ସୁରଟରୁ ଓଡ଼ିଶା ଆସିବାକୁ ଥିବା ୩ଟି ଟ୍ରେନ ବାତିଲ, ହାଇକୋର୍ଟଙ୍କ ନିର୍ଦ୍ଦେଶ ଆସିବା ପରେ ନିଷ୍ପତ୍ତି ନେଲା ସୁରଟ ପ୍ରଶାସନ
ଭୁବନେଶ୍ୱର : ଓଡ଼ିଶା ହାଇକୋର୍ଟଙ୍କ ନିର୍ଦ୍ଦେଶ ଆସିବା ପରେ ଆସନ୍ତା କାଲି ସୁରଟରୁ ଭୁବନେଶ୍ୱର ଆସିବାକୁ ଥିବା ୩ଟି ଟ୍ରେନକୁ ବାତିଲ କରିଦିଆଯାଇଛି । ଏ ସଂପର୍କରେ ସୁରଟର ଜିଲ୍ଲାପାଳ ଧବଳ ପଟେଲ ସୂଚନା ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସାମ୍ବାଦିକମାନଙ୍କୁ ସେ କହିଛନ୍ତି ଯେ ଓଡ଼ିଶା ହାଇକୋର୍ଟଙ୍କ ନିର୍ଦ୍ଦେଶ ପରେ ଟ୍ରେନ ଚଳାଚଳ ଲାଗି ଓଡ଼ିଶା ସରକାର ଅନୁମତି ପ୍ରତ୍ୟାହାର କରିନେଇଛନ୍ତି । ଏହାକୁ ଦୃଷ୍ଟିରେ ରଖି ଆସନ୍ତା କାଲି ଅର୍ଥାତ ଶୁକ୍ରବାରଦିନ ଓଡ଼ିଶାକୁ ଯିବାକୁ ଥିବା ୩ଟି ଟ୍ରେନକୁ ବାତିଲ କରିଦିଆଯାଇଛି । ଏ ସଂପର୍କରେ ଡିଭିଜିନାଲ ରେଲେଓ୍ୱ କମିଶନରଙ୍କୁ ପତ୍ର ଲେଖି ଭଡ଼ା ଫେରସ୍ତ ପାଇଁ କୁହାଯାଇଛି ।
ସୂଚନାଯୋଗ୍ୟ ଯେ ଓଡ଼ିଶା ହାଇକୋର୍ଟ ଆଜି ଏକ ରାୟରେ କହିଛନ୍ତି ଯେ ବିନା କୋଭିଡ-୧୯ ପରୀକ୍ଷା କରି ଓଡ଼ିଶାକୁ କେହି ଆସିପାରିବେ ନାହିଁ। ପରୀକ୍ଷା ପରେ ସେମାନଙ୍କ ରିପୋର୍ଟ ନେଗେଟିଭ ବାହାରିଲେ ସେମାନେ ଓଡ଼ିଶାକୁ ଆସିପାରିବେ । ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ନବଦାସ ମଧ୍ୟ ପ୍ରବାସୀଙ୍କ ପରୀକ୍ଷା ପାଇଁ ଦାବି କରିଛନ୍ତି । ସୁରତରୁ କିଛି ପ୍ରବାସୀ ଆସିବା ପରେ ଓଡ଼ିଶାରେ ହଠାତ ରାଜ୍ୟରେ କୋରନା ପଜିଟିଭ ସଂଖ୍ୟା ଦ୍ରୁତଗତିରେ ବଢିବା ଆରମ୍ଭ କରିଛି । ଏହାକୁ ନେଇ ରାଜ୍ୟ ସରକାରଙ୍କ ଚିନ୍ତା ବଢିଯାଇଛି ।