ଭାରତରେ କରୋନାଭାଇରସ୍: ୩୦ ରାଜ୍ୟ ଓ କେନ୍ଦ୍ରସାଶିତ ଅଞ୍ଚଳ ଲକଡାଉନ୍; ଆକ୍ରାନ୍ତଙ୍କ ସଂଖ୍ୟା ୪୯୯ରେ ପହଞ୍ଚିଲା
ନୂଆଦିଲ୍ଲୀ: କରୋନାଭାଇରସ୍ ବ୍ୟାପିବା କାରଣରୁ ସତର୍କତା ସ୍ବରୂପ ଭାରତର ୩୦ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଲକଡାଉନ୍ କରାଯାଇଛି । ଦେଶର ସମୁଦାୟ ୫୪୮ଟି ଜିଲ୍ଲାକୁ ଲକଡାଉନ ଅନ୍ତର୍ଭୁକ୍ତ କରାଯାଇଛି । କିନ୍ତୁ ତିନିଟି ରାଜ୍ୟ/କେନ୍ଦ୍ରଶାସିତ ଅଞ୍ଚଳର ନିର୍ଦ୍ଦିଷ୍ଟ କେତେକ ସ୍ଥାନରେ ଲକଡାଉନ୍ ଘୋଷଣା ହୋଇଛି । ସେଗୁଡ଼ିକ ମଧ୍ୟରେ ପ୍ରାୟ ୫୮ଟି ଜିଲ୍ଲା ରହିଛି।
Sambad is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନା ଅନୁସାରେ, ସମଗ୍ର ଦେଶରେ କରୋନାଭାଇରସ୍ ଆକ୍ରାନ୍ତଙ୍କ ସଂଖ୍ୟା କ୍ରମଶଃ ବୃଦ୍ଧି ପାଇବାରେ ଲାଗିଛି । ସୋମବାର ଦିନ ୯୯ଟି ନୂଆ ସଂକ୍ରମଣ ମାମଲା ରେକର୍ଡ କରାଯାଇଛି । ଏପର୍ଯ୍ୟନ୍ତ ଦେଶରେ ଏହା ହେଉଛି ଗୋଟିଏ ଦିନରେ ସର୍ବାଧିକ ସଂକ୍ରମଣ । ଏହାକୁ ମିଶାଇ ସମଗ୍ର ଦେଶରେ କରୋନାଭାଇରସ୍ ଆକ୍ରାନ୍ତଙ୍କ ସଂଖ୍ୟା ୪୯୯ରେ ପହଞ୍ଚିଛି । ଏମାନଙ୍କ ମଧ୍ୟରେ ୪୦ଜଣ ବିଦେଶୀ ନାଗରିକ ଥିବା ସ୍ୱାସ୍ଥ୍ୟ ମନ୍ତ୍ରାଳୟ ସୂତ୍ରରୁ ପ୍ରକାଶ ।
ସୋମବାର ଠାରୁ ପଞ୍ଜାବ, ମହାରାଷ୍ଟ୍ର ଏବଂ ପୁଡୁଚେରୀରେ କର୍ଫ୍ୟୁ ଜାରି ହୋଇଛି । ଲକଡାଉନ ଉଲ୍ଲଂଘନ କରି ପ୍ରଥମ ଦିନରେ ସମଗ୍ର ଦେଶରେ ବହୁ ବ୍ୟକ୍ତି ଗିରଫ ହୋଇଛନ୍ତି । ପଞ୍ଜାବ, ଉତ୍ତର ପ୍ରଦେଶ, ରାଜସ୍ଥାନ ଏବଂ ମଧ୍ୟପ୍ରଦେଶରେ ପୁଲିସ ଉଲ୍ଲଂଘନକାରୀଙ୍କ ଫଟୋ ସାମାଜିକ ଗଣମାଧ୍ୟମରେ ପ୍ରସାରଣ କରିଛି । ଏଥିସହ ପୁଲିସ ଏକ ବାର୍ତ୍ତା ଦେଇ ଲେଖିଛି ଏମାନେ ଘରେ ରହୁ ନ ଥିବାରୁ ସମାଜର ବିରୁଦ୍ଧାଚରଣ କରୁଛନ୍ତି । ହରିୟାଣା ଓ ରାଜସ୍ଥାନରେ ପୁଲିସ କେତେକ ଉଲ୍ଲଂଘନକାରୀଙ୍କ ଗାଡ଼ି ଜବତ କରିଛି । ଲୋକେ ପ୍ରକୃତରେ କୌଣସି ଜରୁରୀ କାମରେ ବାହାରକୁ ଯାଉଛନ୍ତି କି, ନାହିଁ ପରଖିବାକୁ ବିଭିନ୍ନ ସ୍ଥାନରେ ବେରିକେଡ୍ କରା ଯାଇଛି । କେବଳ ଅତ୍ୟାବଶ୍ୟକ ସାମଗ୍ରୀ ଖରିଦ କରିବା ପାଇଁ ଲୋକମାନଙ୍କୁ ବଜାରକୁ ଛଡ଼ାଯାଉଛି ।