ପାଟନା: ବିହାରରେ ନରେନ୍ଦ୍ର ମୋଦୀ ସରକାରଙ୍କ ଅଗ୍ନିପଥ ଯୋଜନାକୁ ନେଇ ତୀବ୍ର ବିରୋଧ ପ୍ରଦର୍ଶନ ଜାରି ରହିଥିବାବେଳେ ଗୃହ ମନ୍ତ୍ରାଳୟ ଉଭୟ ଉପମୁଖ୍ୟମନ୍ତ୍ରୀଙ୍କ ସମେତ ୧୦ଜଣ ବିଜେପି ନେତାଙ୍କୁ ଅତିରିକ୍ତ ସୁରକ୍ଷା ପ୍ରଦାନ କରିଛନ୍ତି। ସୂଚନା ଅନୁଯାୟୀ, ଏହି ସୁରକ୍ଷା ୱାଇ ବର୍ଗର ହେବ ଏବଂ ଏହାର ସୁରକ୍ଷା ସିଆରପିଏଫ ହାତରେ ରହିବ |
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ସରକାରଙ୍କ ଏହି ବଡ ନିଷ୍ପତ୍ତି ଜେଡିୟୁ ସହ ବିବାଦ ମଧ୍ୟରେ ଆସିଥିବା ଜଣାପଡିଛି। କେନ୍ଦ୍ରର ଏହି ନିଷ୍ପତ୍ତି ପୂର୍ବରୁ ବିହାର ବିଜେପି ସଭାପତି ସଞ୍ଜୟ ଜୟସ୍ବାଲ, ନୀତିଶ ସରକାରଙ୍କ ପୁଲିସ ଏବଂ ପ୍ରଶାସନ ଉପରେ ପ୍ରଶ୍ନ ଉଠାଇଥିଲେ। ସୂଚନାଯୋଗ୍ୟ ଯେ ବିହାର ବିଜେପି ସଭାପତି ସଞ୍ଜୟ ଜୟସ୍ବାଲ କହିଥିଲେ ଯେ ଏହି ବିରୋଧ ସମୟରେ ବିଜେପିକୁ ଟାର୍ଗେଟ କରାଯାଉଛି । ତିନୋଟି ଜିଲ୍ଲାରେ ବିଜେପି କାର୍ଯ୍ୟାଳୟ ପୋଡି ପାଉଁଶ ହୋଇଯାଇଥିଲା, କିନ୍ତୁ ପୁଲିସ ସେଠାରେ ଚୁପ୍ ରହିଥିଲା। ସଞ୍ଜୟ ଜୟସ୍ବାଲ କହିଥିଲେ ଯେ ପୁଲିସ-ପ୍ରଶାସନ ଯେଭଳି କାର୍ଯ୍ୟାନୁଷ୍ଠାନ ନେବା କଥା ସେଭଳି ନେଇନଥିଲା |
ସୂଚନା ଥାଉ କି ଯେ ବିହାରରେ ଚତୁର୍ଥ ଦିନ ପାଇଁ ଅଗ୍ନିପଥ ଯୋଜନା ବିରୋଧରେ ପ୍ରଦର୍ଶନ ଜାରି ରହିଛି । ଗତ ତିନି ଦିନ ଧରି ବିରୋଧ ପ୍ରଦର୍ଶନ ହିଂସାତ୍ମକ ରୂପ ନେଇଥିଲା। ବହୁ ଜିଲ୍ଲାରେ ବିକ୍ଷୋଭକାରୀମାନେ ଭଙ୍ଗାରୁଜା କରିଛନ୍ତି ଏବଂ ଏପରିକି ଟ୍ରେନରେ ନିଆଁ ଲଗାଇ ଦେଇଛନ୍ତି। ଏପରିକି ବିକ୍ଷୋଭକାରୀମାନେ ଉପ ମୁଖ୍ୟମନ୍ତ୍ରୀ ରେଣୁ ଦେବୀ ଏବଂ ବିହାର ବିଜେପି ସଭାପତି ସଞ୍ଜୟ ଜୟସ୍ବାଲଙ୍କ ଘରେ ଆକ୍ରମଣ କରିଥିଲେ।