ଦଳୀୟ ସାଂସଦଙ୍କୁ ମୋଦୀଙ୍କ ନିର୍ଦ୍ଦେଶ- ଜନସଂପର୍କ ବଢାଅ, ସୋସିଆଲ ମିଡିଆ ଉପରେ ଫୋକସ କର
ନୂଆଦିଲ୍ଲୀ : ୨୦୨୪ରେ ହେବାକୁ ଥିବା ଲୋକସଭା ନିର୍ବାଚନ ଓ ଚଳିତ ବର୍ଷ ବିଭିନ୍ନ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଦେଇଛି ବିଜେପି । ଖୋଦ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ପ୍ରସ୍ତୁତିର ସମୀକ୍ଷା କରିଦେଇଛନ୍ତି । ସଂସଦର ଶୀତକାଳୀନ ଅଧିବେଶନ ଶେଷ ହେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିଜେପି ରାଜ୍ୟସଭା ସାଂସଦମାନଙ୍କ ସହ ଜଳଖିଆ ବୈଠକ କରି ଆଲୋଚନା କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟସଭାରେ ବିଜେପିର ୯୨ ସାଂସଦ ଅଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାଂସଦମାନଙ୍କୁ ରାଜ୍ୟ ଅନୁଯାୟୀ ସାକ୍ଷାତ କରିବାକୁ ଆମନ୍ତ୍ରଣ କରିଥିଲେ। ତୃଣମୂଳ ସ୍ତରରେ କାମ କରିବା, ଲୋକଙ୍କ ସହ ସଂପର୍କ ବୃଦ୍ଧି କରିବା, ସୋସିଆଲ ମିଡିଆ ଓ ଡିଜିଟାଲ ମିଡିଆରେ ନିଜର ଉପସ୍ଥିତି ଜାହିର କରିବା ସହ ଫଲୋଅର ସଂଖ୍ୟା ବଢାଇବାକୁ ମୋଦୀ ସାଂସଦମାନଙ୍କୁ ନିର୍ଦ୍ଦେଶ ଦେଇଛନ୍ତି ।
ପ୍ରଧାନମନ୍ତ୍ରୀ ମୋଦୀ ରାଜ୍ୟସଭା ସାଂସଦମାନଙ୍କୁ ନିଜ ନିଜ କ୍ଷେତ୍ରର ବିକାଶରେ ଅଂଶୀଦାର ହେବାକୁ କହିଛନ୍ତି । ନିୟମିତ ଭାବରେ କ୍ଷେତ୍ର ପରିଦର୍ଶନ କରିବାକୁ କୁହାଯାଇଛି । ସ୍ଥାନୀୟ ଲୋକମାନେ ଯେପରି ସାଂସଦଙ୍କ ପରିଦର୍ଶନ ସଂପର୍କରେ ଜାଣିପାରିବେ ତାହାର ବ୍ୟବସ୍ଥା କରିବାକୁ କୁହାଯାଇଛି ।
କେନ୍ଦ୍ର ଦ୍ୱାରା କରାଯାଇଥିବା କାର୍ଯ୍ୟକୁ ଭଲଭାବରେ ପ୍ରଚାର କରିବାର ଆବଶ୍ୟକତା ଉପରେ ମଧ୍ୟ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ଯାହାଫଳରେ ଲୋକମାନଙ୍କ ମଧ୍ୟରେ ସରକାରଙ୍କ ଉପରେ ଆତ୍ମବିଶ୍ୱାସ ସୃଷ୍ଟି କରିପାରିବେ । ସାଂସଦମାନଙ୍କୁ ମଧ୍ୟ ସବୁବେଳେ ସଂସଦରେ ଉପସ୍ଥିତ ରହିବାକୁ ଏବଂ ବିତର୍କ ଏବଂ ଆଲୋଚନା ପାଇଁ ପ୍ରସ୍ତୁତ ହେବାକୁ କୁହାଯାଇଛି।