ତିରୁବନନ୍ତପୁରମ୍: ରାଜ୍ୟର ସମସ୍ତ ସରକାରୀ ବିଶ୍ବବିଦ୍ୟାଳୟର କୁଳାଧିପତି ପଦରୁ ରାଜ୍ୟପାଳ ଆରିଫ୍ ମହମ୍ମଦ୍ ଖାଁଙ୍କୁ ହଟାଇବା ଲାଗି ଅଧ୍ୟାଦେଶ ଆଗତ କରିବା ଲାଗି କେରଳ ସରକାର ଆଜି ସ୍ଥିର କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ର ପିନରାୟି ବିଜୟନ୍ଙ୍କ ଅଧ୍ୟକ୍ଷତାରେ ଆଜି ଆୟୋଜିତ କ୍ୟାବିନେଟ୍ ବୈଠକରେ ଉପରୋକ୍ତ ନିଷ୍ପତ୍ତି ଗ୍ରହଣ କରାଯାଇଛି। ଏହାଛଡ଼ା, କୁଳାଧିପତି ପଦବୀ ନିମନ୍ତେ ଶିକ୍ଷା କ୍ଷେତ୍ରରୁ ଜଣେ ବିଶେଷଜ୍ଞଙ୍କୁ ଆଣିବା ପାଇଁ ମଧ୍ୟ କେରଳ ସରକାର ଯୋଜନା ଚଳାଇଛନ୍ତି।
ବିଶ୍ବବିଦ୍ୟାଳୟ ସମୂହର କୁଳାଧିପତି ହୋଇଥିବା ରାଜ୍ୟପାଳ ଆରିଫ୍ ମହମ୍ମଦ୍ ଖାଁ ୧୧ଟି ବିଶ୍ବବିଦ୍ୟାଳୟର କୁଳପତିମାନଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଥିଲେ। ଉକ୍ତ ନୋଟିସ୍କୁ ବେଆଇ ଓ ମୂଲ୍ୟହୀନ ଦାବି କରି କୁଳପତିମାନେ ଅଦାଲତଙ୍କ ଦ୍ବାରସ୍ଥ ହୋଇଥିଲେ।
ସୁପ୍ରିମ୍ କୋର୍ଟଙ୍କ ରାୟ ଅନୁସାରେ ସେମାଙ୍କ ନିଯୁକ୍ତି ବେଆଇନ ହୋଇଥିବା ବେଳେ ସେମାନଙ୍କୁ କାହିଁକି ଚାକିରିରେ ରଖାଯାଇଛି ବୋଲି ଜାଣିବାକୁ ରାଜ୍ୟପାଳ କୁଳପତିମାନଙ୍କୁ ଉକ୍ତ ନୋଟିସ୍ରେ ପଚାରିଥିଲେ। କାରଣ ଦର୍ଶାଅ ନୋଟିସ ପ୍ରେରଣ କଥାରେ ରାଜ୍ୟପାଳ ଆରିଫ୍ ମହମ୍ମଦ୍ ଖାଁ ଓ ମୁଖ୍ୟମନ୍ତ୍ରୀ ପିନରାୟି ବିଜୟନ୍ଙ୍କ ମଧ୍ୟରେ ପ୍ରବଳ ଯୁକ୍ତିତର୍କ ଚାଲିଛି।
ମାମଲାର ଶୁଣାଣି ନ ହେବା ପର୍ଯ୍ୟନ୍ତ କାରଣ ଦର୍ଶାଅ ନୋଟିସ ପଠାଯାଇଥିବା କୁଳପତିମାନଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରିବା ଲାଗି ମଙ୍ଗଳବାର ଦିନ କେରଳ ହାଇକୋର୍ଟ ରାଜ୍ୟପାଳ ଆରିଫ୍ ମହମ୍ମଦ ଖାଁକୁ କହିଛନ୍ତି।