ନୂଆଦିଲ୍ଲୀ : ଓ୍ବେବ୍ ପୋର୍ଟାଲ୍ ‘ଦି ଓ୍ବେୟାର’ର ପ୍ରତିଷ୍ଠାତା ସିଦ୍ଧାର୍ଥ ବରଦରାଜନ ଓ ପ୍ରତିଷ୍ଠାତା ସଂପାଦକ ଏମକେ ବେଣୁଙ୍କ ଘରେ ଦିଲ୍ଲୀ ପୁଲିସ ଚଢଉ କରିଛି । ଏହି ପୋର୍ଟାଲ ବିରୋଧରେ ବିଜେପିର ଆଇଟି ସେଲ ମୁଖ୍ୟ ଅମିତ ମାଲବ୍ୟ ଅଭିଯୋଗ କରିବା ପରେ ଦିଲ୍ଲୀ ପୁଲିସ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି । ନିଜ ଅଭିଯୋଗରେ ମାଲବ୍ୟ ଅଭିଯୋଗ କରିଥିଲେ ଯେ ତାଙ୍କ ଭାବମୂର୍ତ୍ତି କ୍ଷୁର୍ଣ୍ଣ କରିବାକୁ ଦି ଓ୍ବେୟାର ପକ୍ଷରୁ ଜାଲ ତଥ୍ୟ ବ୍ୟବହାର କରି ଖବର ପ୍ରକାଶ କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ମାଲବ୍ୟ ଗତ ଶନିବାରଦିନ ଏହି ପୋର୍ଟାଲ ବିରୋଧରେ ଅପରାଧିକ ଷଡ଼ଯନ୍ତ୍ର, ଠକାମି ଆଦି ଅଭିଯୋଗ ଲଗାଯାଇ ଏକ ମାମଲା ରୁଜ୍ଜୁ କରିଥିଲେ ।
କିଛି ଦିନ ପୂର୍ବେ ଦି ଓ୍ବେୟାରରେ ଏକ ରିପୋର୍ଟ ପ୍ରକାଶ ପାଇଥିଲା ଯେ ମେଟା (ପୂର୍ବର ଫେସବୁକ) ପକ୍ଷରୁ ମାଲବ୍ୟଙ୍କୁ କେତେକ ସ୍ବତନ୍ତ୍ର କ୍ଷମତା ଦିଆଯାଇଛି, ଯଦ୍ବାରା ସେ ସରକାରୀ ବିରୋଧୀ ପୋଷ୍ଟକୁ ହଟାଇପାରୁଛନ୍ତି ।
କିନ୍ତୁ ମେଟା ପକ୍ଷରୁ ଏହି ଖବରରେ ସତ୍ୟନା ନାହିଁ ବୋଲି କୁହାଯାଇଥିଲା । ଏହା ପରେ ଓ୍ବେୟାର ପକ୍ଷରୁ କେତେକ ଇ-ମେଲର ସ୍କ୍ରିନସଟ୍ ଜାରି କରି ନିଜ ଖବରକୁ ଠିକ ବୋଲି ପ୍ରମାଣିକ କରିବାକୁ ଚେଷ୍ଟା କରାଯାଇଥିଲା । ତେବେ ଏସବୁକୁ ମେଟା ଖଣ୍ଡନ କରିଥିଲା । ପରେ ଜଣା ପଡ଼ିଥିଲା ଯେ ଉକ୍ତ ପୋର୍ଟାଲ ପକ୍ଷରୁ ତଥ୍ୟ ପ୍ରମାଣକୁ ଜାଲ କରି ଏସବୁ ଖବର ପ୍ରକାଶ ପାଇଥିଲା ।