ଭୁବନେଶ୍ୱର: ଚଳିତ ଜାତୀୟ ଉପକନିଷ୍ଠ ବ୍ୟାଡ୍ମିଣ୍ଟନ୍ ପ୍ରତିଯୋଗିତାର ଗୁରୁବାର ତୃତୀୟ ଦିବସରେ ଓଡ଼ିଶା ଖେଳାଳିମାନେ ନିରାଶ କରିଛନ୍ତି। ୧୭ ବର୍ଷରୁ କମ୍ ବାଳକ ଏକକ ରାଉଣ୍ଡ-୩୨ରେ ଦୁଇ ଆୟୁଷ (ଆୟୁଷ ପଟ୍ଟନାୟକ ଓ ଆୟୁଷ ଦାଶ) ଅଟକି ଥିଲା ବେଳେ ଯୁଗଳରେ କିନ୍ତୁ ଆଗକୁ ବଢ଼ିଛନ୍ତି। ସପ୍ତମ ମାନ୍ୟତା ପ୍ରାପ୍ତ ଓଡ଼ିଶାର ଆୟୁଷ ପଟ୍ଟନାୟକ ୧୮-୨୧, ୯-୨୧ରେ ହିମାନିଶ ଦାସଙ୍କଠୁ ଏବଂ ଆୟୁଷ ଦାଶ ୧୭-୨୧, ୧୪-୨୧ରେ ଅଂଶ ବିଶାଲ ଗୁପ୍ତାଙ୍କଠୁ ହାରି ଯାଇଥିଲେ। ତେବେ ଯୁଗଳରେ ଓଡ଼ିଶା ଯୋଡ଼ି ଆୟୁଷ ଦାଶ ଓ ପାର୍ଥ ସାରଥି ମିଶ୍ର ୨୧-୧୯, ୨୧-୧୫ରେ ଏମ୍ ସୁନ୍ଦରରାଜ ଓ ଏସ୍ ୟାକାଲାଙ୍କୁ ଏବଂ କର୍ଣ୍ଣାଟକର ସୁହାସ ଭି’ଙ୍କୁ ସାଥୀ କରି ଖେଳୁଥିବା ଆୟୁଷ ପଟ୍ଟନାୟକ ୨୧-୧୨, ୨୧-୯ରେ ଅଭିଜିତ ଜାସୋରୋତିଆ ଓ ପୂରଞ୍ଜୟ ଶର୍ମାଙ୍କୁ ହରାଇ ପ୍ରିକ୍ବାର୍ଟର ଫାଇନାଲ୍ରେ ପ୍ରବେଶ କରଛନ୍ତି। ୧୭ ବର୍ଷରୁ କମ୍ ବାଳିକା ରାଉଣ୍ଡ-୩୨ରେ ଓଡ଼ିଆ ଝିଅ ଶ୍ରୁତି ସ୍ବାଇଁ ୧୪-୨୧, ୧୨-୨୧ରେ ଅଭିଳାଶା ଏ’ଙ୍କଠୁ ହାରି ବିଦାୟ ନେଇଥିଲା ବେଳେ ଯୁଗଳରେ ଓଡ଼ିଶା ଯୋଡ଼ି ଅନୁଜା ଦାସ ମହାପାତ୍ର ଓ ଶ୍ବେତପର୍ଣ୍ଣା ପଣ୍ଡା ଏବଂ ଶ୍ରୀୟା ବିଶ୍ବାଳ ଓ ହର୍ଷିତା ରାଉତ ମଧ୍ୟ ନିଜ ନିଜ ମ୍ୟାଚ୍ ହାରି ପ୍ରତିଯୋଗିତାରୁ ବିଦାୟ ନେଇଛନ୍ତି। ଅନୁଜା-ଶ୍ବେତପର୍ଣ୍ଣା ୨୧-୧୦, ୨୧-୧୭ରେ ଦ୍ବିତୀୟ ମାନ୍ୟତାପ୍ରାପ୍ତ ପ୍ରଣବୀ ଏନ୍ ଓ ସାରୁମଥି ଭି’ଙ୍କଠୁ ଏବଂ ୧୩-୨୧, ୨୧-୨୩ରେ ଆଶିତା ଦୁବେ ଓ ଶ୍ରୀକରୀ ରେଡ୍ଡୀଙ୍କଠୁ ପରାଜିତ ହୋଇଥିଲେ। ହେଲେ ୧୫ ବର୍ଷରୁ କମ୍ ମିଶ୍ରିତ ଯୁଗଳରେ ଶ୍ବେତପର୍ଣ୍ଣା କ୍ବାର୍ଟର୍ ଫାଇନାଲ୍ରେ ପ୍ରବେଶ କରିଛନ୍ତି। ଶୀର୍ଷ ମାନ୍ୟତାପ୍ରାପ୍ତ ଶ୍ବେତପର୍ଣ୍ଣା ଓ ତାଙ୍କ କର୍ଣ୍ଣାଟକ ସାଥୀ ସାତ୍ୱିକ ରେଡ୍ଡୀ କେ’୧୪-୨୧, ୨୧-୭, ୨୧-୧୫ରେ ଇସୋବେଲ କୁରିୟାନ୍ ଓ କୁଶ ଭାଟ୍ସଙ୍କୁ ପରାସ୍ତ କରିଥିଲେ।
Sambad is now on WhatsApp
Join and get latest news updates delivered to you via WhatsApp
୧୫ ବର୍ଷରୁ କମ୍ ବାଳିକାରେ ଶୀର୍ଷ ମାନ୍ୟତାପ୍ରାପ୍ତ ତାରା ଶାହ, ଦ୍ବିତୀୟ ମାନ୍ୟତାପ୍ରାପ୍ତ ଅନୁପମା ଉପାଧ୍ୟାୟ ପ୍ରି-କ୍ବାର୍ଟର୍ ଫାଇନାଲ୍ରେ ପ୍ରବେଶ କରିଛନ୍ତି। ମହାରାଷ୍ଟ୍ରର ତାରା ୨୧-୧୮, ୨୧-୧୮ରେ ରାଜସ୍ଥାନର ଅଂଶିକା କୁମାୱତଙ୍କୁ ଏବଂ ହରିଆଣାର ଅନୁପମା ୨୧-୧୧, ୨୧-୧୩ରେ ପଂଜାବର ରାଧିକା ଶର୍ମାଙ୍କୁ ପରାସ୍ତ କରିଥିଲେ। ବାଳିକା ଯୁଗଳରେ ଶୀର୍ଷ ମାନ୍ୟତାପ୍ରାପ୍ତ କେରଳ ଯୋଡ଼ି ଆନ୍ଦ୍ରିଆ ସାରା କୁରିନ ଓ ପବିତ୍ରା ନବୀପ ୨୧-୧୦, ୨୧-୮ରେ ମୁସ୍କାନ ଚାଟାର୍ଜୀ ଓ ଆହନା ଧରଙ୍କୁ ହରାଇଥିଲେ। ୧୭ ବର୍ଷରୁ କମ୍ ବାଳିକା ବର୍ଗରେ କନିଷ୍ଠ ଏସୀୟ ବିଜୟିନୀ ତସମିନ୍ ମିର ୨୧-୧୩, ୨୧-୧୨ରେ ଭାର୍ଗବୀ କେ’ଙ୍କୁ ଏବଂ ଉପବିଜୟିନୀ ତାରା ଶାହ ୨୧-୬, ୨୧-୯ରେ ଶିବାଙ୍ଗୀ ସିଂହଙ୍କୁ ପରାସ୍ତ କରି ପ୍ରିକ୍ବାର୍ଟର ଫାଇନାଲ୍ରେ ପହଞ୍ଚିଛନ୍ତି। ମ୍ୟାଚ୍ଗୁଡ଼ିକ ପୂର୍ବତଟ ରେଳବାଇ ଇନ୍ଡୋର ଷ୍ଟାଡିୟମ ଓ ସହିଦ ନଗର ଇନ୍ଡୋର ହଲ୍ଠାରେ ଖେଳାଯାଇଥିଲା।