ଭାରତରେ ଆତ୍ମଘାତୀ ଆକ୍ରମଣ ଯୋଜନା କରୁଥିବା ‘ଇସ୍‌ଲାମିକ୍‌ ଷ୍ଟେଟ୍‌’ ଆତଙ୍କବାଦୀକୁ ଅଟକ ରଖିଛି ରୁଷ୍‌

ନୂଆଦିଲ୍ଲୀ: ଆତ୍ମଘାତୀ ଆକ୍ରମଣ ଉଦ୍ୟମ ନିମନ୍ତେ ଭାରତ ଗସ୍ତ କରିବାକୁ ଯୋଜନା କରୁଥିବା ଜଣେ ‘ଇସ୍‌ଲାମିକ୍‌ ଷ୍ଟେଟ୍‌’ (ଆଇଏସ୍‌) ଆତଙ୍କବାଦୀକୁ ରୁଷ୍‌ ଅଟକ ରଖିଥିବା କଥା ସମ୍ବାଦ ସରବରାହ ସଂସ୍ଥାନ ‘ସ୍ପୁଟ୍‌ନିକ୍‌’ ଆଜି ରିପୋର୍ଟ କରିଛି।

ରୁଷ୍‌ର ‘ଫେଡେରାଲ୍‌ ସିକ୍ୟୁରିଟି ସର୍ଭିସ୍‌’ (ଏଫ୍‌ଏସ୍‌ବି) ଜାରି କରିଥିବା ବିବୃତି ଅନୁସାରେ, ଭାରତରେ ଶାସକ ପରିସରର ପ୍ରତିନିଧିମାନଙ୍କ ମଧ୍ୟରୁ ଜଣକ ଉପରେ ଆକ୍ରମଣ କରିବା ଲାଗି ଆତଙ୍କବାଦୀଜଣକ ଯୋଜନା କରିଥିଲା।

ଉକ୍ତ ବିବୃତିରେ ଆହୁରି ମଧ୍ୟ ଉଲ୍ଲେଖ ଅଛି, ରୁଷୀୟ ଫେଡେରେସନ୍‌ର ‘ଏଫ୍‌ବିଏସ୍‌’ ରୁଷ୍‌ରେ ନିଷିଦ୍ଧ ହୋଇଥିବା ଆନ୍ତର୍ଜାତିକ ସଂଗଠନ ‘ଇସ୍‌ଲାମିକ୍‌ ଷ୍ଟେଟ୍‌’ର ଜଣେ ସଦସ୍ୟଙ୍କୁ ଚିହ୍ନଟ କରିବା ସହ ଅଟକ ରଖିଛି। ଅଟକ ଥିବା ଆତଙ୍କବାଦୀଜଣକ ହେଉଛି କେନ୍ଦ୍ରୀୟ ଏସୀୟ ଅଞ୍ଚଳର ବାସିନ୍ଦା। ସେ ‘ଆମିର୍‌ ଅଫ୍‌ ଦି ଇସ୍‌ଲାମିକ୍‌ ଷ୍ଟେଟ୍‌’ ନିକଟରେ ବିଶ୍ବସ୍ତତାର ଶପଥ ଗ୍ରହଣ କରିଥିଲା।

ଏହାପରେ, ଆବଶ୍ୟକ କାଗଜପତ୍ର କାମ ଶେଷ କରି ବିମାନରେ ଭାରତକୁ ଯାଇ ବଡ଼ଧରଣର ଆତଙ୍କବାଦୀ କାର୍ଯ୍ୟକଳାପ କରିବା ଲାଗି ତାକୁ ରୁଷ୍‌ରୁ ଚାଲିଯିବା ପାଇଁ ଅନୁମତି ମିଳିଥିଲା ବୋଲି ‘‌ଏଫ୍‌ଏସ୍‌ବି’ କହିଛି।