ନୂଆଦିଲ୍ଲୀ : ସିରିଆରେ ଗୃହଯୁଦ୍ଧକୁ ନେଇ ଗତ କିଛି ବର୍ଷ ଧରି ମଧ୍ୟପୂର୍ବ ଅଞ୍ଚଳରେ ଅଶାନ୍ତି ଜାରି ରହିଛି । କିନ୍ତୁ ଏବେ ସିରିଆ ମାମଲାକୁ ନେଇ ଏ ଅଂଚଳର ଦୁଇ ଶକ୍ତିଶାଳୀ ଦେଶ ଇସ୍ରାଏଲ ଓ ଇରାନ ମୁହାଁମୁହିଁ ହୋଇଛନ୍ତି । ପରିସ୍ଥିତି ଏପରି ହେଇଛି ଯେକୌଣସି ସମୟରେ ଉଭୟ ପକ୍ଷ ମଧ୍ୟରେ ଯୁଦ୍ଧ ଲାଗିଯିବାର ଆଶଙ୍କା ଦେଖାଦେଇଛି । ଗତକାଲି ଇରାନର ଏକ ଡ୍ରୋନ ଇସ୍ରାଏଲ ବାୟୁସୀମା ମଧ୍ୟରେ ପ୍ରବେଶ କରିବା ପରେ ଇସ୍ରାଏଲ ପକ୍ଷରୁ ସିରିଆରେ ଥିବା ୧୨ଟି ଟାର୍ଗେଟ୍ ଉପରେ ଆକ୍ରମଣ କରାଯାଇଛି । ଏହା ମଧ୍ୟରୁ ୪ଟି ଟାର୍ଗେଟ ହେଉଛି ଇରାନର । ଶୁକ୍ରବାରଦିନ ଇରାନର ବିମାନ ବିଧ୍ୱଂସୀ କମାଣ ଦ୍ୱାରା ଇସ୍ରାଏଲର ଏକ ଏଫ-୧୬ ବିମାନକୁ ଖସାଇଦିଆଯିବା ପରେ ଇସ୍ରାଏଲ ଏହାର ଜବାବ ଦିଆଯିବ ବୋଲି ଚେତାବନୀ ଦେଇଥିଲା । ତେବେ ଏଥିରେ ଥିବା ଦୁଇ ଇସ୍ରାଏଲୀ ପାଇଲଟ ଅଳ୍ପକେ ବର୍ତ୍ତି ଯାଇଛନ୍ତି । ଇରାନର ଡ୍ରୋନ ଇସ୍ରାଏଲ ଭିତରେ ପହଞ୍ଚିବା ଏହାର ସାର୍ବଭୌମତ୍ୱ ପ୍ରତି ଏକ ବିପଦ । ଏହାର ଉପଯୁକ୍ତ ଜବାବ ଦେବା ଇସ୍ରାଏଲର କର୍ତ୍ତବ୍ୟ ଓ ଅଧିକାର ବୋଲି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଇସ୍ରାଏଲ ପକ୍ଷରୁ କୁହାଯାଇଛି ଯେ ସିରିଆକୁ ଇରାନର ଏକ ଘାଟି ହେବାକୁ ଦିଆଯିବ ନାହିଁ କିମ୍ବା ଲେବାନନର ଆତଙ୍କବାଦୀ ସଂଗଠନ ହିଜବୋଲ୍ଲା ପାଇଁ ଅସ୍ତ୍ରଶସ୍ତ୍ର ଯୋଗାଣର ଏକ ମାଧ୍ୟମ ହେବାକୁ ଦିଆଯିବ ନାହିଁ । ଇରାନ ସିରିଆକୁ ବ୍ୟବହାର କରି ଇସ୍ରାଏଲ ଉପରେ ଆକ୍ରମଣ ପାଇଁ ଯୋଜନା କରୁଛି ବୋଲି ନେତାନ୍ୟାହୁ କହିଛନ୍ତି । ତେବେ ଇସ୍ରାଏଲର ଏସବୁ ଅଭିଯୋଗକୁ ଇରାନ ଖଣ୍ଡନ କରିଛି ।