ଭାରତରେ ଗୋଷ୍ଠୀ ସଂକ୍ରମଣ ହୋଇନି, କିନ୍ତୁ ରାଜ୍ୟମାନେ ସତର୍କ ରହିବା ଜରୁରୀ : ଆଇସିଏମଆର
ନୂଆଦିଲ୍ଲୀ : ଭାରତରେ କରୋନା ସଂକ୍ରମଣ ମାମଲା ବଢିଚାଲିଥିବା ସତ୍ତ୍ୱେ ଗୋଷ୍ଠୀ ସଂକ୍ରମଣ ହୋଇନାହିଁ ବୋଲି ଭାରତୀୟ ଭେଷଜ ଗବେଷଣା ପରିଷଦ (ଆଇସିଏମଆର) ପକ୍ଷରୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଆଇସିଏମଆରର ମହା ନିର୍ଦ୍ଦେଶକ ପ୍ରଫେସର ଡାକ୍ତର ବଳରାମ ଭାର୍ଗବ କହିଛନ୍ତି ଯେ ସଂକ୍ରମଣ ମାମଲା ବଢିଚାଲିଥିବା ସତ୍ତ୍ୱେ ଭାରତର ବିଶାଳ ଜନସଂଖ୍ୟାକୁ ଦେଖିଲେ ଗୋଷ୍ଠୀ ସଂକ୍ରମଣ ହୋଇନାହିଁ ବୋଲି କୁହାଯାଇପାରିବ । ଦେଶର ଅଧିକାଂଶ ସଂକ୍ରମଣ ମାମଲା ଅଳ୍ପ କେତୋଟି ରାଜ୍ୟ ଓ ସହରରେ ସୀମିତ ହୋଇ ରହିଛି । ତେବେ ରାଜ୍ୟମାନେ ସତର୍କତାକୁ କୋହଳ ନ କରି ପ୍ରଭାବୀ ଢଙ୍ଗରେ ଲକଡାଉନ ନିୟମାବଳୀକୁ ଲାଗୁ କରିବା ଆବଶ୍ୟକ ବୋଲି ସେ ସ୍ୱାସ୍ଥ୍ୟ ମନ୍ତ୍ରାଳୟର ସାମ୍ବାଦିକ ସମ୍ମିଳନୀ ଅବସରରେ କହିଛନ୍ତି ।
ସେ କହିଛନ୍ତି ଯେ ଭାରତରେ ପ୍ରତି ୧ ଲକ୍ଷ ଲୋକଙ୍କ ପିଛା ୨୦.୧୧ ଜଣ କରୋନା ସଂକ୍ରମିତ ହେଉଥିବାବେଳେ ବିଶ୍ୱ ସ୍ତରରେ ତାହା ୯୧.୬୭ ଅଛି । ଏଣୁ ଭାରତରେ ସଂକ୍ରମଣ ସଂଖ୍ୟା ଅତି କମ ସ୍ତରରେ ରହିଛି । ଏହା ପ୍ରମାଣିତ କରୁଛି ଯେ ଦେଶରେ ଲକଡାଉନ ସଫଳ ହୋଇଛି ।
ଏହି ଅବସରରେ ସ୍ୱାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ଲବ ଅଗ୍ରଓ୍ଵାଲ କହିଛନ୍ତି ଯେ ଆମର ଆରୋଗ୍ୟ ହାର ୪୯.୨୧ ପ୍ରତିଶତକୁ ବୃଦ୍ଧି ପାଇଛି । ଦେଶର ସକ୍ରିୟ ସଂକ୍ରମଣ ସଂଖ୍ୟା ତୁଳନାରେ ଆରୋଗ୍ୟ ସଂଖ୍ୟା ଟପିଯାଇଛି । ଏହା ଏକ ଶୁଭ ଲକ୍ଷଣ ବୋଲି ସେ କହିଛନ୍ତି ।