ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାରେ ୧ ଲକ୍ଷ ସଂସ୍ଥା ଉପକୃତ
ଇପିଏଫ୍ଓ ଦେଲା ୨୦୭ କୋଟି ଟଙ୍କାର ଅନୁଦାନ
ଭୁବନେଶ୍ବର : କୋଭିଡ୍-୧୯ ଭଳି ସର୍ବବ୍ୟାପୀ ମହାମାରୀକୁ ମୁକାବିଲା କରିବା ପାଇଁ ଭାରତ ସରକାରଙ୍କର ଶ୍ରମ ମନ୍ତ୍ରାଳୟ ଅନ୍ତର୍ଗତ କର୍ମଚାରୀ ଭବିଷ୍ୟନିଧି ସଂଗଠନ (ଇପିଏଫ୍ଓ) ତରଫରୁ ‘ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋନଜା’ରେ ମାର୍ଚ ମାସର ଭବିଷ୍ୟନିଧି ଦେୟ ବାବଦକୁ ପ୍ରାୟ ୧ ଲକ୍ଷ ସଂସ୍ଥା ଉପକୃତ ସହବା ସହ ପ୍ରାୟ ୧୪ ଲକ୍ଷ କର୍ମଚାରୀଙ୍କ ପାଇଁ ୨୦୭ କୋଟିର ଅନୁଦାନ ପ୍ରଦାନ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ଏହି ଯୋଜନା ଅନୁଯାୟୀ, ଯେଉଁ ସଂସ୍ଥାରେ ୧୦୦ରୁ କମ୍ କର୍ମଚାରୀ କାର୍ଯ୍ୟ କରୁଥିବେ ଓ ତାହାର ୯୦ ପ୍ରତିଶତରୁ ଅଧିକ କର୍ମଚାରୀ ୧୫ ହଜାର ଟଙ୍କାରୁ କମ୍ ଦରମା ପାଉଥିବେ, ସେହି ସଂସ୍ଥାମାନଙ୍କର ମାର୍ଚ, ଏପ୍ରିଲ ଓ ମେ’ ମାସର ଭବିଷ୍ୟନିଧି ବାବଦ ସମୁଦାୟ ଦେୟ (ଉଭୟ ନିଯୁକ୍ତିଦାତା ଓ କର୍ମଚାରୀଙ୍କ ଭାଗ ପାଇଁ ୨୪ ପ୍ରତିଶତ ଅର୍ଥ) ଭାରତ ସରକାର ବହନ କରିବେ। ପ୍ରାୟ ୪ ଲକ୍ଷରୁ ଊର୍ଧ୍ବ ସଂସ୍ଥାର ୮୦ ଲକ୍ଷ କର୍ମଚାରୀ ଏହି ଯୋଜନାରେ ଅନ୍ତର୍ଭୁକ୍ତ ହେବାକୁ ଯୋଗ୍ୟ ବିବେଚିତ ହୋଇଛନ୍ତି ଓ ଏଥିପାଇଁ ଭାରତ ସରକାର ପ୍ରାୟ ୫ ହଜାର କୋଟି ଟଙ୍କାର ଅନୁଦାନ ଲକ୍ଷ୍ୟ ରଖିଛନ୍ତି।
ଓଡ଼ିଶାରେ ଏହି ଯେଜାନାର ସଫଳ ରୂପାୟନ ପାଇଁ କର୍ମଚାରୀ ଭବିଷ୍ୟନିଧି ସଂଗଠନ, ଓଡ଼ିଶା ମୁଖ୍ୟ ପି. ବୀରଭଦ୍ର ସ୍ବାମୀଙ୍କ ନେତୃତ୍ବରେ ଇପିଏଫ୍ଓର ଅଧିକାରୀ ଓ କର୍ମଚାରୀମାନେ ଅକ୍ଲାନ୍ତ ଉଦ୍ୟମ ଜାରି ରଖିଛନ୍ତି। କୋଭିଡ୍-୧୯ ଲକ୍ଡାଉନ୍ ସତ୍ତ୍ବେ ସମସ୍ତ ପ୍ରବର୍ତ୍ତନ ଅଧିକାରୀ ଓ କିଛି ଉତ୍ସର୍ଗୀକୃତ କର୍ମଚାରୀ ଯୋଗ୍ୟ ବିବେଚିତ ଅନୁଷ୍ଠାନମାନଙ୍କ ସହ ନିରନ୍ତର ଯୋଗାଯୋଗ ଜାରି ରଖିଛନ୍ତି। ଭୁବନେଶ୍ୱର, ରାଉରକେଲା, ବ୍ରହ୍ମପୁର ଓ କେନ୍ଦୁଝରର ଆଞ୍ଚଳିକ ଭବିଷ୍ୟନିଧି କାର୍ଯ୍ୟାଳୟ ମାଧ୍ୟମରେ ଆଜି ସୁଦ୍ଧା ଓଡ଼ିଶାର ପ୍ରାୟ ୩୫ ଶହ ସଂସ୍ଥାର ୫୦ ହଜାରରୁ ଊର୍ଧ୍ବ କର୍ମଚାରୀମାନେ ଏହି ଯୋଜନାର ଲାଭ ପାଇ ପ୍ରାୟ ୮ କୋଟି ଟଙ୍କାର ଅନୁଦାନ ହାସଲ କରିଛନ୍ତି। ଓଡ଼ିଶାରେ ଆହୁରି ୫ ହଜାରରୁ ଊର୍ଧ୍ବ ସଂସ୍ଥା ଏ ଯୋଜନା ପାଇଁ ଯୋଗ୍ୟ ହୋଇଥିଲେ ସୁଦ୍ଧା ଆଜି ପର୍ଯ୍ୟନ୍ତ ମାର୍ଚ ମାସର ଭବିଷ୍ୟନିଧି ଜମା ପାଇଁ ଇସିଆର୍ ଦାଖଲ କରିନାହାନ୍ତି। କେନ୍ଦ୍ର ସରକାର କୋଭିଡ୍-୧୯ ଲକ୍ଡାଉନ୍ ପରିପ୍ରେକ୍ଷୀରେ ମାର୍ଚ ମାସର ଭବିଷ୍ୟନିଧି ଦେୟ ବାବଦ ତାରିଖ ମେ’ ୧୫ ତାରିଖକୁ ଘୁଞ୍ଚାଇ ଦେଇଛନ୍ତି। ତେଣୁ ବିଳମ୍ବ ନ କରି ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାରେ ଯୋଗ୍ୟ ବିବେଚିତ ହେଉଥିବା ସମସ୍ତ ଅନୁଷ୍ଠାନ/ସଂସ୍ଥା ଯଥାଶୀଘ୍ର ଇସିଆର୍ ଦାଖଲ କରି ଏହି ଯୋଜନାର ସୁଫଳ ଲାଭ କରିବାକୁ କର୍ମଚାରୀ ଭବିଷ୍ୟନିଧି ସଂଗଠନ, ଭୁବନେଶ୍ୱରର ସହକାରୀ ଭବିଷ୍ୟନିଧି ଆୟୁକ୍ତ ତଥା ଭାରପ୍ରାପ୍ତ ଅଧିକାରୀ ସଂଜୟ କୁମାର ରଥ ନିବେଦନ କରିଛନ୍ତି। ଏ ସଂକ୍ରାନ୍ତୀୟ କୌଣସି ସମସ୍ୟାର ସମାଧାନ ପାଇଁ ନିଜ ଅଞ୍ଚଳରେ ଇପିଏଫ୍ଓର ପ୍ରବର୍ତ୍ତନ ଅଧିକାରୀଙ୍କ ସହ ଯୋଗଯୋଗ କରିବାକୁ କୁହାଯାଇଛି।