‘ସମ୍ବାଦ‘ ଓ ‘କନକ ନ୍ୟୁଜ୍’ ପକ୍ଷରୁ ଆରମ୍ଭ ହେଲା ବିପଦର ବନ୍ଧୁ କାର୍ଯ୍ୟକ୍ରମ, ପ୍ରତିଦିନ ହଜାରେ ଲୋକଙ୍କୁ ଯୋଗାଇ ଦିଆଯିବ ରନ୍ଧାଖାଦ୍ୟ
ଭୁବନେଶ୍ବର: କରୋନା ପ୍ରଭାବିତଙ୍କ ସହାୟତା ପାଇଁ ‘ସମ୍ବାଦ’ ଓ ‘କନକ ନ୍ୟୁଜ’ ପକ୍ଷରୁ ଆରମ୍ଭ ହୋଇଛି ବିପଦର ବନ୍ଧୁ କାର୍ଯ୍ୟକ୍ରମ । ଏହି କାର୍ଯ୍ୟକ୍ରମ ଜରିଆରେ ରାଜ୍ୟର ବିଭିନ୍ନ ସ୍ଥାନରେ ନିରାଶ୍ରୟ ଓ ଅସହାୟମାନଙ୍କୁ ରନ୍ଧା ଖାଦ୍ୟ .ଯୋଗାଇ ଦିଆଯାଉଛି। ଏ.କେ.ଦାଶ ଆସୋସିଏଟସ୍ ଲିମିଟେଡ ସହଯୋଗରେ ଏହି କାର୍ଯ୍ୟକ୍ରମ ହାତକୁ ନିଆଯାଇଛି । ପ୍ରଥମ ଦିନରେ ହଜାରେ ଲୋକଙ୍କୁ ରନ୍ଧା ଖାଦ୍ୟ ପ୍ୟାକେଟ କରି ଦିଆଯାଇଛିି ।
Sambad is now on WhatsApp
Join and get latest news updates delivered to you via WhatsApp
ସାରା ବିଶ୍ୱକୁ କରୋନା କବଜା କରିନେଇଥିବା ବେଳେ ଏଭଳି କୌଣସି ଅଂଚଳ ନାହିଁ ଯାହା କରୋନା ଦ୍ୱାରା ପ୍ରଭାବିତ ହୋଇନାହିଁ । ଆଉ ଏତିକିବେଳେ ମୌଳିକ ଆବଶ୍ୟକତାରୁ ବଞ୍ଚିତଙ୍କ ବିପଦର ବନ୍ଧୁ ପାଲଟିଛନ୍ତି ସମ୍ବାଦ ଓ କନକ ନ୍ୟୁଜ । ଏ.କେ ଦାସ ଆସୋସିଏଟସ ସହାୟତାରେ ବିପନ୍ନଙ୍କ ପାଖରେ ରନ୍ଧାଖାଦ୍ୟ ପହଞ୍ଚାଇବାକୁ ଆରମ୍ଭ ହୋଇଛି ପ୍ରୟାସ ।
ଏପରି ଏକ ଘଡିସନ୍ଧି ମୁହୂର୍ତ୍ତରେ କାମ ବନ୍ଦ, ବଜାର ବି ବନ୍ଦ । ଶ୍ରମିକ ଶ୍ରେଣୀର ଲୋକଙ୍କ ପାଖରେ ପେଟକୁ ଦାନା ମଧ୍ୟ ନାହିଁ । ତେଣୁ କେହି ଯେପରି ଭୋକିଲା ନ ରହିବେ ସେଥିପାଇଁ ସମସ୍ତେ ପ୍ରୟାସ ଆରମ୍ଭ କରିବା ଦରକାର । ସରକାରୀ ସହାୟତା ପହଞ୍ଚିବାକୁ ସମୟ ଲାଗେ,ତା’ପୂର୍ବରୁ ସେହି ଭୋକିଲାଙ୍କ ପାଖରେ ପହଞ୍ଚିବା ଏବେ ଗୁରୁଦାୟିତ୍ୱ ହୋଇଯାଇଛି । ବିପଦରେ ପଡ଼ି ହନ୍ତସନ୍ତ .ହେଉଥିବା ମଣିଷଙ୍କର ବନ୍ଧୁ ସାଜିବାର ସମୟ ଏବେ ଆସିଯାଇଛି । ତେଣୁ ଏହି ଅଭିଯାନରେ କିପରି ଅଧିକରୁ ଅଧିକ ଲୋକଙ୍କ ପାଖରେ ପହଞ୍ଚିହେବ ସେ ନେଇ ଚାଲିଛି ପ୍ରୟାସ । ଆଜି ପ୍ରାୟ ଏକ ହଜାର ପ୍ରଭାବିତଙ୍କୁ ଏହି ରନ୍ଧା ଖାଦ୍ୟ ବଣ୍ଟନ କରାଯାଇଥିଲା । ଆଗକୁ ମଧ୍ୟ ଏହି ଉଦ୍ୟମ ଜାରି ରହିବ । ଖାଲି ସମ୍ବାଦ ଓ କନକ ନ୍ୟୁଜ କାହିଁକି ଆପଣ ବି ଏମିତି କିଛି ଅଭିଯାନ କରନ୍ତୁ ଏବଂ ଏହି ସଙ୍କଟ ସମୟରେ କେହି .ଯେପରି ଭୋକିଲା ନ ରହିବେ ସେ ଦିଗରେ ପ୍ରୟାସ କରନ୍ତୁ।