‘କାଳିଆ’ ଯୋଜନା ଟଙ୍କା ଫେରାଇବାକୁ ପଡ଼ିବ ନାହିଁ
ଖୋର୍ଦ୍ଧା ଜିଲ୍ଲାରେ ୪୭୧ କୋଟି ଟଙ୍କାର ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ
ଖୋର୍ଦ୍ଧା : ‘କାଳିଆ’ ଯୋଜନା ରାଜ୍ୟର ସମସ୍ତ କ୍ଷୁଦ୍ର, ନାମମାତ୍ର, ଭାଗ ଚାଷୀମାନଙ୍କ ପାଇଁ । ଏହି ଯୋଜନାରେ ଦିଆଯାଉଥିବା ଟଙ୍କା ଫେରସ୍ତ କରିବାକୁ ପଡ଼ିବ ବୋଲି କେତେକ ଅପପ୍ରଚାର ଚଳାଇଛନ୍ତି। ‘କାଳିଆ ’ ଯୋଜନାରେ ମିଳୁଥିବା ଟଙ୍କା ଚାଷୀଙ୍କର। ଏହାକୁ ଫେରାଇବାକୁ ପଡ଼ିବ ନାହିଁ। ଏହି ଟଙ୍କା ବିନିଯୋଗ କରି ଚାଷୀମାନେ ଚାଷର ଉନ୍ନତି କରନ୍ତୁ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଖୋର୍ଦ୍ଧା ଉପକଣ୍ଠ ଗୋଶାଳା ପଡ଼ିଆ ଠାରେ ବିଜୁ ଯୁବ ବାହିନୀର ‘ଯୁବ ସମାବେଶ’ରେ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଯୁବ ସମାବେଶରେ ଉଦ୍ବୋଧନ ଦେଇ କହିଛନ୍ତି ଯେ ଓଡ଼ିଶାବାସୀ ନିଜର ସେବା ଧର୍ମ ପାଇଁ ପ୍ରତିଷ୍ଠା ଲାଭ କରିଛନ୍ତି। ସେବା ମନୋଭାବ ରଖି ଯେଉଁ ଯୁବକମାନେ ବିଜୁ ଯୁବ ବାହିନୀରେ ସାମିଲ ହୋଇ ରାଜ୍ୟର ବିକାଶ ପାଇଁ ମନୋନିବେଶ କରିଛନ୍ତି ସେମାନଙ୍କୁ ଧନ୍ୟବାଦ ଦେଇ ଏହି ସେବା ମନୋଭାବକୁ ବଜାୟ ରଖିବାକୁ ପଡ଼ିବ ବୋଲି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ପରାମର୍ଶ ଦେଇଥିଲେ। ସେହିପରି ମହିଳା ଓ ଯୁବକମାନଙ୍କ ଉନ୍ନତି ହେଲେ ରାଜ୍ୟର ଉନ୍ନତି ହେବ ବୋଲି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଥିଲେ। ବିଜୁ ଯୁବ ବାହିନୀ ପକ୍ଷରୁ ବୃକ୍ଷରୋପଣ ସମ୍ପର୍କିତ ଏକ ନୃତ୍ୟକୁ ମୁଖ୍ୟମନ୍ତ୍ରୀ ଉପଭୋଗ କରିବା ସହିତ ତାଳି ମାରି ଯୁବ ବାହିନୀକୁ ଅଭିନନ୍ଦନ ଜଣାଇଥିଲେ। ଏହି ଅବସରରେ ଯୁବ ବାହିନୀର ଶ୍ରେଷ୍ଠ କାର୍ଯ୍ୟ କରିଥିବା ଯୁବକ/ଯୁବତୀମାନଙ୍କୁ ମାନପତ୍ର ଦେଇ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ସମ୍ବର୍ଦ୍ଧିତ କରିଥିଲେ। ଏହି ଅବସରରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଖୋର୍ଦ୍ଧା ଜିଲ୍ଲାର ବିଭିନ୍ନ ଅଞ୍ଚଳରେ ୨୦୫ କୋଟି ଟଙ୍କାର ୪୭ଟି ପ୍ରକଳ୍ପର ଉଦ୍ଘାଟନ ଓ ୪୬୬ କୋଟି ୧୮ଲକ୍ଷ ଟଙ୍କାର ୨୫ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଥିଲେ। ମଞ୍ଚରେ ରାଜ୍ୟ ବିଜୁ ଯୁବ ବାହିନୀର ମୁଖ୍ୟ ଅରୁପ ପଟ୍ଟନାୟକ ସ୍ବାଗତ ଭାଷଣ ଓ ଯୁବ ବାହିନୀର ଆଭିମୁଖ୍ୟ ସମ୍ପର୍କରେ ସୂଚନା ଦେଇଥିବା ବେଳେ ସାଂସଦ ପ୍ରସନ୍ନ କୁମାର ପାଟ୍ଟଶାଣୀ, ଅର୍ଥ ମନ୍ତ୍ରୀ ଶିଶୁ ଭୂଷଣ ବେହେରା, ଖୋର୍ଦ୍ଧା ବିଧାୟକ ରାଜେନ୍ଦ୍ର କୁମାର ସାହୁ, ବେଗୁନିଆ ବିଧାୟକ ପ୍ରଶାନ୍ତ ଜଗଦ୍ଦେବ, ଭୁବନେଶ୍ବର ଉତ୍ତର ବିଧାୟକ ପ୍ରିୟଦର୍ଶୀ ମିଶ୍ର, ଜିଲ୍ଲାପାଳ ନିର୍ମଳ ଚନ୍ଦ୍ର ମିଶ୍ର ପ୍ରମୁଖ ଉପସ୍ଥିତ ଥିଲେ। ସମାବେଶରେ ଖୋର୍ଦ୍ଧା ଜିଲ୍ଲା, ପୁରୀ ଓ ଭୁବନେଶ୍ବରର ପ୍ରାୟ ୨୪ ହଜାରରୁ ଉର୍ଦ୍ଧ୍ବ ବିଜୁ ଯୁବ ବାହିନୀର ସଭ୍ୟ ସଭ୍ୟା ଯୋଗ ଦେଇଥିଲେ। ଏହାପରେ ବିଶିଷ୍ଟ ବଲିଉଡ୍ ଗାୟକ ସାନ୍, ଚିତ୍ରାଙ୍ଗଦାଙ୍କ ଦ୍ବାରା ବିଶେଷ ରଙ୍ଗା ରଙ୍ଗ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।