ଆସାମ ତୈଳକୂପରେ ଲାଗିଥିବା ନିଆଁ ଲିଭାଇବାକୁ ମାସେ ଲାଗିବ : ସିଂଗାପୁର ବିଶେଷଜ୍ଞ ଦଳ
ଗୁଆହାଟୀ : ଆସାମର ତିନସୁକିଆ ଜିଲ୍ଲାରେ ଥିବା ବାଗଜାନ ତୈଳ କୂପରେ ଲାଗିଥିବା ନିଆଁର ପ୍ରକୋପ କମିଥିଲେ ମଧ୍ୟ ଏହାକୁ ନିୟନ୍ତ୍ରଣ କରିବାକୁ ପ୍ରାୟ ଏକ ମାସ ସମୟ ଲାଗିବ ବୋଲି ସିଂଗାପୁରରୁ ଆସିଥିବା ବିଶେଷଜ୍ଞ ଦଳ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ମେ ୨୭ରେ ତୈଳକୂପର ପ୍ରେସର କଣ୍ଟ୍ରୋଲ ସିଷ୍ଟମ ବିଫଳ ହେବାରୁ ଏଥିରୁ ତୈଳ ନିର୍ଗତ ହେବା ଆରମ୍ଭ କରିଥିଲା । ଏହି ତୈଳକୂପରେ ହୋଇଥିବା ଛିଦ୍ରକୁ ମରାମତି କରିବାକୁ ଅଏଲ ଇଣ୍ଡିଆ ପକ୍ଷରୁ ସିଂଗାପୁରର ଏକ କମ୍ପାନି ଆଲର୍ଟ ଡିଜାଷ୍ଟର କଣ୍ଟ୍ରୋଲକୁ ଦାୟିତ୍ୱ ଅର୍ପଣ କରିଛି । ସିଂଗାପୁର କମ୍ପାନିର ବିଶେଷଜ୍ଞ ଟିମ ଗତ ସୋମବାରଦିନ ଆସାମର ଦୁଲିଆଜାନ ଟାଉନରେ ପହଞ୍ଚଥିଲେ ।
ମଙ୍ଗଳବାରଦିନ ତୈଳକୂପରେ ଲାଗିଥିବା ନିଆଁ ଏତେ ତୀବ୍ର ଥିଲା ଯେ ପ୍ରାୟ ୨-୩ କିଲୋମିଟର ଦୂରରୁ ନିଆଁର ଶିଖା ଦେଖାଯାଉଛି ବୋଲି ପ୍ରତ୍ୟକ୍ଷଦର୍ଶୀମାନେ କହିଛନ୍ତି । ନିଆଁ ଲାଗିବା ପରେ ପ୍ରଶାସନ ପକ୍ଷରୁ ସ୍ଥାନୀୟ ଲୋକମାନଙ୍କୁ ସୁରକ୍ଷିତ ସ୍ଥାନକୁ ନିଆଯାଇଛି ।
ଏହି ନିଆଁ ଏବେ ବି ଜାରି ରହିଥିବାରୁ ସ୍ଥାନୀୟ ଦିବ୍ରୁ-ସାଇଖୋଓ୍ଵା ଜାତୀୟ ପାର୍କ ପ୍ରତି ବିପଦ ସୃଷ୍ଟି ହୋଇଛି । ଏହି ନିଆଁ ତାପରେ ଅନେକ ପଶୁପକ୍ଷୀ ମରି ପଡ଼ିଥିବା ଦେଖାଯାଇଛି । ଏହାର ପ୍ରଭାବରେ ସ୍ଥାନୀୟ ଜଙ୍ଗଲ ଓ ଘରଦ୍ବାର ପୋଡି ପାଉଁଶ ହୋଇଯାଇଥିବା ଜଣାପଡ଼ିଛି । ଏହାକୁ ନେଇ ପରିବେଶବିତମାନେ ଚିନ୍ତା ପ୍ରକଟ କରିଛନ୍ତି ।