ଚନ୍ଦ୍ରବାବୁଙ୍କ ଅମଳରେ ଚାଲୁଥିବା ଆନ୍ନା କ୍ୟାଣ୍ଟିନକୁ ବନ୍ଦ କଲେ ମୁଖ୍ୟମନ୍ତ୍ରୀ ଜଗନ ମୋହନ, ଏବେ ୫ଟଙ୍କାରେ ମିଳିବନି ଖାଦ୍ୟ
ହାଇଦ୍ରାବାଦ୍ : ଆନ୍ଧ୍ରପ୍ରଦେଶରେ ଅନେକ ଦିନ ପୂର୍ବରୁ ଗରିବ ଲୋକମାନଙ୍କ ପାଇଁ ଚାଲି ଆସୁଥିବା ଆନ୍ନା କ୍ୟାଣ୍ଟିନକୁ ବନ୍ଦ କରି ଦେଇଛନ୍ତି ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀ । ନୂଆ ମୁଖ୍ୟମନ୍ତ୍ରୀ ଜଗନ ରେଡ୍ଡୀ ପୂର୍ବ ସରକାରଙ୍କ ଦ୍ୱାରା ଲାଗୁ କରାଯାଇଥିବା ଅନେକ ଯୋଜନାକୁ ବନ୍ଦ କରିଥିବା ବେଳେ ଆନ୍ନା କ୍ୟାଣ୍ଟିନକୁ ବନ୍ଦ କରିବା ନିଷ୍ପତ୍ତିର ପ୍ରଭାବ ଗରିବ ଲୋକମାନଙ୍କ ଉପରେ ସିଧାସଳଖ ଭାବେ ପଡ଼ିବ ବୋଲି ଜଣା ପଡ଼ିଛି । ଟିଡିପି ଦ୍ୱାରା ଆରମ୍ଭ କରାଯାଇଥିବା ଆନ୍ନା କ୍ୟାଣ୍ଟିନକୁ ନେଇ ଦୁର୍ନୀତି ହେଉଥିବାରୁ ଜଗନ ରେଡ୍ଡୀ ଏହାକୁ ବନ୍ଦ କରିବା ପାଇଁ ଆଦେଶ ଦେଇଥିଲେ । ଯାହା ଫଳରେ ୨୦୪ଟି ଆନ୍ନା କ୍ୟାଣ୍ଟିନକୁ ଅଗଷ୍ଟ ୧ରେ ବନ୍ଦ କରି ଦିଆଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ଜଗନ ରେଡ୍ଡୀଙ୍କ ଏଭଳି ନିଷ୍ପତ୍ତି ପରେ ଟୁଇଟ୍ କରି ନିଜର ପ୍ରତିକ୍ରିୟା ରଖିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ତଥା ଟିଡିପିର ଅଧ୍ୟକ୍ଷ ଏନ୍. ଚନ୍ଦ୍ରବାବୁ ନାଇଡୁ । ଟୁଇଟ୍ରେ, ନୂଆ ମୁଖ୍ୟମନ୍ତ୍ରୀଙ୍କ ଏଭଳି ନିଷ୍ପତ୍ତି ପାଇଁ ଏବେ ଲକ୍ଷ ଲକ୍ଷ ଲୋକ ୫ଟଙ୍କାରେ ପୋଷଣଯୁକ୍ତ ଖାଦ୍ୟ ହରାଇଲେ । ପାଖା ପାଖି ୨୦,୦୦୦ଲୋକ ନିଜର ଜୀବିକା ହରାଇଲେ । ଟିଡିପିକୁ ହରାଇବା ପାଇଁ ଜଗନ ରେଡ୍ଡୀ ସରକାର କିଛି ବି କରି ପାରନ୍ତି । କିନ୍ତୁ ଟିଡିପି ସରକାର ଚୁପ୍ ବସିବ ନାହିଁ ବୋଲି ଲେଖିବା ସହ କ୍ୟାଣ୍ଟିନକୁ ପୁଣି ଥରେ ଖୋଲିବା ପାଇଁ ଦାବି କରିଛନ୍ତି ଏନ୍. ଚନ୍ଦ୍ରବାବୁ ନାଇଡୁ ।
ସୂଚନା ମୁତାବକ, ଆନ୍ନା କ୍ୟାଣ୍ଟିନ ୫ଟଙ୍କାରେ ଲୋକଙ୍କୁ ଖାଦ୍ୟ ଯୋଗାଉଥିବା ବେଳେ ୧୫ଟଙ୍କାରେ ଲୋକେ ଦିନକୁ ତିନି ଓଳି ଖାଇବାକୁ ପାଉଥିଲେ । ସକାଳେ ୫ଟଙ୍କାରେ ଇଟିଲି, ଉପମା, ପୋଙ୍ଗଲ ଦିଆଯାଉଥିବା ବେଳେ ମଧ୍ୟାହ୍ନ ଓ ରାତ୍ରି ଭୋଜନରେ ଭାତ, ଡ଼ାଲି, ତରକାରି, ସାମ୍ବର, ଦହି ଓ ଖଟା ଦିଆଯାଉଥିଲା । ପ୍ରତିଦିନ ଆନ୍ନା କ୍ୟାଣ୍ଟିନ ୬ଲକ୍ଷ ଲୋକଙ୍କ ପାଇଁ ଖାଇବା ତିଆରି କରୁଥିଲା ।