ବର୍ଷା ପାଣି ନିଷ୍କାସନ ପାଇଁ ତାତିଲେ ଲୋକେ : ପୁରୀ-ସାତପଡ଼ା ରାସ୍ତା ଅବରୋଧ
ବ୍ରହ୍ମଗିରି : ବର୍ଷା ପାଣି ନିଷ୍କାସନ ପାଇଁ ବାଟ ନଥିବାରୁ ପଣସପଦା ଅଞ୍ଚଳର ଶତାଧିକ ଲୋକେ ଜଳବନ୍ଦୀ ହୋଇ ରହିଛନ୍ତି। ତୁରନ୍ତ ବର୍ଷା ପାଣି ନିଷ୍କାସନ ଦାବି କରି ଆଜି ସକାଳୁ ଲୋକମାନେ ପୁରୀ-ସାତପଡ଼ା ରାଜପଥକୁ ପଣସପଦା ବଜାରଠାରେ ୨ ଘଣ୍ଟା ଅବରୋଧ କରିଥିଲେ। ଫଳରେ ଯାତାୟାତ ବାଧାପ୍ରାପ୍ତ ହେବା ସହ ଯାନବାହନ ଓ ପର୍ଯ୍ୟଟକ ରାଜପଥରେ ଫସି ରହିଥିଲେ। ଖବର ନେବାରେ ଜଣାପଡ଼ିଛି, ଲଗାଣ ବର୍ଷା ଯୋଗୁଁ ପଣସପଦାର ତଳିଆ ଅଞ୍ଚଳରେ ବହୁ ଲୋକ ଜଳବନ୍ଦୀ ହୋଇ ରହିଛନ୍ତି। ଉପର ମୁଣ୍ତରେ ବର୍ଷା ଜଳ ନିଷ୍କାସନ ପାଇଁ ବାଟ ନ ଛଡ଼ାଯିବାରୁ ଲୋକମାନେ ପାଣି ଘେରରେ ରହିବା ସହ ଅସୁବିଧାର ସମ୍ମୁଖୀନ ହେଉଥିଲେ। ଏହାର ପ୍ରତିବାଦରେ ଆଜି ସକାଳୁ ଶତାଧିକ ଲୋକେ ପୁରୀ-ସାତପଡ଼ା ରାଜପଥର ପଣସପଦା ଛକଠାରେ ରାସ୍ତା ଅବରୋଧ କରିଥିଲେ। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଅବରୋଧକାରୀଙ୍କୁ ବୁଝାଶୁଝା କରିବା ସହ ତୁରନ୍ତ ବର୍ଷା ପାଣି ନିଷ୍କାସନ ପାଇଁ ବ୍ୟବସ୍ଥା କରାଯିବ ବୋଲି ପ୍ରତିଶ୍ରୁତି ଦେବା ପରେ ରାସ୍ତାରୋକ ହଟିଥିଲା।