ଶ୍ରୀଲଙ୍କା ନାଗରିକଙ୍କ ହତ୍ୟାକୁ ସମର୍ଥନ କରିଥିବା ପାକିସ୍ତାନୀ ୟୁଟ୍ୟୁବରକୁ ଜେଲଦଣ୍ଡ
ଲାହୋର : ଗତ ଡିସେମ୍ବର ମାସରେ ପାକିସ୍ତାନର ସିଆଲକୋଟରେ ଜଣେ ଶ୍ରୀଲଙ୍କା ନାଗରିକଙ୍କ ହତ୍ୟା ଘଟଣାକୁ ସମର୍ଥନ କରିଥିବା ଜଣେ ଯୁବକକୁ ୧ ବର୍ଷ ଜେଲ ଦଣ୍ଡ ଦେଇଛନ୍ତି ପାକିସ୍ତାନର ଏକ ଆଦାଲତ । ମହମ୍ମଦ ଅଦନାନ ନାମକ ଏହି ୨୭ ବର୍ଷୀୟ ଯୁବକ ଏକ ୟୁଟ୍ୟୁବ ଭିଡିଓ ମାଧ୍ୟମରେ ଉକ୍ତ ହତ୍ୟା ଘଟଣାକୁ ସମର୍ଥନ କରିଥିଲା । ଏହି ଭିଡିଓରେ ସେ କହିଥିଲା ଯେ ଯିଏ ଧର୍ମନିନ୍ଦା କରିବ ସେମାନଙ୍କ ହତ୍ୟା କରିବା ଭୁଲ କାମ ନୁହେଁ । ଶ୍ରୀଲଙ୍କା ନାଗରିକ ପ୍ରିୟନ୍ଥା କୁମାରାଙ୍କ ହତ୍ୟା ଓ ତାଙ୍କ ମୃତଦେହ ଜାଳିବା ସପକ୍ଷରେ ବିଭିନ୍ନ ଯୁକ୍ତି ଉପସ୍ଥାପନ କରିଥିଲା ।
Sambad is now on WhatsApp
Join and get latest news updates delivered to you via WhatsApp
ଏହି ଭିଡିଓ ଭାଇରାଲ ହେବା ପରେ ସିଆଲକୋଟ ପୁଲିସ ଏକ ମାମଲା ରୁଜ୍ଜୁ କରି ଗରଜନଓ୍ବାଲା ଆତଙ୍କ ନିରୋଧୀ ଆଦାଲତରେ ଚାର୍ଜସିଟ ଦାୟର କରିଥିଲା । କୋର୍ଟରେ ଏହି ମାମଲାର ବିଚାର ବେଳେ ଉକ୍ତ ଯୁବକ ଭିଡିଓକୁ ସ୍ବୀକାର କରିଥିଲା । ଏହାପରେ ବିଚାରପତି ନତାଶା ନଇମ ତାକୁ ୧ ବର୍ଷ ଜେଲ ଓ ୧୦ ହଜାର ପାକିସ୍ତାନି ଟଙ୍କା ଜୋରିମାନା ଲାଗୁ କରିଛନ୍ତି ।
ଗତ ଡିସେମ୍ବର ୩ ତାରିଖରେ ସିଆଲକୋଟର ଓ୍ବାଜିରାବାଦରେ ଏହି ଘଟଣା ଘଟିଥିଲା । ସେଠାରେ ଥିବା ରାଜକୋ ନାମକ କମ୍ପାନିରେ ମହାପ୍ରବନ୍ଧକ ବା ଜିଏମଭାବେ କାମ କରୁଥିବା ଶ୍ରୀଲଙ୍କା ନାଗରିକ ପ୍ରିୟନ୍ଥା କୁମାରାଙ୍କୁ ଉତ୍ୟକ୍ତ ଭିଡ଼ ପିଟି ପିଟି ମାରିଦେବା ପରେ ତାଙ୍କ ମୃତଦେହରେ ନିଆଁ ଲଗାଇଦେଇଥିଲେ । ଇସଲାମକୁ ଅପମାନିତ କରିବା ଅଭିଯୋଗରେ ଉତ୍ୟକ୍ତ ଜନତା ଏହି ପଦକ୍ଷେପ ନେଇଥିଲେ । ଏହି ଘଟଣାରେ ସଂପୃକ୍ତ ୨୦୦ ବ୍ୟକ୍ତିଙ୍କ ବିରୋଧରେ ପୁଲିସ ମାମଲା ରୁଜ୍ଜୁ କରିଛି ।