ତୁମର ଉଦୟପୁର, ଆମର ଜୟପୁର: ରାଜସ୍ଥାନରେ କଂଗ୍ରେସ ଓ ବିଜେପିର ହାଇପ୍ରୋଫାଇଲ ବୈଠକ
ଜୟପୁର: ରାଜସ୍ଥାନର ଉଦୟପୁରରେ କଂଗ୍ରେସ ମେ ୧୩ ରୁ ୧୫ ପର୍ଯ୍ୟନ୍ତ ଏକ ଚିନ୍ତନ ଶିବିର ଆୟୋଜନ କରିବାକୁ ଯାଉଛି, ଯେଉଁଥିରେ ପାଞ୍ଚଟି ରାଜ୍ୟ ନିର୍ବାଚନରେ ପରାଜୟ ବିଷୟରେ ଆଲୋଚନା ହେବ। ଏହା ବ୍ୟତୀତ ଭବିଷ୍ୟତର ରାଜନୈତିକ ରୋଡମ୍ୟାପ ପ୍ରସ୍ତୁତ ହେବ। ୪୦୦ ଜଣ କଂଗ୍ରେସ ନେତା ଏହି ଶିବିରରେ ଯୋଗଦେବାକୁ ଯାଉଛନ୍ତି। ତେବେ କଂଗ୍ରେସର ଚିନ୍ତନ ଶିବିର ପରେ ରାଜସ୍ଥାନରେ ଆଉ ଏକ ବଡ ବୈଠକ ହେବାକୁ ଯାଉଛି | ରାଜସ୍ଥାନର ରାଜଧାନୀ ଜୟପୁରରେ ମେ ୨୦ ଏବଂ ୨୧ ରେ ବିଜେପି ଏକ ଜାତୀୟ ସ୍ତରୀୟ ବୈଠକ ଆୟୋଜନ କରିବାକୁ ନିଷ୍ପତ୍ତି ନେଇଛି। ଏହି ବୈଠକରେ ବିଜେପିର ରାଷ୍ଟ୍ରୀୟ କାର୍ଯ୍ୟକାରିଣୀର ପଦାଧିକାରୀଙ୍କ ସମେତ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଯୋଗ ଦେବେ |
Sambad is now on WhatsApp
Join and get latest news updates delivered to you via WhatsApp
ସୂତ୍ରରୁ ପ୍ରକାଶ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭିଡିଓ କନଫରେନ୍ସ ଜରିଆରେ ଏହି ବୈଠକକୁ ସମ୍ବୋଧିତ କରିବେ। ଏହି ବୈଠକରେ ସମସ୍ତ ରାଜ୍ୟର ବିଜେପି ସଭାପତିଙ୍କ ସହ ୬୦୦ରୁ ଉର୍ଦ୍ଧ୍ବ କାର୍ଯ୍ୟକର୍ତ୍ତା ମଧ୍ୟ ଯୋଗ ଦେବେ | ସୂଚନା ମୁତାବକ ଆସନ୍ତା ବର୍ଷ ମଧ୍ୟଭାଗରେ ରାଜସ୍ଥାନରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ଏଭଳି ପରିସ୍ଥିତିରେ ଉଭୟ ଦଳର ବ ବୈଠକ ବର୍ତ୍ତମାନଠାରୁ ରାଜନୈତିକ ତାତିକୁ ବଢାଇବ |
ଅନ୍ୟପଟେ ଉଦୟପୁରରେ ହେବାକୁ ଥିବା ତିନି ଦିନିଆ ଚିନ୍ତନ ଶିବିର ପାଇଁ ପ୍ରସ୍ତୁତି ଶେଷ କରିବାକୁ କଂଗ୍ରେସର ସାଧାରଣ ସମ୍ପାଦକ କେ.ସି ଭେନୁଗୋପାଲ ଏବଂ ରାଜ୍ୟ ଦାୟିତ୍ୱରେ ଥିବା ଅଜୟ ମାକେନ୍ ବୁଧବାର ଉଦୟପୁରରେ ପହଞ୍ଚିଛନ୍ତି। ସୂଚନାଯୋଗ୍ୟ ଯେ ପ୍ରାୟ ନଅ ବର୍ଷ ପରେ ରାଜସ୍ଥାନରେ କଂଗ୍ରେସର ଚିନ୍ତନ ଶିବିର ଆୟୋଜିତ ହେଉଛି। ଏହାପୂର୍ବରୁ ୨୦୧୩ ରେ ଜୟପୁରରେ ଦଳର ଏକ ଶିବିର ଅନୁଷ୍ଠିତ ହୋଇଥିଲା ଯେଉଁଥିରେ ରାହୁଲ ଗାନ୍ଧୀଙ୍କୁ ଦଳର ଉପ-ସଭାପତି କରାଯାଇଥିଲା।