ଅକ୍ସଫୋର୍ଡ ଦ୍ବାରା ବିକଶିତ କୋଭିଡ -୧୯ ଟିକାର ଫେଜ୍୨-୩ ପର୍ଯ୍ୟାୟ ମାନବ କ୍ଲିନିକାଲ ପରୀକ୍ଷା ପାଇଁ ସେରମ୍ ଇନଷ୍ଟିଚ୍ୟୁଟକୁ ଅନୁମତି ଦେଲା ଡିସିଜିଆଇ
ପୁଣେ: ଅକ୍ସଫୋର୍ଡ ୟୁନିଭରସିଟି ଦ୍ବାରା ବିକଶିତ କୋଭିଡ -୧୯ ଟିକା ପ୍ରାର୍ଥୀଙ୍କ ଦ୍ୱିତୀୟ ପର୍ଯ୍ୟାୟ ଏବଂ ତୃତୀୟ ପର୍ଯ୍ୟାୟ ମାନବ କ୍ଲିନିକାଲ ପରୀକ୍ଷା ପରିଚାଳନା ପାଇଁ ପୁଣେ ସ୍ଥିତ ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆ (ଏସଆଇଆଇ) କୁ ଡ୍ରଗ୍ କଣ୍ଟ୍ରୋଲର୍ ଜେନେରାଲ୍ ଅଫ୍ ଇଣ୍ଡିଆ (ଡିସିଜିଆଇ) ଅନୁମତି ଦେଇଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, କୋଭିଡ -୧୯ ଉପରେ ସବଜେକ୍ଟ ଏକ୍ସପର୍ଟ କମିଟି (ଏସଇସି) ର ସୁପାରିଶ ଆଧାରରେ ପୁଙ୍ଖାନୁପୁଙ୍ଖ ମୂଲ୍ୟାଙ୍କନ ପରେ ରବିବାର ବିଳମ୍ବିତ ରାତିରେ ଡ. ଭି.ଜି ସୋମାନିଙ୍କ ଦ୍ବାରା ଏସଆଇଆଇକୁ ଅନୁମୋଦନ ପ୍ରଦାନ କରାଯାଇଛି। ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ଏସଆଇଆଇକୁ ଡାଟା ସେଫ୍ଟି ମନିଟରିଂ ବୋର୍ଡ (ଡିଏସଏମବି) ଦ୍ୱାରା ମୂଲ୍ୟାଙ୍କନ କରାଯାଇଥିବା ସୁରକ୍ଷା ତଥ୍ୟକୁ ଦାଖଲ କରିବାକୁ ପଡିବ। ଅଧିକାରୀ କହିଛନ୍ତି ଯେ, ଚାରି ସପ୍ତାହ ବ୍ୟବଧାନରେ ଦୁଇଟି ଡୋଜ୍ (ପ୍ରଥମ ଦିନରେ ପ୍ରଥମ ଡୋଜ ଏବଂ ୨୯ ଦିନରେ ଦ୍ୱିତୀୟ ଡୋଜ) ଦିଆଯିବ, ଯାହା ପରେ ପୂର୍ବ ନିର୍ଦ୍ଧାରିତ ସମୟ ମଧ୍ୟରେ ନିରାପତ୍ତା ଏବଂ ପ୍ରତିରକ୍ଷା ଶକ୍ତି ମୂଲ୍ୟାଙ୍କନ କରାଯିବ।
ପୂର୍ବରୁ ଜୁଲାଇ ୨୮ରେ ଏସଇସି କିଛି ଅତିରିକ୍ତ ସୂଚନା ଖୋଜିବା ବ୍ୟତୀତ ଦ୍ୱିତୀୟ ପର୍ଯ୍ୟାୟ ଏବଂ ତୃତୀୟ ପର୍ଯ୍ୟାୟ କ୍ଲିନିକାଲ୍ ପରୀକ୍ଷା ପାଇଁ ଏହାର ପ୍ରୋଟୋକଲ୍ ସଂଶୋଧନ କରିବାକୁ କହିବା ପରେ ସେରମ୍ ଇନଷ୍ଟିଚ୍ୟୁଟ୍ ବୁଧବାର ଦିନ ଏକ ସଂଶୋଧିତ ପ୍ରସ୍ତାବ ଦାଖଲ କରିଥିଲା । ସେରମ୍ ଇନଷ୍ଟିଚ୍ୟୁଟ୍ ଏହାର ସଂଶୋଧିତ ପ୍ରସ୍ତାବରେ ଲେଖିଥିଲା ଯେ, ୧୮ ବର୍ଷରୁ ଅଧିକ ୧୬୦୦ ଲୋକ ଦିଲ୍ଲୀର ଅଲ୍ ଇଣ୍ଡିଆ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (ଏମ୍ସ), ପୁଣେର ବିଜେ ମେଡିକାଲ କଲେଜ, ପାଟନାର ରାଜେନ୍ଦ୍ର ମେମୋରିଆଲ ରିସର୍ଚ୍ଚ ଇନଷ୍ଟିଚ୍ୟୁଟ ଅଫ୍ ମେଡିକାଲ ସାଇନ୍ସ, ଚଣ୍ଡିଗଡ଼ରେ ପୋଷ୍ଟ ଗ୍ରାଜୁଏଟ୍ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ୍ ଏଜୁକେସନ୍ ଆଣ୍ଡ ରିସର୍ଚ୍ଚ, ଯୋଧପୁରର ଏମ୍ସ, ଗୋରଖପୁରର ନେହେରୁ ହସ୍ପିଟାଲ୍, ବିଶାଖାପାଟନମର ଆନ୍ଧ୍ର ମେଡିକାଲ୍ କଲେଜ୍, ମହିସୂର ଜେଏସ୍ଏସ୍ ଏକାଡେମୀ ଅଫ୍ ହାଇଅର ଏଜୁକେସନ ଆଣ୍ଡ ରିସର୍ଚ୍ଚ ସମେତ ୧୭ଟି ମନୋନୀତ ସାଇଟରେ ଏହି ପରୀକ୍ଷାରେ ଭାଗ ନେବେ।