ବେଙ୍ଗାଲୁରୁ ଓ ମହୀଶୂରରେ ଜମାତ- ଉଲ -ମୁଜାହିଦ୍ଦିନ ଆତଙ୍କବାଦୀଙ୍କ ସନ୍ଦିଗ୍ଧ ଗତିବିଧି ଜାରି ରହିଥିବା କହିଲେ କର୍ଣ୍ଣାଟକର ଗୃହ ମନ୍ତ୍ରୀ
ମହୀଶୂର: କର୍ଣ୍ଣାଟକର ରାଜ୍ୟ ଗୃହ ମନ୍ତ୍ରୀ ବାସବରାଜ ବୋମ୍ମାଇ କହିଛନ୍ତି ଯେ, ରାଜ୍ୟର ବେଙ୍ଗାଲୁରୁ ଓ ମହୀଶୂରରେ ଜମାତ- ଉଲ -ମୁଜାହିଦ୍ଦିନ ସହ ଜଡ଼ିତ ଆତଙ୍କବାଦୀଙ୍କ ସନ୍ଦିଗ୍ଧ ଗତିବିଧି ଜାରି ରହିଛି। ସେମାନେ କର୍ଣ୍ଣାଟକର ଉପକୂଳବର୍ତ୍ତୀ ଓ ରାଜ୍ୟର କିଛି ଆଭ୍ୟନ୍ତରୀଣ ଅଞ୍ଚଳରେ ବି ସକ୍ରିୟ ଥିବା ସେ ଜଣାଇଛନ୍ତି। ଆତଙ୍କବାଦୀଙ୍କ ସ୍ଲିପର ସେଲ୍ ବି କର୍ଣ୍ଣାଟକରେ ସକ୍ରିୟ ଅଛନ୍ତି ବୋଲି ବୋମ୍ମାଇ ମହୀଶୂରରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ।
ତେଣୁ ଏନଆଇଏ ରାଜ୍ୟ ସରକାରଙ୍କୁ ଏନେଇ ସତର୍କ ରହିବାକୁ ପରାମର୍ଶ ଦେଇଥିବା ମନ୍ତ୍ରୀ କହିଛନ୍ତି। ଜମାତ- ଉଲ -ମୁଜାହିଦ୍ଦିନର ଗତିବିଧି କେବଳ କର୍ଣ୍ଣାଟକ ନୁହଁ ବରଂ ବଙ୍ଗୋପସାଗର ଓ ଆରବ ସାଗର ପର୍ଯ୍ୟନ୍ତ ରହିଥିବା ଏନଆଇଏ ଚେତାଇ ଦେଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଜାତୀୟ ତଦନ୍ତକାରୀ ଏଜେନ୍ସି(ଏନଆଇଏ)ର ପ୍ରମୁଖ ଓ୍ଵାଇସି ମୋଦୀ କିଛି ଦିନ ତଳେ କହିଥିଲେ ଯେ, ଜମାତ- ଉଲ- ମୁଜାହିଦ୍ଦିନ ବାଂଲାଦେଶ (ଜେଏମବି) ଭାରତରେ ନିଜର କାୟା ବିସ୍ତାର କରିବାକୁ ଉଦ୍ୟମ କରୁଛି। ୧୨୫ ସନ୍ଦିଗ୍ଧ ଆତଙ୍କବାଦୀଙ୍କ ସୂଚୀ ବିଭିନ୍ନ ରାଜ୍ୟକୁ ପ୍ରଦାନ କରାଯାଇଛି।