ଅଗଷ୍ଟ ୩୧ ସୁଦ୍ଧା କେବଳ ବିଦେଶୀ ନାଗରିକ ଯାଇପାରିବେ, ଆଫଗାନ ନାଗରିକ ଦେଶ ଛାଡ଼ିପାରିବେ ନାହିଁ : ତାଲିବାନ
କାବୁଲ : ଆଫଗାନିସ୍ତାନରୁ ଆମେରିକୀୟ ସେନା ପ୍ରତ୍ୟାହାର କରିବାର ଅଗଷ୍ଟ ୩୧ ଶେଷ ତାରିଖ ଏବେ ବି କାଏମ ରହିଛି । ଶେଷ ତାରିଖକୁ ସଂପ୍ରସାରଣ କରିବା ଲାଗି କୌଣସି ବୁଝାମଣା ହୋଇନାହିଁ ବୋଲି ତାଲିବାନ ପକ୍ଷରୁ ଆଜି କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଏକ ସାମ୍ବାଦିକ ସମ୍ମିଳନୀରେ ତାଲିବାନ ମୁଖପାତ୍ର ଜାବିହୁଲ୍ଲା ମୁଜାହିଦ୍ କହିଛନ୍ତି ଯେ ଅଗଷ୍ଟ ୩୧ ସୁଦ୍ଧା ଆଫଗାନିସ୍ତାନରୁ ସବୁ ଆମେରିକୀୟ ଓ ନାଟୋ ସୈନ୍ୟ ଚାଲିଯିବା ଉଚିତ । ସେ ଆହୁରି ମଧ୍ୟ କହିଛନ୍ତି ଯେ କେବଳ ଆମେରିକୀୟ ଓ ବିଦେଶୀ ନାଗରିକମାନେ ଆଫଗାନିସ୍ତାନ ଛାଡ଼ି ଯାଇପାରିବେ । କିନ୍ତୁ ଆଫଗାନ ନାଗରିକମାନେ ଦେଶ ଛାଡ଼ିପାରିବେ ନାହିଁ ।
ସେ କହିଛନ୍ତି ଯେ, ଖୁବ ଶୀଘ୍ର ସରକାର ଗଠନ କରାଯିବ । ଏଥିଲାଗି ପ୍ରସ୍ତୁତି ଚୂଡ଼ାନ୍ତ ସ୍ତରରେ ପହଞ୍ଚିଛି । ମହିଳାମାନଙ୍କ ଅଧିକାର ସମ୍ପର୍କରେ ସେ କହିଛନ୍ତି ଯେ, ଆଫଗାନ ମହିଳାମାନେ ଯେପରି କାମ କରିପାରିବେ ସେଥିଲାଗି ଏକ ଯୋଜନା ପ୍ରସ୍ତୁତ କରାଯାଉଛି । ସେ ପର୍ଯ୍ୟନ୍ତ ମହିଳାମାନେ ଘରେ ରୁହନ୍ତୁ ଓ ସେମାନଙ୍କ ନିକଟରେ ଦରମା ପହଞ୍ଚିବ ।
ଆମେରିକୀୟ ଗୁଇନ୍ଦା ସଂସ୍ଥା ସିଆଇଏ ଓ ତାଲିବାନ ମଧ୍ୟରେ ହୋଇଥିବା ଗୋପନ ଆଲୋଚନା ସମ୍ପର୍କରେ ସେ କୌଣସି ସୂଚନା ଦେଇପାରିବେ ନାହିଁ ବୋଲି ମୁଜାହିଦ କହିଛନ୍ତି । ଗତ ସପ୍ତାହରେ କାବୁଲ ଦଖଲ କରିବା ପରେ ଏହା ହେଉଛି ତାଲିବାନର ଦ୍ବିତୀୟ ସାମ୍ବାଦିକ ସମ୍ମିଳନୀ ।