ଭୁବନେଶ୍ବର: ଖେଲୋ ଇଣ୍ଡିଆ ଜାତୀୟ ମାନ୍ୟତା ମହିଳା ଭାରୋତ୍ତୋଳନ ପ୍ରତିଯୋଗିତାରେ ସୋମବାର ଓଡ଼ିଶା ଖାତାରେ ଆଉ ଦୁଇ (ରୌପ୍ୟ, କାଂସ୍ୟ) ପଦକ ଯୋଡ଼ି ହୋଇଛି। ଏହି ଦୁଇଟି ଯାକ ପଦକ ୭୬ କେଜି ବରିଷ୍ଠ ଓ କନିଷ୍ଠ ବର୍ଗରୁ ଆସିଛି। କନିଷ୍ଠରେ ମୋନାଲି ସାହୁ ଏବଂ ବରିଷ୍ଠରେ ମଗନ୍ତୀ କୀର୍ତ୍ତି କାଂସ୍ୟ ଜିତିଛନ୍ତି। ମୋନାଲି ସ୍ନାଚ୍ରେ ୭୩ ଏବଂ କ୍ଲିନ୍ ଓ ଜର୍କରେ ୯୬ କେଜି ସହ ମୋଟ ୧୬୯ କେଜି ଉଠାଇ ଦ୍ବିତୀୟ ସ୍ଥାନରେ ରହିଥିଲେ। ଏହି ବର୍ଗରେ ଆନ୍ଧ୍ରପ୍ରଦେଶର ଧରିତ୍ରୀ ପଲାତି (୮୦ କେଜି ସ୍ନାଚ୍ ଏବଂ ୧୦୫ କେଜି କ୍ଲିନ୍ ଓ ଜର୍କ ସହ ମୋଟ ୧୮୫ କେଜି) ସ୍ବର୍ଣ୍ଣ ଏବଂ ମହାରାଷ୍ଟ୍ରର ପ୍ରତୀକ୍ଷା କାଡ଼ୁ (୭୬ କେଜି ସ୍ନାଚ୍ ଏବଂ ୮୫ କେଜି କ୍ଲିନ୍ ଓ ଜର୍କ ସହ ମୋଟ ୧୬୧ କେଜି) କାଂସ୍ୟ ଜିତିଥିଲେ।
Sambad is now on WhatsApp
Join and get latest news updates delivered to you via WhatsApp
ସେହିପରି ବରିଷ୍ଠରେ କିଟ୍ ଛାତ୍ରୀ କୀର୍ତ୍ତି ମୋଟ ୧୭୪ (୭୯ କେଜି ସ୍ନାଚ୍ ଏବଂ ୯୫ କେଜି କ୍ଲିନ୍ ଓ ଜର୍କ) କେଜି ଉଠାଇ ତୃତୀୟ ସ୍ଥାନରେ ରହିଥିଲେ। ଏହି ବର୍ଗରେ ସର୍ଭିସେସ୍ର ଆର୍ ଆରୋକିଆ ଆଲିସ (୮୬ କେଜି ସ୍ନାଚ୍ ଏବଂ ୧୧୨ କେଜି କ୍ଲିନ୍ ଓ ଜର୍କ ସହ ମୋଟ ୧୯୮ କେଜି) ସ୍ବର୍ଣ୍ଣ ଏବଂ ଧରିତ୍ରୀ ପଲାତି (୮୦ କେଜି ସ୍ନାଚ୍ ଏବଂ ୧୦୫ କେଜି କ୍ଲିନ୍ ଓ ଜର୍କ ସହ ମୋଟ ୧୮୫ କେଜି) ରୌପ୍ୟ ପଦକ ଜିତିଥିଲେ। ଏହି ଦୁଇ ପଦକ ସହ ଏହି ପ୍ରତିଯୋଗିତାରେ ସୋମବାର ସୁଦ୍ଧା ଓଡ଼ିଶାର ମୋଟ ପଦକ ସଂଖ୍ୟା ୬ (୪ ରୌପ୍ୟ, ୨ କାଂସ୍ୟ)ରେ ପହଁଚିଛି।