ଥାଇଲାଣ୍ଡ୍ ଓପନ୍ ମୁଷ୍ଟିଯୁଦ୍ଧ : ଭାରତର ୬ ପଦକ ପକ୍କା
ନୂଆଦିଲ୍ଲୀ: ଚଳିତ ଥାଇଲାଣ୍ଡ୍ ଓପନ୍ ଆନ୍ତର୍ଜାତିକ ମୁଷ୍ଟିଯୁଦ୍ଧ ପ୍ରତିଯୋଗିତାରେ ଭାରତର ୬ ପଦକ ପକ୍କା ହୋଇଛି। ବୁଧବାର କ୍ବାର୍ଟର ଫାଇନାଲ୍ରେ ୬ ଭାରତୀୟ କନିଷ୍ଠ ବିଶ୍ବ ବିଜେତା ନିଖତ୍ ଜାରିନ୍ (୫୧ କେଜି), ଏସୀୟ ରୌପ୍ୟ ବିଜେତା ଦୀପକ ସିଂହ (୪୯ କେଜି), ଆଶିଷ (୬୯ କେଜି), ମଞ୍ଜୁ ରାଣୀ (୪୮ କେଜି), ବ୍ରିଜେଶ୍ ଯାଦବ (୮୧ କେଜି) ଓ ରାଜ୍ୟଗୋଷ୍ଠୀ କାଂସ୍ୟ ବିଜେତା ମହମ୍ମଦ ହୁସାମ୍ମୁଦ୍ଦିନ୍ ନିଜ ନିଜ ପ୍ରତିଦ୍ବନ୍ଦ୍ବୀଙ୍କୁ ହରାଇ ସେମିଫାଇନାଲ୍ରେ ପ୍ରବେଶ ସହ ପଦକ ନିଶ୍ଚିତ କରିଛନ୍ତି। ଜାରିନ୍ ୫-୦ରେ ଉଜବେକିସ୍ତାନର ସିତୋରା ଶୋଗଦାରୋଭାଙ୍କୁ ହରାଇଥିଲା ବେଳେ ଦୀପକଙ୍କ ପ୍ରତିଦ୍ବନ୍ଦ୍ବୀ ମାତ୍ର ୨ ମିନିଟ୍ରେ ବାଉଟ୍ ଛାଡ଼ି ଚାଲି ଯାଇଥିଲେ। ଆଶିଷ ୫-୦ରେ ଜାମାଇକାର ଜୋସୁଆ ଫ୍ରାଜରଙ୍କୁ, ହୁସାମ୍ମୁଦ୍ଦିନ୍ ୫-୦ରେ କୋରିଆର ଲି ୟିଚାନ୍ଙ୍କୁ, ବ୍ରିଜେଶ୍ ୪-୧ରେ ଥାଇଲାଣ୍ଡର ଜାକ୍କା ପୋଙ୍ଗ ୟୋମଖୋତଙ୍କୁ ଏବଂ ମଞ୍ଜୁ ଇଟାଲିର ରୋବର୍ତା ବୋନାଟିଙ୍କୁ ପରାସ୍ତ କରିଥିଲେ। ତେବେ ଏସୀୟ ରୌପ୍ୟ ବିଜୟିନୀ ମନୀଷା ମାଉଁ (୫୭ କେଜି) ରୁଷିଆର ଲୁଇଡମିଲା ଭୋରୋଣ୍ଟତ୍ ସୋବାଙ୍କଠୁ ହାରି ଖାଲି ହାତରେ ବିଦାୟ ନେଇଛନ୍ତି।