ନୂଆଦିଲ୍ଲୀ : ଆଗକୁ ଦେଶର ସବୁଠାରୁ ବଡ଼ ଓ ରାଜନୈତିକ ଦୃଷ୍ଟିରୁ ମହତ୍ତ୍ବପୂର୍ଣ୍ଣ ରାଜ୍ୟ ଉତ୍ତରପ୍ରଦେଶରେ ବିଧାନସଭା ନିର୍ବାଚନ ହେବାକୁ ଯାଉଛି । ଉତ୍ତରପ୍ରଦେଶର ନିର୍ବାଚନର ଏକ ବଡ଼ ବିଶେଷତା ହେଲା ଏହାର ଜାତି ଭିତ୍ତିକ ଭୋଟର ଶ୍ରେଣୀ । ଏହାକୁ ଦୃଷ୍ଟିରେ ରଖି ବିଭିନ୍ନ ରାଜନୈତିକ ଦଳମାନେ ନିଜ ନିଜର ରଣନୀତି ପ୍ରସ୍ତୁତ କରୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ନିକଟରେ ଉତ୍ତରପ୍ରଦେଶର ଯୋଗୀ ମନ୍ତ୍ରୀମଣ୍ଡଳରେ ମନ୍ତ୍ରୀ ଥିବା ସ୍ବାମୀ ପ୍ରସାଦ ମୌର୍ଯ୍ୟ ବିଜେପି ଛାଡ଼ି ସମାଜବାଦୀ ପାର୍ଟିରେ ଯୋଗ ଦେଇଛନ୍ତି । ସେ ଉତ୍ତରପ୍ରଦେଶର ଜଣେ ଟାଣୁଆ ଓବିସି (ପଛୁଆ ବର୍ଗ) ନେତା ଭାବେ ଜଣାଶୁଣା । ଏହା ପରେ ରାଜ୍ୟରେ ଓବିସି ଭୋଟରଙ୍କୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ଉତ୍ତରପ୍ରଦେଶର ୪୦ ପ୍ରତିଶତ ଭୋଟର ହେଉଛନ୍ତି ଓବିସି । ଏଣୁ ଏହି ବର୍ଗର ଭୋଟରଙ୍କୁ ଆକୃଷ୍ଟ କରିବାକୁ ଉଦ୍ୟମ ଆରମ୍ଭ ହୋଇଯାଇଛି ।
ଭୋଟରଙ୍କୁ ଆକୃଷ୍ଟ କରିବାକୁ ବିଜେପି ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନାମର ସାହାରା ନିଆଯାଉଛି । ମୋଦୀ ଜଣେ ଓବିସି ନେତା ଭାବେ ଜଣାଶୁଣା । କିନ୍ତୁ ବିଜେପି କେତେକ ଐତିହାସିକ ଚରିତ୍ରକୁ ମଧ୍ୟ ଓବିସିର ପୋଷ୍ଟର ବୟ ଭାବେ ଉପସ୍ଥାପନ କରାଯାଉଛି । ସେମାନଙ୍କ ମଧ୍ୟରେ ଅଛନ୍ତି ଇତିହାସ ପ୍ରସିଦ୍ଧ ମଗଧ ସାମ୍ରାଜ୍ୟର ସମ୍ରାଟ ଚନ୍ଦ୍ରଗୁପ୍ତ ମୌର୍ଯ୍ୟ ଓ ସମ୍ରାଟ ଅଶୋକ । ଓବିସି ବର୍ଗଙ୍କୁ ଆକୃଷ୍ଟ କରିବାକୁ ବିଜେପି ଉଭୟ ବିହାର ଓ ଉତ୍ତରପ୍ରଦେଶରେ ଉଭୟ ସମ୍ରାଟଙ୍କୁ ଓବିସି ଭାବେ ପ୍ରମାଣିତ କରିବାକୁ ଲାଗିଛି । ଗତ କିଛି ବର୍ଷ ହେଲା ବିହାରରେ ଜେଡିୟୁ-ବିଜେପି ସରକାରଙ୍କ ପକ୍ଷରୁ ଚନ୍ଦ୍ରଗୁପ୍ତ ଓ ଅଶୋକଙ୍କ ନାଁରେ ବିଭିନ୍ନ ପ୍ରକଳ୍ପ ଘୋଷଣା କରାଯାଇଛି । ସେହିପରି ଉତ୍ତରପ୍ରଦେଶରେ ବି କେତେକ ପ୍ରକଳ୍ପ ଘୋଷଣା କରାଯାଇଛି ।