ଭୁବନେଶ୍ବର : ଅଟୋଚାଳକ ଟୁଙ୍ଗୁର ଭୋଳ ଓ ବର୍ଷାଙ୍କୁ ନେଇ କିଛି ଦିନ ହେବ ଗଣମାଧ୍ୟମରେ ଚର୍ଚ୍ଚା ହେଉଛି। ଏହି ଦୁଇ ଜଣଙ୍କ ସମ୍ପର୍କକୁ ନେଇ ସୋସିଆଲ ମିଡିଆରେ ଅନେକ ଭିଡିଓ ପୋଷ୍ଟ କରାଯାଉଛି। ଏମିତିକି ମ୍ୟୁଜିକ୍ ଆଲବମ୍ ମଧ୍ୟ ପ୍ରସ୍ତୁତ ହେଉଛି। ଯାହାକୁ ନେଇ ଆପତ୍ତି ଉଠାଇଛନ୍ତି ସ୍ମାର୍ଟ ସିଟି ଅନ୍ଲାଇନ୍ ଅଟୋ ଗ୍ରୁପ୍ର କର୍ମକର୍ତ୍ତା। ଜଣେ ଅଟୋ ଚାଳକର ବ୍ୟକ୍ତିଗତ ସମସ୍ୟାକୁ ନେଇ ଯେଉଁ ଭଳି ଗୀତ ମୋବାଇଲ୍କୁ ମୋବାଇଲ୍ ଘୂରି ବୁଲୁଛି, ତାହାଦ୍ବାରା ଅଟୋଚାଳକଙ୍କ ମାନ ସମ୍ମାନ ହାନି ହେଉଛି।
Sambad is now on WhatsApp
Join and get latest news updates delivered to you via WhatsApp
ଏକ ପ୍ରେସ୍ ବିବୃତ୍ତିରେ ସଂଘ କହିଛି, ସବୁ ଅଟୋ ଚାଳକ ସମାନ ନୁହନ୍ତି। ଓଡ଼ିଶାର ଦ୍ରୌପଦୀ ମୁର୍ମୁ ରାଷ୍ଟ୍ରପତି ହେବା ପାଇଁ ଯାଉଛନ୍ତି। ଏହା ପ୍ରତ୍ୟେକ ଓଡ଼ିଆଙ୍କ ପାଇଁ ଗର୍ବ ଓ ଗୌରବର ବିଷୟ। ଯଦି ଗୀତ କରିବାର ଅଛି ତେବେ ତାଙ୍କ ଉପରେ ଭଲ ଗୀତ କରାଯାଉ। କିନ୍ତୁ ଜଣେ ଚରିତ୍ରହୀନ ବ୍ୟକ୍ତିକୁ ସୋସିଆଲ୍ ମିଡିଆରେ ହାଇଲାଇଟ୍ କରି ରାତାରାତି ଷ୍ଟାର୍ ବନାଇବାକୁ ଅପଚେଷ୍ଟା କରାଯାଉଛି। ଏହି ଆଲବମ୍ ନିର୍ମାତାମାନେ ଓଡ଼ିଆ ଭାଷା ଓ ଓଡ଼ିଆ ଜାତି ପାଇଁ କଳଙ୍କିତ ଅଧ୍ୟାୟ ସୃଷ୍ଟି କରୁଥିବା କହି କଡ଼ା ଭାଷାରେ ନିନ୍ଦା କରିଛନ୍ତି। ସ୍ମାର୍ଟ ସିଟିର ପ୍ରତ୍ୟେକ ଚାଳକ ଏହି ଗୀତ ଦ୍ବାରା ନିଜକୁ ଲଜ୍ଜିତ ଓ ଅପମାନିତ ମନେ କରୁଛନ୍ତି। ଜଣେ ଅଟୋ ଚାଳକ ପର ସ୍ତ୍ରୀକୁ ଭଲ ପାଇବା ଓ ପର ମୁହୂର୍ତ୍ତରେ ଧୋକ୍କା ଦେଇ ତା’ର ମାନ ମର୍ଯ୍ୟାଦା ହାନି କରିବାକୁ ଚେଷ୍ଟା କରିବା କେଉଁ ଦିଗରୁ ସମାଜରେ ସକାରାତ୍ମକ ପ୍ରଭାବ ପକାଇବ ବୋଲି ପ୍ରଶ୍ନ କରିଛନ୍ତି।
ସ୍ମାର୍ଟ ସିଟି ଅନ୍ଲାଇନ୍ ଅଟୋ ଗ୍ରୁପ୍ର ପ୍ରତ୍ୟେକ ଚାଳକ ନିଜକୁ ସମାଜସେବା କ୍ଷେତ୍ରରେ ଉତ୍ସର୍ଗ କରିଛନ୍ତି। ରୋଗୀର ରକ୍ତ ଦରକାର ହେଲେ ରକ୍ତଦାନ କରିଛନ୍ତି, ହଜି ଯାଇଥିବା ଜିନିଷକୁ ଠିକ୍ ସ୍ଥାନରେ ପହଞ୍ଚାଇଛନ୍ତି। ହେଲେ ଆଲବମ୍ ତିଆରି କରିଥିବା ବ୍ୟକ୍ତିଙ୍କୁ କ’ଣ ଖାଲି ଟୁଙ୍ଗୁର ଭୋଳ ଦେଖା ଗଲା କି ବୋଲି ପ୍ରଶ୍ନ କରିଛନ୍ତି। ଏଣୁ ସମାଜ ଉପରେ କୁପ୍ରଭାବ ପକାଉଥିବା ଆଲବମ୍ ଭିଡିଓ ଗୁଡ଼ିକ ବନ୍ଦ କରିବାକୁ ଦାବି କରିଛନ୍ତି। ଏଥିସହ ଟୁଙ୍ଗୁର ଭୋଳ ଓ ବର୍ଷାଙ୍କୁ ଯଦି ଗିରଫ କରାନଯାଏ ତେବେ ଶହ ଶହ ଅଟୋ ଚାଳକ ରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।