ସୁନ୍ଦରଗଡ଼/ହେମଗିର: ଶେଷକୁ ହେମଗିର ବ୍ଲକର ଏମସିଏଲ ବିସ୍ଥାପିତଙ୍କ ଡାକ ଶୁଣିଲା ସୁନ୍ଦରଗଡ଼ ଜିଲ୍ଲା ପ୍ରଶାସନ। ବ୍ଲକର ଖଣି ପ୍ରଭାବିତ ୫ଟି ପଞ୍ଚାୟତ ଗୋପାଳପୁର, ଟପରିଆ, ସାନଘୁମୁଡ଼ା, ମୁଣ୍ଡେରଖେତ ଏବଂ ସୁମୁରା ପାଇଁ ୧୧୯ ଟି ଉନ୍ନୟନ ପ୍ରକଳ୍ପ ଘୋଷଣା କଲେ ଜିଲ୍ଲାପାଳ। ଲୋକମାନଙ୍କ ଦ୍ୱାରା ଗ୍ରାମସଭାସ୍ତରରୁ ପାରିତ ହୋଇ ଆସୁଥିବା ବିଭିନ୍ନ ପ୍ରସ୍ତାବକୁ ବିଚାରକରି ଜିଲ୍ଲାସ୍ତରରେ ଅନୁମୋଦନ କରାଯାଉଛି।ମଙ୍ଗଳବାର ଦିନ ହେମଗିର ବ୍ଲକର ଗୋପାଳପୁର ପଞ୍ଚାୟତ କାର୍ଯ୍ୟାଳୟଠାରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଯୋଗଦେଇ ଜିଲ୍ଲାପାଳ ନିଖିଲ ପବନ କଲ୍ୟାଣ ସ୍ଥାନୀୟ ଜନସାଧାରଣଙ୍କୁ ଏ ସମ୍ପର୍କରେ ସିଧାସଳଖ ସୂଚନା ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏହିସବୁ ପ୍ରକଳ୍ପ ମଧ୍ୟରେ ରହିଛି ଗ୍ରାମ୍ୟ ରାସ୍ତା ନିର୍ମାଣ, ପାନୀୟ ଜଳ ଯୋଗାଣ, ପୋଖରୀ ଖନନ ଓ ପୁନରୁଦ୍ଧାର, ମାଛ ଚାଷକୁ ପ୍ରୋତ୍ସାହନ, ଖଣି ପ୍ରଭାବିତ ଅଞ୍ଚଳରେ ଧୂଳି ଧୂଆଁ ନିୟନ୍ତ୍ରଣ ଲାଗି ବ୍ୟବସ୍ଥା, ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରକୁ ଡିଜିଟାଲ ଏକ୍ସରେ ମେସିନ୍ ପ୍ରଦାନ, ଚାଷଜମିକୁ ଜଳସେଚନ ସୁବିଧା ଲାଗି ଚେକ୍ ଡ୍ୟାମ ନିର୍ମାଣ, ମିଶନ ଶକ୍ତି ଗୃହ ନିର୍ମାଣ, ଏସଏଚଜି ମା’ମାନଙ୍କ ଜୀବିକା ପାଇଁ ବିଭିନ୍ନ ପ୍ରକାର ପ୍ରୋତ୍ସାହନ, ଗୋଷ୍ଠୀ ଶୌଚାଳୟ ନିର୍ମାଣ, ଏଏନଏମ କେନ୍ଦ୍ର ନିର୍ମାଣ ଏବଂ ସର୍ବସାଧାରଣ ସ୍ଥାନରେ ଉଜ୍ଜ୍ୱଳ ଆଲୋକ ପାଇଁ ହାଇମାଷ୍ଟ୍ ଲାଇଟ୍ ପ୍ରତିଷ୍ଠା। ବିଭିନ୍ନ ଉନ୍ନୟନମୂଳକ କାର୍ଯ୍ୟର ସଫଳ ରୂପାୟନ ଲାଗି ଜନସହଭାଗିତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତେଣୁ ସୁନ୍ଦରଗଡ଼ ଜିଲ୍ଲାରେ ସ୍ଥାନୀୟ ବିକାଶ ପାଇଁ ଲୋକଙ୍କୁ ଯୋଡ଼ି ଗ୍ରାମସଭାକୁ ସୁଦୃଢ଼ କରାଯାଉଛି। ଗାଁ ଗହଳରୁ ସିଧାସଳଖ ଲୋକଙ୍କଠାରୁ ଆସୁଥିବା ପ୍ରସ୍ତାବଗୁଡ଼ିକୁ ବିଚାରକରି ବିଭିନ୍ନ କାର୍ଯ୍ୟକ୍ରମ ଲାଗୁ କରିବା ଉପରେ ପ୍ରଶାସନ ଗୁରୁତ୍ୱ ଦେଉଛି ବୋଲି କହିଛନ୍ତି ଜିଲ୍ଲାପାଳ।
ଏହି ସ୍ୱତନ୍ତ୍ର ଜନ ଯୋଗାଯୋଗ କାର୍ଯ୍ୟକ୍ରମରେ ଡିଏମଏଫ ସିଇଓ ରୀତା ଡାଙ୍ଗ, ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡାକ୍ତର ସରୋଜ କୁମାର ମିଶ୍ର, ହେମଗିର ବ୍ଲକ ଅଧ୍ୟକ୍ଷ ପ୍ରେମାନନ୍ଦ ସାହୁ, ସୁନ୍ଦରଗଡ଼ ଜିଲ୍ଲା ଶିକ୍ଷା ଅଧିକାରୀ ଅମୂଲ୍ୟ କୁମାର ପଧାନ, ହେମଗିର ବିଡିଓ ଜଗଦୀଶ ମହାନନ୍ଦ, ଅତିରିକ୍ତ ତହସିଲଦାର ତକ୍ଷରାଜ ଭିତିରିଆ, ସୁନ୍ଦରଗଡ଼ ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ନନ୍ଦିନୀ ମୁଣ୍ଡାରୀ, ସଂପୃକ୍ତ ୫ଟି ପଞ୍ଚାୟତର ସରପଞ୍ଚଙ୍କ ସହିତ ଜିଲ୍ଲା ପ୍ରଶାସନ ଏବଂ ଡିଏମଏଫର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଅନୁମୋଦିତ ପ୍ରସ୍ତାବର ତାଲିକା ଅନୁଯାୟୀ ଖୁବଶୀଘ୍ର କାର୍ଯ୍ୟ ପ୍ରକ୍ରିୟା ଆରମ୍ଭ କରିବାକୁ ଏହି ବୈଠକରେ ଉପସ୍ଥିତ ବିଭିନ୍ନ ବିଭାଗର ଅଧିକାରୀମାନଙ୍କୁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ।ଏହି ଅବସରରେ ଜିଲ୍ଲାପାଳ ନିଖିଲ ପବନ କଲ୍ୟାଣ ହେମଗିର ବ୍ଲକର ସ୍କୁଲ ଓ କଲେଜର ଛାତ୍ରଛାତ୍ରୀମାନଙ୍କ ସୁବିଧା ପାଇଁ ଆଉ ଏକ ବସ୍ ସେବାର ଶୁଭାରମ୍ଭ କରିଥିଲେ। ବ୍ଲକର ବିଭିନ୍ନ ପଞ୍ଚାୟତର ଛାତ୍ରଛାତ୍ରୀମାନଙ୍କୁ ମାଗଣାରେ ସେମାନଙ୍କ ଶିକ୍ଷାନୁଷ୍ଠାନକୁ ନେବା ଆଣିବା କରିବା ପାଇଁ ଆଗରୁ ପ୍ରଶାସନ ପକ୍ଷରୁ ୩ଟି ବସ୍ ଯୋଗାଇ ଦିଆଯାଇଛି। ଜିଲ୍ଲା ଖଣିଜ ପ୍ରତିଷ୍ଠାନ ପାଣ୍ଠିରୁ ଏହି ବସ୍ ସେବା ପାଇଁ ଆର୍ଥିକ ସହାୟତା ଯୋଗାଇ ଦିଆଯାଉଛି।