୬ଲକ୍ଷ ଟଙ୍କାର ବ୍ରାଉନ୍ସୁଗାର ଓ ଗଂଜେଇ ଜବତ, ୨ ଗିରଫ
ଖୋର୍ଦ୍ଧା: ଅବକାରୀ ବିଭାଗ ପକ୍ଷରୁ ଆଜି ଖୋର୍ଦ୍ଧା ନୂଆ ବସ୍ଷ୍ଟାଣ୍ଡ ଓ ଖୋର୍ଦ୍ଧା-ଜଟଣୀ ବାଇପାସ୍ ନିକଟରେ ଚଢ଼ଉ କରାଯାଇ ୬ଲକ୍ଷ ଟଙ୍କାର ଗଂଜେଇ ଓ ବ୍ରାଉନ୍ସୁଗାର ଜବତ କରିବା ସହ ୨ଜଣଙ୍କୁ ଗିରଫ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନାନୁସାରେ, ଆଜି ଅବକାରୀ ଗୁଇନ୍ଦା ସୂଚନା ଭିତ୍ତିରେ ଖୋର୍ଦ୍ଧା ଅବକାରୀ ବିଭାଗ ପକ୍ଷରୁ ଜିଲ୍ଲା ଭ୍ରାମ୍ୟମାଣ ଅବକାରୀ ସବ୍ଇନସପେକ୍ଟର ବି ମନୋଜ କୁମାର ଓ ଇନ୍ସପେକ୍ଟର ସସ୍ମିତା ହେତାଙ୍କ ନେତୃତ୍ୱରେ ଖୋର୍ଦ୍ଧାର ଦୁଇଟି ଭିନ୍ନ ସ୍ଥାନରେ ଚଢ଼ଉ କରାଯାଇଥିଲା । ପ୍ରଥମ ମାମଲାରେ ଖୋର୍ଦ୍ଧା ନୂଆ ବସ୍ଷ୍ଟାଣ୍ଡ ନିକଟରୁ ଜଣେ ବ୍ୟକ୍ତି ୩ କିଲୋଗ୍ରାମ ଗଂଜେଇ ନେଉ ଯାଉଥିବା ବେଳେ ଅବକାରୀ ବିଭାଗ ହାତରେ ଧରାପଡ଼ିଛି । ଗିରଫ ହୋଇଥିବା ବ୍ୟକ୍ତି ଜଣକ ପଶ୍ଚିମବଙ୍ଗର ପୂର୍ବ ମେଦିନୀପୁର ଜିଲ୍ଲାର ହଂସଚୋର ଗାଁର ବନସୋରି ହଜାରା (୫୪) । ବନସୋରିକୁ ଗିରଫ କରାଯିବା ସହ ଏନେଇ ଖୋର୍ଦ୍ଧା ଅବକାରୀ ଥାନାରେ ୭/୨୦୨୨ରେ ଏକ ମାମଲା ରୁଜୁ କରାଯାଇ କୋର୍ଟ ଚାଲାଣ କରାଯାଇଛି । ଜବତ ହୋଇଥିବା ଗଂଜେଇର ଆନୁମାନିକ ମୂଲ୍ୟ ୧୫ ହଜାର ଟଙ୍କା ହେବ ।
ସେହିଭଳି ଖୋର୍ଦ୍ଧା-ଜଟଣୀ ବାଇପାସ୍ ନିକଟରେ ଚଢ଼ଉ କରାଯାଇ କଟକ ନିଆଳି ଥାନା ପୂର୍ବଖଣ୍ଡ ନିଆଳିର ସେକ୍ ଅସଲାମକୁ ଗିରଫ କରାଯାଇଛି । ଅସଲାମ ନିକଟରୁ ୫୫ ଗ୍ରାମ ବ୍ରାଉନ୍ ସୁଗାର ଜବତ କରାଯାଇଛି । ଜବତ ବ୍ରାଉନ୍ସୁଗାରର ମୂଲ୍ୟ ୫ଲକ୍ଷ ୫୫ ହଜାର ଟଙ୍କା ହେବ। ଅଭିଯୁକ୍ତ ଜଣକ ଏହି ମାରାତ୍ମକ ନିଶା ବିକ୍ରି କରିବାକୁ ଖୋର୍ଦ୍ଧା ଆସିଥିବା ପଚରାଉଚୁରାରେ ଜଣାଯାଇଛି । ଏନେଇ ୮/୨୦୨୨ରେ ଏକ ମାମଲା ରୁଜୁ କରାଯାଇ କୋର୍ଟ ଚାଲାଣ କରାଯାଇଥିବା ନେଇ ଅବକାରୀ ଇନ୍ସପେକ୍ଟର ଭୈରବ ସାହୁ ସୂଚନା ଦେଇଛନ୍ତି ।