ପାକିସ୍ତାନ ଜେଲରେ ଭାରତୀୟ ମତ୍ସ୍ୟଜୀବୀଙ୍କ ମୃତ୍ୟୁ; କାରଣ ଅଜ୍ଞାତ

ନୂଆଦିଲ୍ଲୀ: ଏକ ବର୍ଷ ପୂର୍ବେ ସମୁଦ୍ର ମଧ୍ୟରୁ ପାକିସ୍ତାନୀ କର୍ତ୍ତୃପକ୍ଷଙ୍କ ଦ୍ୱାରା ଗିରଫ ହୋଇଥିବା ଗୁଜୁରାଟର ଜଣେ ୫୦ ବର୍ଷୀୟ ମତ୍ସ୍ୟଜୀବୀଙ୍କର ଅଜ୍ଞାତ କାରଣରୁ ପାକିସ୍ତାନର ଏକ ଜେଲରେ ମୃତ୍ୟୁ ଘଟିଛି।

ସୋମବାର ଜଣେ ଅଧିକାରୀ କହିଛନ୍ତି ମୃତକଙ୍କ ନାମ ଜୟନ୍ତୀ ସୋଲାଙ୍କି ଏବଂ ସେ ଗୁଜୁରାଟ ଗିର-ସୋମନାଥ ଜିଲ୍ଲାର ସୁଟ୍ରାପାଡା ଗାଁର ବାସିନ୍ଦା। କିଛି ସପ୍ତାହ ପୂର୍ବରୁ ତାଙ୍କର ମୃତ୍ୟୁ ହୋଇଥିଲା କିନ୍ତୁ ରବିବାର ଦିନ ସ୍ଥାନୀୟ କର୍ତ୍ତୃପକ୍ଷ ଏହି ସୂଚନା ପାଇଥିଲେ ବୋଲି ଅଧିକାରୀ କହିଛନ୍ତି।

ଭେରାଭାଲର ଗୁଜୁରାଟ ମତ୍ସ୍ୟ ବିଭାଗର ଏକ ଦଳ ମତ୍ସ୍ୟଜୀବୀଙ୍କ ମୃତଦେହ ଗ୍ରହଣ କରିବା ପାଇଁ ପଞ୍ଜାବର ୱାଘା-ଅଟାରୀ ସୀମାରେ ପହଞ୍ଚିଛନ୍ତି ବୋଲି ମତ୍ସ୍ୟ ଅଧିକାରୀ ବିଶାଲ ଗୋହେଲ କହିଛନ୍ତି। ‘ଆମ ଦଳ ଅଟାରୀ-ୱାଘା ସୀମାରେ ପହଞ୍ଚିସାରିଛି। ଆମେ ଆଶା କରୁଛୁ ଯେ ଆଜି ରାତି ସୁଦ୍ଧା ମୃତଦେହ ଆମକୁ ହସ୍ତାନ୍ତର କରାଯିବ। ମୃତ ମତ୍ସ୍ୟଜୀବୀଙ୍କ ପାର୍ଥିବ ଶରୀରକୁ ଏଠାକୁ ଫେରାଇ ଅଣାଯିବ ଏବଂ ସୁଟ୍ରାପାଡାରେ ପରିବାର ସଦସ୍ୟଙ୍କୁ ହସ୍ତାନ୍ତର କରାଯିବ ବୋଲି ଗୋହେଲ କହିଛନ୍ତି। ପାକିସ୍ତାନରେ ଥିବା ଭାରତୀୟ ଦୂତାବାସରୁ ସୋଲାଙ୍କିଙ୍କ ମୃତ୍ୟୁ ବିଷୟରେ ଜାଣିବା ପରେ, କେନ୍ଦ୍ର ସରକାର ଗୁଜୁରାଟ ମତ୍ସ୍ୟ ବିଭାଗକୁ ପରବର୍ତ୍ତୀ ପ୍ରକ୍ରିୟା ଗ୍ରହଣ କରିବାକୁ କହିଥିଲେ ବୋଲି ସେ କହିଛନ୍ତି।

ପ୍ରାଥମିକ ଅନୁସନ୍ଧାନରୁ ଜଣାପଡିଛି ଯେ ସୋଲାଙ୍କି କେନ୍ଦ୍ର ଶାସିତ ଅଞ୍ଚଳ ଦିଉ ଏବଂ ଦମନ ଏବଂ ଦାଦ୍ରା ଏବଂ ନଗର ହାଭେଲିର ଭାନାକବରଗାଁର ମୂଳ ବାସିନ୍ଦା ଥିଲେ। ଗୋହେଲ କହିଛନ୍ତି ଯେ ତାଙ୍କୁ ଏକ ବର୍ଷ ପୂର୍ବେ ପାକିସ୍ତାନ ସାମୁଦ୍ରିକ ସୁରକ୍ଷା ଏଜେନ୍‌ସି (ପିଏମଏସଏ) ଦ୍ୱାରା ଆରବ ସାଗରର ଆଇଏମବିଏଲ (ଆନ୍ତର୍ଜାତୀୟ ସାମୁଦ୍ରିକ ସୀମା ରେଖା) ନିକଟରେ ଗିରଫ କରାଯାଇଥିଲା ଯେତେବେଳେ ସେ ଅନ୍ୟ ମତ୍ସ୍ୟଜୀବୀମାନଙ୍କ ସହ ରସୁଲ ସାଗର ଡଙ୍ଗାରେ ଥିଲେ।

ଯଦିଓ ସୋଲାଙ୍କି ଭାନାକବରର ମୂଳ ବାସିନ୍ଦା ଥିଲେ, ସେ ଗତ ଅନେକ ବର୍ଷ ଧରି ସୁଟ୍ରାପାଡାରେ ତାଙ୍କ ପରିବାର ଏବଂ ଶାଶୁଘର ଲୋକଙ୍କ ସହ ରହୁଥିଲେ। ସେ ଗତ ବର୍ଷ ଠାରୁ ପାକିସ୍ତାନୀ ଜେଲରେ ବନ୍ଦୀ ଥିଲେ। କିଛି ସପ୍ତାହ ପୂର୍ବରୁ ତାଙ୍କର ମୃତ୍ୟୁ ହୋଇଥିବାବେଳେ ଆମେ କେବଳ ଗତକାଲି (ରବିବାର) ସୂଚନା ପାଇଥିଲୁ। ତାଙ୍କ ମୃତ୍ୟୁର କାରଣ ଏପର୍ଯ୍ୟନ୍ତ ଆମ ପାଇଁ ଅଜ୍ଞାତ ରହିଛି ବୋଲି ଗୋହେଲ କହିଛନ୍ତି।