ନାଗପୁରରେ ଲକ୍ଡାଉନ, ବିପଦକୁ ଡାକୁଛି ଗଞ୍ଜାମ
ଭାୟା ନାଗପୁର ପ୍ରତ୍ୟହ ଓଡ଼ିଶା ଆସୁଛି ଟ୍ରେନ୍, ବ୍ରହ୍ମପୁର ଷ୍ଟେସନରେ ଯାଞ୍ଚ ନାହିଁ
ମୁମ୍ବାଇ-ଭୁବନେଶ୍ବର କୋଣାର୍କରେ ଆସୁଛନ୍ତି ଯାତ୍ରୀ
Sambad is now on WhatsApp
Join and get latest news updates delivered to you via WhatsApp
ବ୍ରହ୍ମପୁର: କରୋନା ହଟ୍ସ୍ପଟ୍ ଥିଲା ଗଞ୍ଜାମ। ଏବେ ସ୍ଥିତି ସ୍ବାଭାବିକ ହୋଇଛି। ବହୁ ପ୍ରୟାସ ପରେ ସଂକ୍ରମଣ ନିୟନ୍ତ୍ରଣକୁ ଆସିଛି। କିନ୍ତୁ ମହାରାଷ୍ଟ୍ର ସମେତ ୬ଟି ରାଜ୍ୟରେ କରୋନା ଏବେ ପୁଣି କାୟା ବିସ୍ତାର କରି ଚାଲିଛି। ସେ ସବୁ ରାଜ୍ୟରେ ସଂକ୍ରମଣ ବୃଦ୍ଧି ପାଇବାରେ ଲାଗିଛି।ମହାରାଷ୍ଟ୍ରରେ କୋଭିଡ଼୍ ସ୍ଥିତି ଗମ୍ଭୀର ହେବା ସହ ପୁଣି ଲକ୍ଡାଉନ୍ ଜାରି ହୋଇଛି। ନାଗପୁରରେ ସଂକ୍ରମଣ ସ୍ଥିତି ଅତ୍ୟନ୍ତ ଗମ୍ଭୀର। ଏହାପରେ ଓଡ଼ିଶାରେ ଗତ କିଛିଦିନ ହେଲା ପୁଣି କଟକଣା ଫେରିଛି। ରେଳ ଷ୍ଟେସନ୍ ଓ ବସ୍ଷ୍ଟାଣ୍ଡ୍ ଗୁଡ଼ିକରେ ଯାଞ୍ଚ୍ କଡ଼ାକଡ଼ି କରିବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ପ୍ରତ୍ୟହ ଅହମ୍ମଦାବାଦ, ମୁମ୍ବାଇ ଓ ନାଗପୁରରୁ ଓଡ଼ିଶାକୁ ଟ୍ରେନ୍ ଆସୁଛି। କିନ୍ତୁ ବ୍ରହ୍ମପୁର ରେଳ ଷ୍ଟେସନ୍ରେ ଓହ୍ଲାଉଥିବା ଯାତ୍ରୀଙ୍କ ଆଦୌ ଯାଞ୍ଚ୍ ହେଉନାହିଁ। ଜିଲ୍ଲା ପ୍ରଶାସନ ପକ୍ଷରୁ ଏ ଦିଗରେ କୌଣସି ପଦକ୍ଷେପ ନିଆ ନଯିବା, ଖୋଲା ଛାଡ଼ିଦେବା ଅର୍ଥ ଜିଲ୍ଲାକୁ ପୁଣି ବିପଦ ମୁହଁରେ ଠେଲିଦେବା ସଙ୍ଗେ ସମାନ। ଏହି ଟ୍ରେନ୍ରେ ମହାରାଷ୍ଟ୍ର ଓ ନାଗପୁରରୁ ଯଦି ସଂକ୍ରମିତ ଗଞ୍ଜାମକୁ ଆସନ୍ତି, ତେବେ ଜିଲ୍ଲାର ସଂକ୍ରମଣ ହାର ବୃଦ୍ଧି ପାଇବାର ଆଶଙ୍କା ଦେଖାଦେଇଛି। ପ୍ରତିଷେଧ ବ୍ୟବସ୍ଥା ନ କରି ଜିଲ୍ଲା ପ୍ରଶାସନ ଜାଣିଶୁଣି କରୋନାକୁ ପୁଣି ହାତଠାରି ଡାକୁଥିବା ଅଭିଯୋଗ ହେଉଛି।