ନୂଆଦିଲ୍ଲୀ : ଦିଲ୍ଲୀ ଦଙ୍ଗାବେଳେ ପୁଲିସ ଉପରକୁ ଗୁଳି ଚଳାଇଥିବା ଶାହରୁଖ୍ ପଠାନକୁ ଆଜି ଉତ୍ତରପ୍ରଦେଶର ବରେଲିରୁ ଗିରଫ କରାଯାଇ ଦିଲ୍ଲୀ ଅଣାଯାଇଛି । ତାକୁ ଜେରା ବେଳେ କେତେକ ଗୁରୁତ୍ୱପୂର୍ଣ୍ଣ କଥା ଜଣାପଡ଼ିଛି । ସେ କହିଛି ଯେ ହିଂସା ବେଳେ ସେ ରାଗିଯାଇଥିଲା ଓ ଗୁଳି ଚଳାଇବା ଆରମ୍ଭ କରିଦେଇଥିଲା । ଏହି ଗୁଳିଚଳାଇବା ପରେ ସେ କିଛି ଦିନ ଦିଲ୍ଲୀରେ ଥିଲା ଓ ତାପରେ ସେ ପଞ୍ଜାବ ପଳାଇଯାଇଥିଲା ଓ ସେଠାରେ ନିଜର ଜଣେ ସାଙ୍ଗ ଘରେ ରହିଥିଲା । ଏହା ପରେ ସେ ଉତ୍ତରପ୍ରଦେଶର ବରେଲି ଓ ନିକଟସ୍ଥ ସାମଲି ପଳାଇଯାଇ ସେଠାରେ ଲୁଚିଥିଲା । ତା ନାଁରେ ପୂର୍ବରୁ କୌଣସି ଅପରାଧିକ ମାମଲା ନାହିଁ । କିନ୍ତୁ ତା ବାପା ପୂର୍ବରୁ ଥରେ କୌଣସି ଏକ ଅପରାଧରେ ଗିରଫ ହୋଇଥିଲେ । ବନ୍ଧୁକ କେବଳ ଅନ୍ୟମାନଙ୍କୁ ଡରାଇବା ପାଇଁ କିଣିଥିଲା ବୋଲି ସେ କହିଛି ।
Sambad is now on WhatsApp
Join and get latest news updates delivered to you via WhatsApp
ଗତ ଫେବ୍ରୁଆରୀ ୨୪ର ଦିଲ୍ଲୀର ମୌଜପୁରରେ ଦଙ୍ଗାବେଳେ ସେ ଜଣେ ପୁଲିସ କର୍ମଚାରୀ ଦିପକ ଦହିୟାଙ୍କୁ ବନ୍ଧୁକ ଦେଖାଇବା ସହ ୮ ରାଉଣ୍ଡ ଗୁଳିଚାଳନା କରିଥିଲା । ଏହି ଘଟଣା ଘଟାଇ ସେ ଫେରାର ହୋଇଯାଇଥିଲା । ଏପରିକି ତା ପରିବାର ମଧ୍ୟ ଫେରାର ହୋଇଯାଇଥିଲା । ମିଳିଥିବା ସୂଚନା ଅନୁସାରେ ସେ ପ୍ରଥମେ ହରିୟାଣା ଓ ତାପରେ ଉତ୍ତରପ୍ରଦେଶରେ ଆତ୍ମଗୋପନ କରିଥିଲା । ତାକୁ ଗିରଫ କରିବା ପାଇଁ ପୁଲିସ ଉପରେ ସବୁଆଡ଼ୁ ଚାପ ପଡ଼ୁଥିଲା । ଗତ କାଲି ଦିଲ୍ଲୀ ପୁଲିସର ଏକ ସ୍ୱତନ୍ତ୍ର ଦଳ ପଶ୍ଚିମ ଉତ୍ତରପ୍ରଦେଶର ବିଭିନ୍ନ ସହରରେ ଚଢଉ କରିଥିଲା । ଅନ୍ୟପକ୍ଷରେ ଦିଲ୍ଲୀରେ ଥିବା ତା’ଘରୁ ବିପୁଳ ପରିମାଣରେ ଆପତ୍ତିଜନକ କାଗଜପତ୍ର ଓ ଲେଖା ଜବତ ହୋଇଛି ।