ଫିନଲାଣ୍ଡର ଲୋକ ପୃଥିବୀରେ ସବୁଠୁ ଅଧିକ ଖୁସି, ଭାରତର ସ୍ଥାନ ୧୩୬ରେ
ନୂଆଦିଲ୍ଲୀ: ସଂଯୁକ୍ତ ରାଷ୍ଟ୍ରର ‘ବାର୍ଷିକ ହେପିନେସ୍ ଇଣ୍ଡେକ୍ସ’ ଅନୁସାରେ ଫିନଲାଣ୍ଡ ଲଗାତାର ପଞ୍ଚମ ବର୍ଷ ପାଇଁ ପୃଥିବୀର ସବୁଠାରୁ ସୁଖୀ ଦେଶର ମାନ୍ୟତା ଲାଭ କରିଛି। ଆଫଗାନିସ୍ତାନ ସୁଖୀ ଦେଶ ତାଲିକାରେ ସବୁଠୁ ପଛରେ ରହିଛି।
Sambad is now on WhatsApp
Join and get latest news updates delivered to you via WhatsApp
ଡେନମାର୍କ, ଆଇସଲ୍ୟାଣ୍ଡ, ସ୍ଵିଜରଲ୍ୟାଣ୍ଡ ଓ ନେଦରଲାଣ୍ଡ ସୁଖୀ ଦେଶ ତାଲିକାରେ ପ୍ରଥମ ୫ଟି ସ୍ଥାନ ମଧ୍ୟରେ ଅଛନ୍ତି। ଆମେରିକା ୧୬ ଓ ବ୍ରିଟେନ ୧୭ତମ ସ୍ଥାନରେ ଅଛନ୍ତି। ଏହି ତାଲିକାରେ ଭାରତର ସ୍ଥାନ ୧୩୬। ଗତବର୍ଷ ଭାରତର ନମ୍ବର ୧୩୯ ଥିଲା। ଅର୍ଥାତ୍ ଭାରତ ଏହି ତାଲିକାରେ ୩ଟି ସ୍ଥାନ ଆଗକୁ ଯାଇଛି। ଶୁକ୍ରବାର ଜାରି ହୋଇଥିବା ଏହି ତାଲିକା ଅନୁସାରେ ସର୍ବିଆ, ବୁଲଗେରିଆ ଓ ରୋମାନିଆ ଉନ୍ନତ ଜୀବନ ବିତାଇବା ମାମଲାରେ ସବୁଠୁ ଅଧିକ ଉନ୍ନତି କରିଛନ୍ତି। ଅନ୍ୟପକ୍ଷରେ ଏହି ତାଲିକାରେ ସବୁଠୁ ଅଧିକ ଅବନତି ଲେବାନନ, ଭେନେଜୁଏଲା ଓ ଆଫଗାନିସ୍ତାନ କରିଛନ୍ତି।
ଏହି ତାଲିକା ଏବେ ପ୍ରକାଶ କରାଯାଇଛି; କିନ୍ତୁ ଏହି ତାଲିକା ଋଷ-ୟୁକ୍ରେନ ଯୁଦ୍ଧ ଆରମ୍ଭ ହେବା ପୂର୍ବରୁ ପ୍ରସ୍ତୁତ କରାଯାଇଥିଲା। ସେଥିପାଇଁ ଋଷର ସ୍ଥାନ ୮୦ ଥିବା ବେଳେ ୟୁକ୍ରେନ ୯୮ତମ ସ୍ଥାନରେ ଅଛି। ଏହି ତାଲିକା ପ୍ରସ୍ତୁତ କରିବା ପାଇଁ ଖୁସି ସହିତ ଆର୍ଥିକ ଓ ସାମାଜିକ ପରିସଂଖ୍ୟାନକୁ ବି ଦେଖାଯାଇଥାଏ। ଏଥିରେ ତିନି ବର୍ଷର ହାରାହାରି ତଥ୍ୟକୁ ଆଧାର କରି ଖୁସିକୁ ୦ ରୁ ୧୦ ପର୍ଯ୍ୟନ୍ତ ନମ୍ବର ଦିଆଯାଇଥାଏ। ଲୋକଙ୍କ ଭାବନାର ତୁଳନା କରିବା ପାଇଁ ସୋସିଆଲ ମଡିଆରୁ ତଥ୍ୟ ମଧ୍ୟ ନିଆଯାଇଛି।