ମରୁଡ଼ି ରିପୋର୍ଟ କେନ୍ଦ୍ରକୁ ପଠାଯାଇଛି: ରାଜସ୍ବ ମନ୍ତ୍ରୀ
ରାଜ୍ୟର ୯ଟି ଜିଲ୍ଲାର ୭୦ଟି ବ୍ଲକ ମରୁଡ଼ି କ୍ଷତିଗ୍ରସ୍ତ, ଓଡ଼ିଶା କହିଲା କେନ୍ଦ୍ରକୁ ୧୫୩୪ କୋଟିର ସହାୟତା ମଗାଯାଇଛି
ଭୁବନେଶ୍ବର : ବର୍ଷା ଅଭାବରୁ ସୁନ୍ଦରଗଡ଼, ସମ୍ବଲପୁର ସମେତ ୯ଟି ଜିଲ୍ଲାର ୭୦ଟି ବ୍ଲକ ମରୁଡ଼ି କ୍ଷତିଗ୍ରସ୍ତ । ଏଥିପାଇଁ ରାଜ୍ୟ ସରକାର ୧୫୩୪ କୋଟି ୮୨ ଲକ୍ଷ ଟଙ୍କାର ଆର୍ଥିକ ସହାୟତା କେନ୍ଦ୍ରକୁ ବହୁ ପୂର୍ବରୁ ମାଗିଛନ୍ତି । ରାଜ୍ୟସଭା ସାଂସଦ ଅନୁଭବ ମହାନ୍ତିଙ୍କ ପ୍ରଶ୍ନର ଉତ୍ତରରେ ଓଡ଼ିଶା ମରୁଡ଼ି ବାବଦରେ କିଛି ବି ସହାୟତା ମାଗିନଥିବା କହିଥିଲେ କେନ୍ଦ୍ର ସରକାର।
Sambad is now on WhatsApp
Join and get latest news updates delivered to you via WhatsApp
ସଚିବାଳୟରେ ଏ ସମ୍ପର୍କରେ ସୂଚନା ଦେଇ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ମହେଶ୍ବର ମହାନ୍ତି କହିଛନ୍ତି, ଚଳିତବର୍ଷ ଖରିଫ ଫସଲ କଟା ଆରମ୍ଭ ହେବା ବେଳକୁ ରାଜ୍ୟ ସରକାର ସମ୍ପୃକ୍ତ ଜିଲ୍ଲାର ମରୁଡ଼ିଜନିତ କ୍ଷୟକ୍ଷତି ଆକଳନ କରି ଫସଲ ହାନିର ଫଟୋ ସହିତ ରିପୋର୍ଟ କେନ୍ଦ୍ର ସରକାରଙ୍କୁ ପ୍ରଦାନ କରିଛନ୍ତି । ବୋଧହୁଏ ସାଂସଦ ଅନୁଭବ ମହାନ୍ତିଙ୍କ ପ୍ରଶ୍ନର ଉତ୍ତର ଲେଖାହେବା ବେଳକୁ ରାଜ୍ୟ ସରକାରଙ୍କ ରିପୋର୍ଟ କେନ୍ଦ୍ର ସରକାରଙ୍କ ପାଖରେ ପହଞ୍ଚିନଥିବ। ବର୍ଷା ଅଭାବ ଯୋଗୁଁ ରାଜ୍ୟର ବରଗଡ଼, ବଲାଙ୍ଗୀର, ଦେବଗଡ଼, ଝାରସୁଗୁଡ଼ା, କଳାହାଣ୍ଡି, ନବରଙ୍ଗପୁର, ନୂଆପଡ଼ା, ସମ୍ବଲପୁର ଓ ସୁନ୍ଦରଗଡ଼ ମରୁଡ଼ି ଦ୍ବାରା ପ୍ରଭାବିତ ବୋଲି ଗତ ଅକ୍ଟୋବର ମାସରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ବିଜ୍ଞପ୍ତି ପ୍ରକାଶ କରିଥିଲା।