ଉମାରିଆ : ମଧ୍ୟପ୍ରଦେଶର ଉମାରିଆରେ ଆଇଏଏସ୍ ଅଫିସର ସ୍ୱରୋଚିଷ ସୋମାବଂଶୀଙ୍କ କାମକୁ ନେଇ ସଂପ୍ରତି ଚର୍ଚ୍ଚା ଆରମ୍ଭ ହୋଇଛି । ଲୁହା ରଡ୍ରେ ଚେଙ୍କ ଖାଇ ଚିକିତ୍ସିତ ହେଉଥିବା ୧୦୦ପିଲାଙ୍କ ପାଇଁ ଆଇଏଏସ୍ ଅଫିସର ସ୍ୱରୋଚିଷ ନିଜ ଅଫିସର ଏସି ଦାନ କରିବା ପରେ ତାଙ୍କର ଏହି କାମକୁ ନେଇ ଲୋକେ ପ୍ରଶଂସା କରିବା ଅରମ୍ଭ କରିଛନ୍ତି । ଖରାତାପ ପାଇଁ ସେମାନଙ୍କ ଯନ୍ତ୍ରଣା ଆହୁରି ବଢ଼ି ଯାଉଥିବା ଜାଣି ସେ ଏପରି କରିଥିବା କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ତେବେ ଏନେଇ ଆଇଏଏସ୍ ଅଫିସର ସ୍ୱରୋଚିଷ ସୋମାବଂଶୀଙ୍କୁ ପଚରାଯିବା ପରେ ସେ ଏହା ପଛରେ ଥିବା ଏକ ବଡ଼ କାହାଣୀ ବିଷୟରେ ଜଣାଇଛନ୍ତି । ତାଙ୍କ କହିବା ଅନୁଯାୟୀ, ଜିଲ୍ଲାପାଳ ଭାବେ ନିଯୁକ୍ତି ମିଳିବା ପରେ ସେ ମଧ୍ୟପ୍ରଦେଶର ଉମାରିଆରେ ପ୍ରଚଳିତ ଥିବା ଏକ ଭୟାନକ ପରମ୍ପରା ବିଷୟରେ ଜାଣିବାକୁ ପାଇଥିଲେ । ସେଠାରେ କୌଣସି ଶିଶୁ କୁପୋଷଣର ଶିକାର ହେଲେ ତା’ ଦେହରେ ଲୁହା ରଡ୍ରେ ଚେଙ୍କ ଦିଆଯାଇ ଚିକିତ୍ସା କରାଯାଏ ବୋଲି ଜାଣି ଚମକି ପଡ଼ିଥିଲେ ଆଇଏଏସ୍ ଅଫିସର ସ୍ୱରୋଚିଷ ।
ଆଇଏଏସ୍ ଅଫିସର ସ୍ୱରୋଚିଷଙ୍କ କହିବା ଅନୁଯାୟୀ, ପ୍ରଥମେ ମୁଁ ଚେଙ୍କ ଖାଉଥିବା ୬ବର୍ଷର ଶିଶୁକୁ ଦେଖି ତାଙ୍କ ବାପାଙ୍କୁ ପ୍ରଶ୍ନ କରିଥିଲି । ନିଜ ଆଗରେ ନିଜ ଶିଶୁ ସହ ଏଭଳି ହେଉଥିବା କେମିତି ଦେଖି ପାରୁଛ ବୋଲି ପଚାରିବା ପରେ ବ୍ୟକ୍ତିଜଣଙ୍କ ନିଜ ପୋଷାକ ଖୋଲି ଦେଇଥିଲେ । ଯାହା ପରେ ମୁଁ ତାଙ୍କ ଶରୀରରେ ମଧ୍ୟ ସେଭଳି ଚେଙ୍କ ଥିବା ଚିହ୍ନ ଦେଖିଥିଲି । ଏଭଳି କରି ସେମାନେ ନିଜର କୁପୋଷଣକୁ ଦୂର କରିଥିବାରୁ ନିଜ ଶିଶୁମାନଙ୍କୁ ମଧ୍ୟ ସେ ଲୁହା ଚେଙ୍କ ଦେଉଥିବା କହିଥିଲେ ।
ଏଭଳି ପରମ୍ପରା ବିଷୟରେ ଜାଣିବା ପରେ ଏହାକୁ ମୂଲପୋଛ କରିବା ପାଇଁ ଅଭିଯାନ ସଞ୍ଜିବନୀ ଆରମ୍ଭ କରିଥିଲେ ଆଇଏଏସ୍ ଅଫିସର ସ୍ୱରୋଚିଷ । ଏହି ଅଭିଯାନ ମେ’ ମାସରୁ ଆରମ୍ଭ କରାଯାଇଥିଲା । ଏହି ଅଭିଯାନରେ ଏଭଳି କୁପ୍ରଥାକୁ ୩ଟି ପର୍ଯ୍ୟାୟରେ ରୋକାଯିବାକୁ ଚେଷ୍ଟା ଆରମ୍ଭ ହୋଇଥିଲା । ପ୍ରଥମେ, ଯଦି କୌଣସି ମାତା-ପିତା ନିଜ ଶିଶୁକୁ ଲୁହା ରଡ୍ରେ ଚେଙ୍କ ଦେଉଥିବାର ସୂଚନା ମିଳେ ତେବେ ସେମାନଙ୍କ ବିରୋଧରେ ଏତଲା ରୁଜୁ କରାଯିବ । ଦ୍ୱିତୀୟରେ, ଯଦି କେହି କୁପୋଷଣର ଶିକାର ହେଉଛି, ତେବେ ଲୁହା ରଡ୍ ଚେଙ୍କ ନ ଦେଇ ସ୍ଥାନୀୟ ଡ଼ାକ୍ତରଖାନା ନେବା ପାଇଁ ସଚେତନ କରାଯିବ । ତୃତୀୟରେ ଯେଉଁ ଗ୍ରାମ ଏହି ପରମ୍ପରାକୁ ସଂପୂର୍ଣ୍ଣ ଶେଷ କରିବ ତାକୁ ପୁରଷ୍କୃତ କରାଯିବ । ଅଭିଯାନକୁ ଆରମ୍ଭ ହେବାର ମାତ୍ର ମସେ ହୋଇଥିବାରୁ ଶେଷ କାମଟି ହେବା ପାଇଁ ସମୟ ଲାଗିବ ବୋଲି କହିଛନ୍ତି ଆଇଏଏସ୍ ଅଫିସର ସ୍ୱରୋଚିଷ । ଅଭିଯାନକୁ ମାସେ ପୂରି ସାରିଥିବା ବେଳେ ଧିରେ ଧିରେ ଲୋକମାନଙ୍କ ମାନସିକତା ବଦଳିବାରେ ଲାଗିଛି ଏବଂ ଲୁହା ଚେଙ୍କ ନ ଦେଇ ଲୋକେ ନିଜ ପିଲମାନଙ୍କୁ ଡ଼ାକ୍ତରଖାନା ଆଣୁଥିବା କହିଛନ୍ତି ଆଇଏଏସ୍ ଅଫିସର ସ୍ୱରୋଚିଷ ।