ସି (ଏନ୍ଆଇଏ) ଆଜି ୩ଟି ରାଜ୍ୟର ଏକାଧିକ ସ୍ଥାନରେ ଚଢ଼ଉ କରି ଗିରଫ କରିଛି। ମାର୍ଚ୍ଚ ୧ରେ ହୋଇଥିବା ଏହି ବିସ୍ଫୋରଣରେ ଅନେକ ଗ୍ରାହକ ଓ ହୋଟେଲ କର୍ମଚାରୀ ଆହତ ହୋଇଥିଲେ, ଯେଉଁଥିରେ ଲୋକପ୍ରିୟ କାଫେର ବ୍ୟାପକ କ୍ଷୟକ୍ଷତି ହୋଇଥିଲା। ଏହି ମାମଲାରେ ଚିହ୍ନଟ ହୋଇଥିବା ଅନ୍ୟ ଦୁଇ ଅଭିଯୁକ୍ତଙ୍କୁ ଲଜିଷ୍ଟିକ୍ ସହାୟତା ଦେଇଥିବା ମୁଜାମ୍ମିଲ ସରିଫକୁ ଏନ୍ଆଇଏ ଟିମ୍ କର୍ଣ୍ଣାଟକର ୧୨ଟି, ତାମିଲନାଡୁର ୫ଟି ଓ ଉତ୍ତରପ୍ରଦେଶର ଗୋଟିଏ ସ୍ଥାନରେ ଚଢ଼ଉ କରିବା ପରେ ଗିରଫ କରିଥିଲା। ମାର୍ଚ୍ଚ ୩ ତାରିଖରେ ତଦନ୍ତ ଦାୟିତ୍ୱ ନେଇଥିବା ଏନ୍ଆଇଏ ବିସ୍ଫୋରଣ ଘଟାଇଥିବା ମୁଖ୍ୟ ଅଭିଯୁକ୍ତ ମୁସାବୀର ସାଜିବ ହୁସେନକୁ ଚିହ୍ନଟ କରିଥିଲା। ଅନ୍ୟାନ୍ୟ ମାମଲାରେ ଏଜେନ୍ସି ଚାହୁଥିବା ଅନ୍ୟ ଜଣେ ଷଡ଼ଯନ୍ତ୍ରକାରୀ ଅବଦୁଲ ମାଥିନକୁ ମଧ୍ୟ ଚିହ୍ନଟ କରାଯାଇଛି। ଉଭୟ ଫେରାର ଅଛନ୍ତି। ମୁସାବୀର ସାଜିବ ହୁସେନ କାଫେରେ ଏକ ବ୍ୟାଗ୍ ଛାଡିଥିଲା ଯେଉଁଥିରେ ଆଇଇଡି ଥିଲା। ଆଜି ତିନି ଅଭିଯୁକ୍ତଙ୍କ ଘର ସହ ଅନ୍ୟ ସନ୍ଦିଗ୍ଧଙ୍କ ବାସଭବନ ଓ ଦୋକାନରେ ଚଢ଼ଉ କରାଯାଇଥିଲା।